[1] Wa Balʼaam gaal le Balaakh : «Abni leyi hini sabʼa madbah wa jiib leyi sabʼa tiiraan wa sabʼa kubchaan.»
[2] Wa Balaakh sawwa misil Balʼaam gaalah leyah. Wa humman al-itneen gaddamo dahiiye hana toor wa kabich fi ayyi madbah.
[3] Wa Balʼaam gaal le Balaakh : «Agiif jamb dahiiytak al-muharraga wa ana kamaan namchi hinaak. Akuun Allah yaji wa yihajji leyi wa ayyi kalaam al-yuguulah leyi ana nuguulah leek.» Wa macha fi raas al-jabal.
[4] Wa l-Rabb baan wa Balʼaam gaal leyah : «Ana baneet sabʼa madbah wa gaddamt dahiiye fi ayyi waahid toor wa kabich.»
[5] Wa Allah kallam le Balʼaam wa gaal leyah : «Gabbil amchi le Balaakh wa guul leyah al-kalaam da.»
[6] Wa Balʼaam gabbal le Balaakh wa ligiih waagif jamb dahiiytah al-muharraga wa kulla kubaaraat Muwaab waagfiin maʼaayah.
[7] Wa khalaas, bada be l-chiʼir wa gaal : «Min Araam, Balaakh malik Muwaab jaabaani wa min jibaal al-sabaah, naadaani wa gaal : ‹Taʼaal le Yaakhuub alʼanah leyi wa taʼaal ayyir Israaʼiil aduuyi.›
[8] Wa kikkeef nalʼan naadum al-Ilaah ma laʼanah ? Wa kikkeef nihaddid naadum al-Allah ma haddadah ?
[9] Wa wakit nichiifhum min raas al-hajar wa wakit niraakhibhum min raas al-jabal, ana nichiifhum chaʼab yaskun maʼzuul wa ma mahsuubiin // maʼa baagi al-umam.
[10] Zurriiyit Yaakhuub misil al-turaab. Yaatu yagdar yahsibhum ? Wa Bani Israaʼiil misil al-ramla. Yaatu yalga adadhum ? Khalli ana numuut fi moot al-saalihiin wa nintahi misil humman antaho.»
[11] Wa Balaakh gaal le Balʼaam : «Chunu al-sawweetah leyi da ? Ana naadeetak le talʼan leyi aduuyi wa daahu inta baaraktuhum khalaas !»
[12] Wa Balʼaam radda leyah wa gaal : «Ana ma nikallim al-kalaam al-Allah gaalah leyi walla ?»
[13] Wa Balaakh gaal battaan : «Taʼaal maʼaayi fi bakaan aakhar wa min hinaak, tichiif al-chaʼab da. Wa inta tichiif nussuhum bas ma kulluhum ke. Wa min al-bakaan da, alʼanhum leyi.»
[14] Wa wadda Balʼaam foog fi raas jabal al-Fisga wa da l-bakaan al-yiraakhubu minnah. Wa bana sabʼa madbah wa gaddam dahiiye hana toor wa kabich fi ayyi madbah.
[15] Wa Balʼaam gaal le Balaakh : «Agiif jamb dahiiytak al-muharraga wa ana kamaan namchi hinaak narja Allah yaji leyi.»
[16] Wa khalaas, Allah ja le Balʼaam wa kallamah. Wa gaal leyah : «Gabbil amchi le Balaakh wa guul leyah al-kalaam da.»
[17] Wa Balʼaam gabbal le Balaakh wa ligiih waagif jamb dahiiytah al-muharraga wa kulla kubaaraat Muwaab waagfiin maʼaayah. Wa Balaakh saʼalah wa gaal leyah : «Allah gaal leek chunu ?»
[18] Wa khalaas, Balʼaam bada be l-chiʼir wa gaal : «Gumm, ya Balaakh, wa asmaʼ wa khutt adaanak leyi, ya wileed Siffuur.
[19] Al-Ilaah ma misil al-insaan yakdib wa la misil Bani Adam yandam. Kulla cheyy al-yuguulah, hu yisawwiih wa yihaggig kalaamah al-yihajjiih.
[20] Ana ligiit amur nibaarik achaan hu baarakaahum khalaas. Wa battaan ana ma nagdar nisawwi cheyy aakhar.
[21] Ma fi zanib fi zurriiyit Yaakhuub wa la zulum fi Bani Israaʼiil. Allah Ilaahhum yukuun maʼaahum wa humman yahmudu // Allah malikhum.
[22] Allah maragaahum min balad Masir wa induhum gudra misil gudrat al-jaamuus.
[23] Ma fi al-yikallim be ilim al-kheeb fi zurriiyit Yaakhuub wa ma fi al-yichawwif fi Bani Israaʼiil. Wa fi wakit muwaafig, zurriiyit Yaakhuub wa Bani Israaʼiil yaʼarfu kulla cheyy // al-Allah yisawwiih.
[24] Daahu al-chaʼab gamma misil al-nimir wa wagaf misil al-duud. Ma yunuum kan ma akal seede al-hu saadaaha wa la yargud kan ma chirib damm al-seede al-hu katalaaha.»
[25] Wa Balaakh gaal le Balʼaam : «Kan ma talʼanhum da, ma tibaarikhum kula !»
[26] Wa Balʼaam radda leyah wa gaal : «Ana ma gult leek ? Ana nihajji kulla l-kalaam al-Allah yuguulah leyi.»
[27] Wa Balaakh gaal le Balʼaam : «Taʼaal niwaddiik bakaan aakhar. Akuun min al-bakaan daak al-Rabb yarda inta talʼan leyi al-chaʼab da.»
[28] Wa Balaakh wadda Balʼaam fi raas jabal Faʼuur wa min al-bakaan da, tinchaaf al-sahara.
[29] Wa Balʼaam gaal le Balaakh : «Abni leyi hini sabʼa madbah wa jiib leyi sabʼa tiiraan wa sabʼa kubchaan.»
[30] Wa Balaakh sawwa misil Balʼaam gaalah leyah wa gaddam dahiiye hana toor wa kabich fi ayyi madbah.