[1] Wa wakit Mardakaay simiʼ be kulla l-cheyy al-kaan da, charrat khulgaanah wa libis khulgaan al-hizin wa sabba rumaad fi raasah wa macha fi lubb al-hille. Wa sarakh siraakh chadiid hana wajiiʼ.
[2] Wa macha lahaddi khachum baab gasir al-malik wa wagaf hinaak achaan naadum ma yagdar yadkhul fi gasir al-malik kan laabis khulgaan al-hizin.
[3] Wa fi ayyi wulaaya al-wassal foogha kharaar al-malik wa gaanuunah, bigi hizin kabiir le l-Yahuud wa humman saamo wa bako wa naaho wa katiiriin minhum ragado fi l-chuwaalaat wa fi l-rumaad.
[4] Wa l-banaat al-khaddaamaat al-gaaʼidaat maʼa l-malika Astiir wa khaddaamiinha jo wa khabbarooha be hizin Mardakaay wa hi barjalat marra waahid. Wa hi rassalat khulgaan le Mardakaay achaan yalbashum wa yamrug minnah khulgaan al-hizin wa laakin hu aba.
[5] Wa khalaas, Astiir naadat Hataak waahid min khaddaamiin al-malik al-jaabooh achaan yakhdim leeha. Wa hi rassalatah bakaan Mardakaay achaan yiʼakkid min al-cheyy al-kaan wa bigi be sabab chunu.
[6] Wa Hataak marag wa laagaah le Mardakaay al-gaaʼid fi nagaʼat al-hille al-mugaabile khachum baab gasir al-malik.
[7] Wa Mardakaay khabbarah be kulla cheyy al-hasal leyah wa akkad leyah al-wazin hana l-fudda al-Hamaan gaal yusubbuuha fi makhazan al-malik wa da le damaar al-Yahuud.
[8] Wa antaah nuskha hana gaanuun damaar al-Yahuud al-katabooh wa ballakhooh fi madiinat Chuucha achaan yiwassifah le Astiir wa yikhabbirha. Wa talab minha tamchi tigaabil al-malik wa tachhadah achaan yihinn fi chaʼabha.
[9] Wa Hataak ja khabbaraaha le Astiir be kulla kalaam Mardakaay.
[10] Wa Astiir amarat Hataak achaan yamchi le Mardakaay wa yuguul leyah :
[11] «Kulla khaddaamiin al-malik wa chaʼab wulaayaat al-mamlaka yaʼarfu tamaam kadar ayyi naadum kan mara walla raajil kula, kan yamchi fi l-fadaay al-dakhlaaniiye hana l-malik bala munaada, fi gaanuun waahid bas al-yahkumuuh beyah wa hu gaanuun al-moot. Wa l-naadum da yiʼiich illa kan al-malik madda leyah asaatah al-dahbiiye hana l-muluk. Wa hassaʼ, ana indi 30 yoom ke al-malik ma naadaani le namchi leyah.»
[12] Wa khabbarooh le Mardakaay be kalaam Astiir.
[13] Wa Mardakaay rassal radd le Astiir wa gaal : «Ma be sabab inti gaaʼide fi gasir al-malik tuguuli inti wiheedki bas tanje min kulla l-Yahuud dool.
[14] Wa kan inti taskuti ma tuguuli cheyy fi l-wakit al-munaasib da, al-amaan wa l-naja hana l-Yahuud yaju min bakaan aakhar. Wa laakin inti wa aayilat abuuki kamaan tiddammaro. Wa yaatu yaʼarif kadar fi l-haala al-misil di bas, inti bigiiti malika ?»
[15] Wa Astiir rassalat leyah al-radd da wa gaalat :
[16] «Amchi limm kulla l-Yahuud al-gaaʼidiin fi madiinat Chuucha wa suumu fi chaani. Ma taakulu wa la tacharbo wa la be l-nahaar wa la be l-leel le muddit talaata yoom. Wa ana kula nusuum wa banaati al-khaddaamaat kula yusuuman kula misilku. Wa baʼad da, ana namchi nigaabil al-malik hatta kan da didd al-gaanuun kula. Wa kan waajib leyi al-moot, numuut.»
[17] Wa Mardakaay macha wa sawwa kulla cheyy al-Astiir amaratah beyah.