[1] Sulat inin amban aku, Bahiꞌ meꞌ masandel pu si Isa Almasihin. Pasampayku inin si kaꞌu, Gayus, bagayku kinalasahankun.
[2] Bagayku kinalasahankun, pāku-pākuku si Tuhan, karayaw weꞌ hāp du matekka si kaꞌuhin duk karayaw biskey du barannun peggeꞌ kataꞌuhanku weꞌ basag du sandelnun.
[3] Kēgan ku teꞌed pagtekka tuꞌu meꞌ kapungtinaꞌihante sinduwehin duk inakahan ku weꞌ de weꞌ matuyuꞌ du kew nuhut toloꞌ mabennalin. Asal kemuwe matuꞌuhin teteg kew si toloꞌ mabennalin.
[4] Gaꞌ niyaꞌ makakēg ateykun seddili amban bang takaleku weꞌ teteg du meꞌ kaꞌanakankun si toloꞌ mabennalin.
[5] Bagayku kinalasahankun, asal matuyuꞌ kew teꞌed ngahatul meꞌ kapungtinaꞌihante bi masandel pu si Isa Almasihin bisan kaꞌam gaꞌi magkinataꞌu.
[6] Bakas magaka-aka siye tuꞌu si pagtipunan meꞌ masandel pu si Isa Almasihin sabab lasanu si siyehin. Bang palabey siye balik, tabangun koꞌ siye duk siye lumanjal si palengngananden. Iye iyan makasulut Tuhanin.
[7] Peggeꞌ lumengngan siye inin magmahalayak toloꞌ Almasihin duk gaꞌ siye nayimaꞌ tabang ine-ine amban meꞌ manggaꞌi masandel pu si Isa Almasihin.
[8] Hangkan kite bi meꞌ tindeg si Isahin, subey siye tabangante bi supaya kite bi sumakup si hinangde magusihat toloꞌ mabennalin.
[9] Bakas ku maboꞌo sulat piyu si meꞌ masandel pu si Isa Almasihin, saguwaꞌ si Diyotrepes, aꞌa mabayaꞌ magnakuraꞌ si siyehin, gaꞌi bisan asipne meꞌ pinaꞌinku dem sulatkun.
[10] Hangkan bang ku piyu, paguwaꞌku du kēmon meꞌ hinangannen, meꞌ pinaꞌinne pangalimut-limutne kamihin duk meꞌ dustaꞌnen. Saguwaꞌ gaꞌi pe iye kaduhulan si meꞌ hinanganne miyaꞌan. Tinambahan pe weꞌ ne. Gaꞌi koꞌ isab pagaddatanne meꞌ kapungtinaꞌihante masandel pu si Isa Almasihin bang siye tekka luꞌu, duk saggaꞌne koꞌ meꞌ mabayaꞌ mangaddatan siyehin duk patahalaꞌne koꞌ siye amban langgal.
[11] Bagayku kinalasahankun, daꞌa batukanun addat malaꞌatin saguwaꞌ iye batukanun addat mahāpin. Sasuku maghinangan mahāpin, sukuꞌ si Tuhan iye. Sasuku maghinangan malaꞌatin, gaꞌ kataꞌuhanne Tuhanin.
[12] Kēmon aꞌahin hāp bissāden sabab Demetiri. Duk sabab meꞌ hinanganne mahāpin takite isab weꞌ toloꞌ mabennalin tinuhutnen. Padūsku naksiꞌan iye duk kataꞌuhannu du weꞌ bennal panaksiꞌkun.
[13] Ekka pe batang paꞌinku si kaꞌu saguwaꞌ gaꞌi ne sulatku.
[14] Ngase-ngase ku magkite du kite mura-mura duk kapagtampak du kite magbissā.
[15] Karayaw sanyang dem ateynun. Kēmon meꞌ bagaynun maboꞌo bissā weꞌ essebde kew. Akahanun aku bagayten bi dangan-dangan weꞌ essebku siye. Wassalam