[1] Wa kulla chaʼab mamlakat Yahuuza chaalo Uzziiya wakit indah 16 sana wa darrajooh malik fi badal abuuh Amasya.
[2] Wa baʼad abuuh maat wa lihig abbahaatah, Uzziiya chaal hillit Ilaat wa gawwaaha wa gabbalha le mamlakat Yahuuza.
[3] Wa Uzziiya indah 16 sana wakit bigi malik wa hakam 52 sana fi Madiinat al-Khudus. Wa ammah usumha Yakulya wa hi min Madiinat al-Khudus.
[4] Wa Uzziiya sawwa al-adiil giddaam Allah misil abuuh Amasya sawwaah.
[5] Wa hu gaaʼid yitaabiʼ al-Rabb fi kulla muddit hayaat Zakariiya al-gaaʼid yiʼallimah makhaafat Allah. Wa wakit Uzziiya gaaʼid yitaabiʼ Allah, hu antaah al-najaah.
[6] Wa Uzziiya macha haarab al-Filistiyiin wa kassar daraadir mudunhum Gaat wa Yabni wa Achduud. Wa baʼad da, gawwa mudun al-fi mantagat Achduud wa fi bakaanaat aakhariin hana balad al-Filistiyiin.
[7] Wa l-Rabb fazaʼah wakit haarab al-Filistiyiin wa l-Arab al-saakniin fi hillit Guur Baʼal wa l-Maʼuuniyiin.
[8] Wa l-Maʼuuniyiin anto hadaaya le Uzziiya. Wa usmah bigi taaliʼ wa simʼo beyah lahaddi huduud Masir achaan hu bigi chadiid marra waahid.
[9] Wa fi Madiinat al-Khudus be foog le baab al-Rukun wa be foog le baab al-Waadi wa fi l-bakaan al-durdur yilimm fi l-rukun, Uzziiya bana buyuut al-muraakhaba wa gawwaahum
[10] Wa bana buyuut al-muraakhaba fi l-sahara wa nakat biyaar katiiriin achaan hu indah bahaayim katiiriin al-gaaʼidiin fi sahalat Chafiila wa fi suhuul aakhariin. Wa hu indah harraatiin al-inab fi raas jabal al-Karmal achaan hu yihibb al-hiraate.
[11] Wa Uzziiya indah deech chadiid wa jaahiz le l-harib. Wa l-deech da mugassam ale majmuuʼaat hasab al-hisaab al-sawwaah al-kaatib Yaʼiyiil wa l-mukallaf Maʼasiiya wa da fi tihit muraakhabat Hananya waahid min masaaʼiil al-malik.
[12] Wa kulla chuyuukh al-aayilat wa l-rujaal al-furraas adadhum 2 600.
[13] Wa tihit amurhum induhum deech hana 307 500 askar chudaad al-yihaarubu be gudra wa chajaaʼa achaan yidaafuʼu le l-malik min udwaanah.
[14] Wa wakit yamurgu le l-duwaas, Uzziiya yijahhiz leehum darag wa huraab wa tawaagi min nahaas wa direʼ wa nachaachiib wa hujaar le l-miglaaʼ.
[15] Wa fi Madiinat al-Khudus, Uzziiya sawwa makanaat hana harib wa da be fikir hana sinaaʼi maʼruuf. Wa yukhuttu al-makanaat dool fi buyuut al-muraakhaba wa fi arkaan al-durdur achaan be l-makanaat dool yizarrugu nachaachiib wa hujaar kubaar. Wa usum Uzziiya bigi taaliʼ achaan ligi musaaʼada ajiibe lahaddi bigi chadiid fi hukmah.
[16] Wa laakin wakit Uzziiya bigi chadiid, hu bada yistakbar lahaddi isi Allah Ilaahah wa jaab al-damaar le nafsah. Hu dakhal fi beet Allah wa harrag bakhuur fi mukhbar al-bakhuur.
[17] Wa Azarya kabiir rujaal al-diin dakhal waraayah maʼa 80 rujaal diin hana Allah fahaliin.
[18] Wa humman gammo didd al-malik Uzziiya wa gaalo leyah : «Ya Uzziiya, ma indak hagg tahrig al-bakhuur fi beet Allah. Di khidmit rujaal al-diin min zurriiyit Haaruun al-khassasoohum le yiharrugu al-bakhuur. Yalla amrug min al-beet al-mukhaddas da achaan inta isiit Allah ! Wa khidimtak di ma tijiib leek charaf giddaam Allah al-Rabb.»
[19] Wa Uzziiya indah fi iidah al-mukhbar al-yiharrugu foogah al-bakhuur. Wa hu ziʼil min rujaal al-diin. Wa tawwaali wakit hu gaaʼid giddaam rujaal al-diin fi beet Allah jamb mukhbar al-bakhuur, al-jidaam marag fi jabhitah.
[20] Wakit Azarya kabiir rujaal al-diin wa kulla rujaal al-diin al-aakhariin anlafato aleyah wa chaafo al-jidaam fi jabhitah, tawwaali maragooh min al-bakaan da. Hu zaatah assaʼjal le yamrug achaan Allah nazzal foogah al-marad da.
[21] Wa Uzziiya gaʼad mujaddim lahaddi mootah. Wa hu sakan fi beet wiheedah taraf wa ma waajib leyah yadkhul fi beet Allah. Wa Yuutaam wileedah bigi masʼuul fi l-gasir wa hakam fi chaʼab al-balad.
[22] Wa l-baagi min amal Uzziiya min al-bidaaya le l-nihaaya katabah al-nabi Ichaʼya wileed Ammuus.
[23] Wa Uzziiya maat wa lihig abbahaatah wa dafanooh jamb khabur juduudah fi ard hana khabur al-muluuk achaan hu mujaddim. Wa wileedah Yuutaam hakam fi badalah.