បើការតវ៉ាតាមការទូតមិនអាចបញ្ឈប់ទង្វើឈ្លានពានរបស់ថៃ តើកម្ពុជាអាចមានផ្លូវអ្វីផ្សេងទៀតដែរឬទេ?
ព្រឹត្តិការណ៍កម្ពុជាប្រចាំថ្ងៃ
កម្ពុជាតាមរយៈក្រសួងការបរទេសនៅថ្ងៃទី១០ ខែសីហា ឆ្នាំ២០២៦ បានចេញលិខិតតវ៉ាសាជាថ្មីទៀត បន្ទាប់ពីយោធាថៃបានសាងសង់លេណដ្ឋានថ្មីរបស់ខ្លួនរំលោភចូលទឹកដីកម្ពុជា នៅច្រកទ្វារអន្តរជាតិថ្មដា ក្នុងខេត្តពោធិ៍សាត់ កាលពីថ្ងៃទី៦ ខែសីហា និងការប្រកាសភ្ជាប់អគ្គិសនីរបស់ថៃទៅកាន់ប្រាសាទតាក្របី និងភ្នំ៣៣៣ កាលពីថ្ងៃទី៧ខែ សីហា។ អ្នកជំនាញកិច្ចការអន្តរជាតិខ្លះយល់ថា ការចេញកំណត់ទូតតវ៉ា ជាបន្តបន្ទាប់របស់កម្ពុជានេះ គឺជាយុទ្ធសាស្រ្តប្រតិកម្មអសកម្ម ពោលជាវិធីដែលខ្វះប្រសិទ្ធភាពទប់ស្កាត់ ឬវិធានការឆ្លើយតបជាក់ស្តែង។ តែអ្នកជំនាញមួយចំនួនមើលឃើញថា ការចេញកំណត់ទូតតវ៉ានេះ ពុំមានន័យថា រដ្ឋាភិបាលកម្ពុជាគ្មានជម្រើសនោះឡើយ និងថា នេះគឺជាមធ្យោបាយការទូតស្របច្បាប់ ដែលជួយបញ្ជាក់ជំហររបស់កម្ពុជា ដែលមិនទទួលស្គាល់សកម្មភាពរំលោភឈ្លានពានដោយខុសច្បាប់របស់ថៃមកលើកម្ពុជា។ ក្នុងករណីដែលការតវ៉ាតាមការទូតមិនអាចបញ្ឈប់សកម្មភាពរបស់ថៃ តើកម្ពុជាគួរពិចារណាប្រើយន្តការអន្តរជាតិ ឬផ្លូវច្បាប់អ្វីបន្ថែមទៀតដែរឬទេ?