[1] Dambuwaꞌ ellew laꞌi si Isa nengge-nengge si higad lamew Gennesaret. Meꞌ aꞌahin maglaray pī si iye pakale si lapal Tuhanin.
[2] Niyaꞌ kite si Isa duwe bangkaꞌ si higad lamew saguwaꞌ gaꞌ laꞌi dem bangkaꞌ meꞌ aꞌa magkennahin. Laꞌi siye ngosoꞌan meꞌ pokotden.
[3] Dambuwaꞌin bangkaꞌ si Simon. Pasakey si Isa laꞌi duk daꞌakne pu si Simon sinawunsungan kuweꞌahat amban tapiyan. Manjari ningkoloꞌ iye duk inusihatan ne paꞌin weꞌ ne meꞌ aꞌahin amban dem bangkaꞌin.
[4] Pagubus ne iye magusihat, paꞌinne pu si Simon, “Musey kew duk meꞌ saweꞌnun pī si kalaleman duk teppadanun bi meꞌ pokotbin duk kaꞌam makaꞌeddoꞌ kenna.”
[5] Nambung si Simon, paꞌinne, “Tuwan, kellawan kami magtuyuꞌ saguwaꞌ gaꞌ niyaꞌ taꞌeddoꞌ kami. Saguwaꞌ peggeꞌ paꞌinnu ne, teppadan kami saꞌ.”
[6] Pagubus teppadande meꞌ pokotin, ekka teꞌed kenna taꞌeddoꞌde hangkan agen-agen garet pokotden.
[7] Kinawey weꞌ de meꞌ saweꞌde si bangkaꞌ seddilihin dinaꞌak pī nabangan siye ngonot. Hap pī ne siye duk pinaꞌisi weꞌ de meꞌ kennahin magdem bangkaꞌ. Pennoꞌ kaduwe bangkaꞌin weꞌ kenna hangkan agen-agen palenneb.
[8] Pagkite si Simon Petros kenna mabanes inin, pasujud iye si antag bettis si Isa duk paꞌinne, “O Tuwan, patala kew amban aku peggeꞌ aku inin dusehan.”
[9] Peggeꞌ ulaliꞌ teꞌed iye duk meꞌ saweꞌnen sabab ekka kenna taꞌeddoꞌden.
[10] Ulaliꞌ du isab meꞌ saweꞌ si Simon magkennahin, disi Yakub duk Yahiya, meꞌ anak si Sebedehin. Manjari paꞌin si Isa pu si Simon, “Daꞌa kew tinalew. Tinagnaꞌan kuweꞌitu bahannun mageddoꞌ-eddoꞌ aꞌa pinatuhut si aku.”
[11] Pinatakas weꞌ de meꞌ bangkaꞌden pī si tapiyan, ubus inambanan weꞌ de meꞌ kēmonden duk nuhut ne siye si Isa.
[12] Dambuwaꞌ ellew sābu si Isa laꞌi si dambuwaꞌ puweblo, niyaꞌ aꞌa laꞌi lapat weꞌ ipul barannen. Pagkite aꞌahin si Isa, pasujud iye muyuꞌ-muyuꞌ, paꞌinne, “O Tuwan, bang kew mabayaꞌ, tapakawuliꞌnu ku.”
[13] Pinasōng weꞌ si Isa tangannen duk inantan weꞌ ne aꞌa inipulin duk paꞌinne, “Asal mabayaꞌ ku. Kawuliꞌan ne kew.” Magtawus ipulnen tahalaꞌ.
[14] Duk sinessaꞌan teꞌed iye weꞌ si Isa, paꞌinne, “Daꞌa kew magaka-aka bisan pu sine. Saguwaꞌ pī kew pakitehanun barannun si imamin duk magkuluban kew sa pangandaꞌakan si Musahin, hinang tandaꞌ si meꞌ aꞌahin weꞌ asal kawuliꞌan ne kew.”
[15] Saguwaꞌ magkasōng bawag aka-aka sabab si Isahin, hangkan banes teꞌed aꞌa patipun pī si iye pakale si meꞌ panoloꞌnen duk makipakawuliꞌ meꞌ sakiden.
[16] Saguwaꞌ bang patekka tahalaꞌ si Isa hap pī si antag gaꞌi tantu papīhan aꞌa, duk missā iye laꞌi si Tuhan.
[17] Dambuwaꞌ ellew sasang si Isa magtoloꞌ, niyaꞌ meꞌ Pariseo duk meꞌ guru si saraꞌ āgama Yahudi magtingkoloꞌ laꞌi si bihingne. Meꞌ aꞌa inin amban puweblo Awrusalam duk amban meꞌ kalumaꞌan si lahat Jalil duk Yahudiya. Laꞌi balakat Tuhanin pu si Isa hangkan tapakawuliꞌne meꞌ masakihin.
[18] Manjari niyaꞌ tekka pī meꞌ aꞌa moꞌo lella saki, matey barannen. Miha siye lān supaya iye taboꞌode padiyalem duk tabettadde si antag si Isa.
[19] Saguwaꞌ hawal ekka aꞌahin gaꞌ niyaꞌ palānande hangkan manaꞌik siye pī diyataꞌ sapew lumaꞌ madatagin duk ilarakan weꞌ de sapewin. Ubus pinatuntun weꞌ de aꞌa masakihin diyataꞌ pabākanne pī diyalem si tengngaꞌ meꞌ aꞌahin, si antag si Isa.
[20] Pagtakite si Isa weꞌ sandel teꞌed siye si iye, paꞌinne si aꞌa mamatey barannen, “Bagay, taꞌampun ne meꞌ dusenun.”
