[1] Fiyah fasaala ana chiftaha fi l-ard, al-titaʼʼib Bani Adam.
[2] Al-fasaala di, hi raajil al-Rabb antaah maal wa khuna wa charaf wa cheyy gassar leyah ma fiih min al-yitmannaah. Laakin al-Rabb ma khallaah yitmattaʼ be maalah da, illa l-ajnabi bas yitmattaʼ beyah. Wa da kula zaayil saakit wa di fasaala al-tajrah al-galib.
[3] Akuun naadum wilid miya iyaal wa aach umur tawiil wa siniinah bigo katiiriin laakin ma firih be kheerah lahaddi ma ligi dafin adiil. Khalaas, ana nuguul kadar al-naadum da, sakhiir al-rumaaye kula akheer minnah !
[4] Achaan al-rumaaye taji fi wakit al-ma wakitha. Hi zaayle saakit wa tamchi fi l-dalaam wa ma fi al-yizzakkarha.
[5] Al-rumaaye ma chaafat wa la irfat cheyy fi l-ard. Wa laakin hi indaha raaha ziyaada min al-naadum da !
[6] Wa kan al-naadum da yiʼiich alif sana wa battaan alif sana aakhariin kula wa ma chaaf al-kheer, khalaas hu wa l-rumaaye di, bakaanhum yabga waahid.
[7] Ayyi khidme al-yisawwiiha al-insaan, da le iichtah bas wa laakin be da kula, hu ma yachbaʼ.
[8] Al-faayde al-yalgaaha al-hakiim // ma ziyaada min al-faayde al-yalgaaha al-matmuus. Wa l-fagri kula ma yalga faayde hatta kan yiʼaddil haalah // giddaam al-naas.
[9] Akheer tafrah be l-indak min tifakkir fi cheyy // al-ma yilhaggag. Wa da kula zaayil saakit misil al-jari wara l-riih.
[10] Kulla cheyy al-gaaʼid fi l-ard maʼruuf min zamaan wa naʼarfu chunu al-insaan. Hu ma yagdar yihaarij maʼa l-gaadir minnah.
[11] Al-kalaam kan katiir kula, zaayil saakit. Wa l-insaan, chunu al-faayde al-yalgaaha minnah ?
[12] Khalaas, yaatu al-yaʼarif al-cheyy al-adiil le l-insaan fi muddit hayaatah ? Aywa, chunu adiil fi muddit ayyaam hayaatah al-zaayle saakit misil al-dull ? Wa yaatu yikhabbir al-insaan be l-yukuun baʼadah fi l-ard ?