[1] Kami dowai in agsolat, in osai Pablo, piyangwat Diyos katiwala Kiristo Isos, in osai kantam belag Timotiyo.
[2] Kami agsolat sa mga bodang Diyos sa bayan Kolosas, mga belag in yewed mga aglimbang kay Kiristo. Kamo pakayawteen in Diyos kantam Amang, osai pakanen apyaan pag remrem.
[3] Baatte kamo kanyam piyagpandalangin, kami agkaanggay sa Diyos in Amang kantam Kapwan IsoKiristo,
[4] angkataw kami abaritaan in kamo agpasandig ngani kay Kiristo Isos, osai in kamo agpakayawte sa boo mga iidang Diyos.
[5] Kaya kamo agkataw ina, panawen sa kanyo piyagpanaya in siyandata sa langit batay sa kanyo. Kamo abaritaan ina tangona in piyatoldo sa kanyo in totoo pag barita, in Maal pag Barita.
[6] Ina pag barita agarabang agbaba makaanggay sa boo mga mangyan kataw din in mibaloy sa kanyo sogod kanyo arengeyan, kanyo atawanan in kalakoyen in agpakayawte in Diyos.
[7] Ina piyatoldo Ipapras sa kanyo. Siyo kanyam piyagpakayawte pag sarig, yewed aglimbang agpanawen, sogowan Kiristo, kanyam din sogowan sa kanyo.
[8] Siyo in agbarita sa kanyam keyen kamo agpakayawte ngani sa mga amat. Ina pag agpakayawte tiyaboy in Abyan Diyos sa kanyo.
[9] Ibat ina kanyam arengeyan, kami yewed agempet agpandalangin sa kanyo. Kanyam piyagayay sa Diyos kamo patoldowen gayed in kansiyo beet, osai kamo pakanen in Abyan in boo katawanan matang kanyo atawanan in kansiyo beet.
[10] Sa kataw ina kamo kabaloy agogali maal sibay sa Kapwan osai makaanggay wano sa kansiyo, boo maal in kanyo panawen osai agistobo in kanyo atawanan sa Diyos.
[11] Kanyam din piyagpandalangin, kamo pakarigenen gayed in kansiyo lakoy kabaloyan, matang kamo agkaanggay daan agbanta sa boote.
[12] Osai kanyam pandalangin kamo agkaanggay sa Amang, angkataw kamo kansiyo piyasibay piyaagem sa mga iidang agbalay sa rawa sa sakopan Diyos.
[13] Kitam kansiyo piyalpas sa kabaloyan lened, piyasakop wakay sa kansiyo Bodang piyagmaal.
[14] In Bodang in agpalpas sa kantam, osai in aglibangaw sa kantam mga daet.
[15] In Diyos yewed piyagngitan, kamay Kiristo in agpapangkit no kataw nakay siyo, osai Kiristo in kansiyo Bodang apo kabaloyan sa boo mga piyangwat. Siyo in tokawan sa boo,
[16] angkataw siyo in piyakan in panawen agpangwat in boo sa langit kadayo sa kobat. Kansiyo piyangwat in mga piyagngitan. Kansiyo din piyangwat in yewed piyagngitan, kataw in mga poon lakoy, in agsakop, in mga kapitan, in mga apo kabaloyan mga yewed piyagngitan. In boo wanote, Kiristo in piyakan in panawen agpangwat osai in agalapet.
[17] Siyo in tokawan sa boo, osai siyo in agalapet sa boo matang yewed masida.
[18] In barkadaan in mga bodang Diyos in kansiyo bilog. Kiristo in agparakay, siyo in olo, siyo in tokawan boway wakay tagoli, matang siyo in lakonaw lakoy sa boo.
[19] In boo kalakoyen Diyos kansiyo wa piyabalay kay Kiristo.
[20] Kiristo in iidang Diyos matang in boo piyaagem wakay sa Diyos. Kadayo in sa kobat, kadayo in sa langit, in boote mipakapya wa panawen matay kansiyo Bodang sa kodos.
[21] Kadayo kamo in mga yewed Odyo. Tangona kamo adayonaw sa Diyos, kanyo remrem aglaban sa kansiyo, osai kamo agpamangwat daet.
[22] Kamay ngona kamo piyangwat wa Diyos kansiyo mga bodang panawen Kiristo biyono, kansiyo daan bilog in matay. Kaya matay matang kitam maal wano, malinis, idapo daet in kitam kansiyo piyagpaadap sa Diyos.
[23] Kamay kailangan palagi kitam ayaw aglimbang, agpakarigen sa kantam paniwala, ayaw agpaglebey in agpasandig sa mga pangako in Maal pag Barita kantam arengeyan. Ako Pablo piyangwat sogowan Diyos agbaba ina pag Maal pag Barita in piyabarita sa boo mga mangyan.
[24] Ngona ako agkaanggay sa kangay mga kaidapan panawen sa kanyo, angkataw sa kangay kaidapan ako agtolong aglobos in mga kaidapan Kiristo panawen sa kansiyo bilog, in barkadaan mga bodang Diyos.
[25] Ako piyangwat Diyos sogowan in barkadaan kansiyo mga bodang, in ako kansiyo iidang agpatoldo sa kanyo in kansiyo agiplaong. Ako kansiyo iidang matang agpalowas wa gayed sa kanyo in piyagbetang.
[26] Ina piyagbetang sa boo mga mangyan sogod kay naw tangona kamay ngona piyagpalowas wa sa kantam sa kansiyo mga iidang.
[27] In beet Diyos palowasen sa kantam in kalakoyen in makasoyo pag kansiyo piyagbetang, matang kantam wakay palowasen sa boo mga mangyan. Ina in Kiristo agbalay sa kantam. Kalbas no kataw ina kitam katiyak batay sa rawa Diyos.
[28] Na Kiristo in kanyam piyagbarita. Sa boo katawanan tiyaboy Diyos sa kanyam, kami agpatoldo sa boo mga mangyan matang siro sibay kanyam piyagpaadap sa Diyos, panawen siro agiyagem kay Kiristo.
[29] Ina in dailan kaya ako agpilit wano agpanawen, angkataw in kansiyo lakoy kabaloyan agpanawen sa kangay galem.