[1] Aywa, ana nadkhul fi jineenti, ya akhti, ya aruusi ! Wa nagtaʼ sandali wa dukhkhaani al-halu ! Wa naakul asali min chamʼitah wa nachrab asiir inabi wa labani. Aakulu, ya l-rufgaan ! Acharbo wa askaro min al-hubb !
[2] Aywa, ana numt wa galbi waaʼi. Wa daahu habiibi tagga al-baab // wa gaal : «Aftahe leyi, ya akhti, ya habiibti, ya hamaamti, ya jamiilti ! Achaan al-karany khatta raasi wa chaʼari anballa !»
[3] Wa ana raddeet wa gult : «Ana salleet khalagi wa kikkeef battaan nalbasah ? Ana khassalt rijileeni wa kikkeef battaan niwassikhhum ?»
[4] Habiibi madda iidah le yaftah al-baab wa galbi gaaʼid yadrub min al-farah.
[5] Wa gammeet le naftah le habiibi wa itir saal min iideeni. Wa min asaabʼi, al-itir malat tarbaaz al-baab.
[6] Ana fataht le habiibi wa laakin habiibi gabbal wa faat wa galbi alhayyar. Maragt fattachtah wa ma ligiitah wa naadeetah wa hu ma radda leyi.
[7] Wa l-hurraas hana durdur al-madiina ligooni. Humman farachooni wa jarahooni wa chaalo laffaahti.
[8] Ya banaat Madiinat al-Khudus, nihallifkan ! Kan ligiitan habiibi, guulan leyah kadar ana miridt min katarat al-chahwa.
[9] Be chunu habiibki faat al-subyaan al-aakhariin ? Guuli leena, inti al-ajmal min al-awiin ! Be chunu habiibki faat al-subyaan al-aakhariin, lahaddi tihallifiina fi chaanah ?
[10] Habiibi jamiil wa nachiit wa bayyin fi ust al-aalaaf.
[11] Wijhah misil al-dahab al-saafi wa chaʼarah mulawlaw // wa azrag kurum misil loon al-khuraab.
[12] Uyuunah samhiin misil hamaam jamb al-waadi. Wa buyud misil khassaloohum // be laban wa gaaʼidiin fi wijih jamiil.
[13] Wa dignah misil jineene al-mazruuʼa // be riihe al-tigawwim chadar al-dukhkhaan. Wa chalaaliifah misil nuwwaar al-sitteeb wa yinaggit minhum al-itir.
[14] Wa iideenah misil isay hana dahab al-mujammal be hajar khaali. Wa jittitah misil looh hana aaj al-mujammal be yaakhuut akhdar.
[15] Wa rijileenah misil amad hana rukhaam abyad fi asaas hana dahab saafi. Hu ajmal min jibaal Lubnaan wa maʼruuf misil chadar al-arz.
[16] Khachmah halu wa jismah kulla ke mahbuub. Wa da bas, habiibi wa da bas, rafiigi. Aʼarfannah, ya banaat Madiinat al-Khudus.