[21] Pagkale meꞌ guru si saraꞌ āgamahin duk meꞌ Pariseohin pinaꞌin si Isa inin, magtawus siye magtilew-tinilew, paꞌinde, “Aꞌahey inin? Missā iye kuweꞌ Tuhanin iye. Sine makaꞌampun dusehin bang dumaꞌin dambuwaꞌ-buwaꞌ Tuhan.”
[22] Kataꞌuhan si Isa bang ine pinikilden duk paꞌinne si siye, “Weꞌey kaꞌam magtilew-tilew sa iyan dem ateybi?
[23] Ine mamurahin, pinaꞌin, ‘Inampun ne dusenun,’ atawa ‘Dongaꞌ kew, bu nu ne lumengngan.’
[24] Pakoleꞌku aꞌa inin supaya kataꞌuhanbi weꞌ aku, Anak Manusiyaꞌin, taga kapatut tuꞌu si dunya ngampun meꞌ duse.” Manjari paꞌin si Isa si aꞌa mamatey barannen, “Dongaꞌ kew. Boꞌohun pabākannun bu nu ne hap lumaꞌ.”
[25] Magtawus dongaꞌ aꞌa masakihin si pagmatahande, bu ineddoꞌ weꞌ ne pabākannen, duk hap lumaꞌ iye, mudji-mudji Tuhanin.
[26] Bengngangan siye kēmon duk pinudji weꞌ de Tuhanin. Asekan talew isab siye. Magbissā-bissā siye, paꞌinde, “Asal hinangan makaꞌulaliꞌ takitete bi ellew inin!”
[27] Pagubus inin, paluwas iye amban kalumaꞌan miyaꞌan. Niyaꞌ takitene aꞌa magpāku-pāku sukey para si gubelno, ēnnen si Libi, ningkoloꞌ laꞌi si upisinane pagbayed-bayedan sukeyin. Paꞌin si Isa si iye, “Dayiꞌ kew. Nuhut kew aku.”
[28] Manjari kuwat iye duk inambanan weꞌ ne kēmonne malaꞌihin duk nuhut ne iye si Isa.
[29] Manjari magjamu-jamu disi Libi laꞌi si lumaꞌne pamahadjene si Isa. Ekka teꞌed aꞌa magpāku-pāku sukey duk meꞌ aꞌa seddili magtingkoloꞌ mangan pasumbayaꞌ si siye.
[30] Niyaꞌ meꞌ Pariseo duk meꞌ guru si saraꞌ āgama, meꞌ Pariseo du isab siye, gaꞌ siye kasulutan hangkan paꞌinde si meꞌ tindeg si Isahin, “Weꞌey kaꞌam palamud magkakanan duk meꞌ aꞌa magpāku-pāku sukeyin duk meꞌ aꞌa dusehan sinduwehin?”
[31] Si Isa manambungan siyehin, paꞌinne, “Meꞌ aꞌa saki hep hap doktolin. Bang meꞌ makoleꞌin gaꞌ niyaꞌ gunane hap doktol.
[32] Dumaꞌin ku pitu miha meꞌ aꞌa mabentelin saguwaꞌ pitu ku miha meꞌ aꞌa dusehanin, supaya pagsusunande duk lebbahande ne meꞌ duseden.”
[33] Manjari paꞌin meꞌ aꞌahin pu si Isa, “Meꞌ tindeg Yahiyahin daran magpuwase duk ngampun si Tuhan. Damikkiyan isab meꞌ tindeg meꞌ Pariseohin, bu meꞌ tindegnun luwal ne hadja siye mangan duk nginum.”
[34] Sambungan si Isa siye si dalilan. Pasaliꞌne meꞌ tindegnen si meꞌ aꞌa si pagkawinan. Paꞌinne, “Tadaꞌakbi ke meꞌ aꞌa si pagkawinanin magpuwase samantaꞌan laꞌi pe si siye pangantin lellahin? Gaꞌi!
[35] Saguwaꞌ si sinōng inin bang ineddoꞌ ne amban siye pangantin lellahin, meke ne siye muwase.”
[36] Manjari magdalilan si Isa sabab panoloꞌ matuꞌuhin duk panoloꞌnen. Paꞌinne, “Gaꞌ niyaꞌ aꞌa nganggaret badjuꞌ baꞌahu panopakne pī si badjuꞌ andang. Peggeꞌ bang sa īꞌne, garet ne mabaꞌahuhin duk gaꞌi isab patalep mabaꞌahuhin panopak semmek maꞌandangin.”
[37] Pinasaliꞌ isab weꞌ si Isa toloꞌnen si boheꞌ ubas baꞌahu inisi dem puyuꞌ kuwit kambing. Paꞌinne, “Gaꞌ niyaꞌ aꞌa ngisi boheꞌ ubas baꞌahu, mukal-mukal pe, dem puyuꞌ andang. Peggeꞌ bang sa īꞌne buslad puyuꞌin weꞌ boheꞌ ubasin. Manjari buꞌus boheꞌ ubasin duk magkaꞌat puyuꞌin.
[38] Saguwaꞌ subey inisi boheꞌ ubas baꞌahuhin dem puyuꞌ baꞌahu.
[39] Aꞌa mabiyaksa nginum boheꞌ ubas tiggel inennaꞌ-ennaꞌin, gaꞌi pihane boheꞌ ubas baꞌahuhin. Hāp koꞌ lessa boheꞌ ubas tiggel inennaꞌin.”