Fanoharana momba ny farantsa folo sy ny Fanjakan'Andriamanitra

Jesosy Kristy dia nanao fanoharana maro momba ny Fanjakan'Andriamanitra ho avy, ary anisan'izany ny fanoharana momba ilay andriandahy nandeha nivahiny tany an-tany lavitra mba haka fahefana hanjaka, dia niverina. Inona no hevitry ny fanoharana? Inona no andrasan'ny Tompo amintsika?

« Ary raha mbola nihaino izany ny olona, dia nandroso niteny ihany Jesosy ka nanao fanoharana, satria efa akaiky an'i Jerosalema Izy, ka nataon'ny olona fa hiseho faingana ny fanjakan'Andriamanitra. » (Lioka 19:11)

« Dia hoy Izy: Nisy andriandahy anankiray nandeha nankany an-tany lavitra mba handray fahefana hanjaka, dia hiverina. » (Lioka 19:12)

« Dia niantso folo lahy tamin'ny mpanompony izy ary nanome azy farantsa* folo ka nanao taminy hoe: Mandrantoa mandra-pihaviko. [*Gr. mina = drakma = tokony ho farantsa 15] » (Lioka 19:13)

« Fa ny vahoakany* nankahala azy, dia nampitondra reny nanaraka azy nanao hoe: Tsy manaiky hanjakan'iny lehilahy iny izahay.[*Na: vahoaka namany] » (Lioka 19:14)

« Ary nony tafaverina izy, rehefa nandray fahefana hanjaka, dia nasainy nantsoina hankeo aminy izany mpanompo nomeny ny vola izany mba hahitany izay azony tamin'ny fandrantoana. » (Lioka 19:15)

« Dia tonga ny voalohany ka nanao hoe: Tompoko, ny farantsanao iray efa nahazoana tombony farantsa folo. » (Lioka 19:16)

« Ary hoy izy taminy: Tsara izany, ry mpanompo tsara; satria nahatoky tamin'ny kely indrindra ianao, dia manapaha tanàna folo. » (Lioka 19:17)

« Dia tonga ny anankiray koa ka nanao hoe: Tompoko, ny farantsanao iray efa tonga farantsa dimy. » (Lioka 19:18)

« Ary hoy koa izy tamin'io: Manapaha tanàna dimy koa ianao. » (Lioka 19:19)

« Fa tonga kosa ny anankiray ka nanao hoe: Tompoko, indry ny farantsanao, izay notehiriziko voafono amin'ny mosara. » (Lioka 19:20)

« Fa natahotra anao aho, satria olona mila voatsiary ianao ka maka izay tsy napetrakao, ary mijinja izay tsy nafafinao. » (Lioka 19:21)

« Ary hoy ny tompony taminy: Ny vavanao no hitsarako anao, ry mpanompo ratsy fanahy: fantatrao fa izaho dia olona mila voatsiary ka maka izay tsy napetrako, ary mijinja izay tsy nafafiko; » (Lioka 19:22)

« koa nahoana no tsy napetrakao tamin'ny mpanana vola ny volako, ka rehefa tonga aho, dia ho nandray ny ahy mban-janany? » (Lioka 19:23)

« Ary hoy izy tamin'izay nitsangana teo anilany: Alao ny farantsa eny aminy, ka omeo ilay manana farantsa folo » (Lioka 19:24)

« (Fa hoy ireo taminy: Tompoko, efa manana farantsa folo izy.) » (Lioka 19:25)

« Lazaiko aminareo: Izay rehetra manana dia homena; fa ny amin'izay tsy manana, na dia izay ananany aza dia halaina aminy. » (Lioka 19:26)

« Fa ireo fahavaloko tsy nanaiky hanjakako ireo, dia ento aty , ka vonoy eto anatrehako. » (Lioka 19:27)