[1] الْغِنَيْ الْعَظِيمْ هَنَا الْمَلِكْ سُلَيْمَانْ.
[2] حِبِّنِي! مِنْ فَضْلَكْ، حِبِّنِي! أَشَانْ حُبَّكْ حَلُو // مِنْ عَصِيرْ الْعِنَبْ.
[3] عِطْرَكْ يِنْشَمَّ حَلُو وَ أُسْمَكْ شَتَّتْ مِثِلْ رِيحَةْ الْعِطِرْ. فِي شَانْ دَا، الْبَنَاتْ بِحِبَّنَّكْ.
[4] شِيلْنِي مَعَاكْ. يَلَّا نَجْرُوا! يَا مَلِكِي، وَدِّينِي فِي غُرْفِتَكْ وَ هِنَاكْ، نَلْعَبَوْا وَ نَفْرَحَوْا سَوَا. وَ نِذَّكَّرَوْا حُبَّكْ الْحَلُو // مِنْ عَصِيرْ الْعِنَبْ. الْبِحِبَّنَّكْ عِنْدِهِنْ حَقّ!
[5] يَا بَنَاتْ مَدِينَةْ الْقُدُسْ، أَنَا سَمْرَةْ وَ لَاكِنْ جَمِيلَةْ، زَرْقَةْ مِثِلْ خِيَمْ السَّيَّارَةْ وَ جَمِيلَةْ مِثِلْ سِتَارَةْ // بَيْت سُلَيْمَانْ.
[6] مَا تِشِيفَنِّي أَشَانْ أَنَا سَمْرَةْ. دِي الْحَرَّايْ بَسْ قَلَبَتْ لَوْنِي. أَوْلَادْ أَمِّي زِعِلَوْا ضِدِّي وَ سَوَّوْنِي حَارِسَةْ جِنَيْنَةْ عِنَبْ. وَ لَاكِنْ جِسْمِي الْمِثِلْ جِنَيْنِتِي، أَنَا مَا حَرَسْتَهْ.
[7] قُولْ لَيِّ، إِنْتَ الْأَنَا نِحِبَّكْ، وَيْن تِسَرِّحْ غَنَمَكْ؟ وَيْن بَكَانْ تِقَيِّلْ فَوْقَهْ؟ وَصِّفْنِي أَشَانْ مَا نِفَتِّشْ وَ نُرُوحْ وَ نَقَعْ فِي دِيرَانْ جِيرَانَكْ.
[8] مَا تَعَرْفِيهْ، إِنْتِ الْأَجْمَلْ مِنْ الْعَوِينْ؟ تَابْعِي دَرِبْ غَنَمَهْ وَ أَسْرَحَيْ بِعِنْزَيْكِ جَنْب ضَرَا أَنِحْنَ الرُّعْيَانْ.
[9] يَا حَبِيبْتِي، إِنْتِ مِثِلْ فَرَسْ عَرَبَةْ فِرْعَوْن مَلِكْ مَصِرْ.
[10] خُدُودْكِ جَمِيلِينْ أَمْبَيْنَاتْ خُرُوسْكِ وَ رَقَبَتْكِ سَمْحَةْ فِي أُسُطْ رِبِقْ زَيْتُونْكِ.
[11] نِسَوُّوا لَيْكِ خُرُوس هَنَا دَهَبْ وَ زِينَةْ هِنْت فُضَّةْ.
[12] وَكِتْ مَلِكِي قَاعِدْ فِي أُسُطْ رُفْقَانَهْ، رِيحَةْ عِطْرِي أَنْشَمَّتْ.
[13] حَبِيبِي مِثِلْ بَلْعُومِي هَنَا صَنْدَلْ // الْمُعَلَّقْ فِي رَقَبَتِي وَ يَرْقُدْ فِي صَدْرِي بِاللَّيْل.
[14] حَبِيبِي مِثِلْ نُوَّارْ الْحِنَّةْ فِي جِنَيْنَةْ عِنَبْ فِي عَيْن جِدِي.
[15] إِنْتِ جَمِيلَةْ، يَا حَبِيبْتِي. أَيْوَى، إِنْتِ جَمِيلَةْ وَ عُيُونْكِ سَمْحِينْ مِثِلْ الْحَمَامْ.
[16] إِنْتَ جَمِيلْ، يَا حَبِيبِي. إِنْتَ كُلَ حَلُو. وَ نَرُقْدُوا فِي قَوْزنَا الْأَخْضَرْ.
[17] نَرُقْدُوا تِحِتْ شَدَرْ الْأَرْز // مِثِلْ شِعَبْ بَيْتنَا وَ تِحِتْ فُرُوعْ السَّرْوِي // مِثِلْ عَمَدَهْ.