[1] «أَيْوَى، أَكِيدْ فِي أَيَّامْ الْوَكِتْ دَا، أَنَا نِقَبِّلْ نَاسْ بَلَدْ يَهُوذَا وَ مَدِينَةْ الْقُدُسْ مِنْ الْغُرْبَةْ.
[2] وَ نِلِمّ كُلَّ الْأُمَمْ وَ نِوَدِّيهُمْ فِي الْوَادِي // الْأُسْمَهْ يَهُوشَفَطْ (مَعَنَاتَهْ اللّٰهْ يِحَاكِمْ). وَ فِي الْبَكَانْ دَا، نِحَاكِمْهُمْ فِي شَانْ كُلَّ شَيّءْ السَّوَّوْه لِبَنِي إِسْرَائِيلْ، شَعَبِي الْمِثِلْ وَرَثَتِي. أَشَانْ شَتَّتَوْهُمْ فِي لُبّ الْأُمَمْ وَ أَلْقَاسَمَوْا بَلَدِي أَمْبَيْنَاتْهُمْ.
[3] هُمَّنْ أَلْقَاسَمَوْا شَعَبِي بِأَمْ عِيَيْدَاتْ وَ بَاعَوْا الْأَوْلَادْ لِيِكَفُّوا الْعَزَبَاتْ وَ بَاعَوْا الْبَنَاتْ لِيَشَرْبَوْا خَمَرْ.
[4] «وَ إِنْتُو كُلَ، يَا صُورْ وَ صَيْدَا وَ كُلَّ مُدِيرِيَّاتْ الْفِلِسْطِيِّينْ. تِدَوْرُوا مِنِّي شُنُو؟ تِدَوْرُوا تِلْكَفَّوْا فَوْقِي التَّارْ وَلَّا؟ كَنْ تِلْكَفَّوْا فَوْقِي التَّارْ، نُقُمّ بِسُرْعَةْ ضِدُّكُو وَ نِقَبِّلْ تَارْكُو فِي رَاسْكُو.
[5] إِنْتُو شِلْتُوا فُضِّتِي وَ دَهَبِي وَ كَنْزِي الْغَالِي ضَمَّيْتُوهْ // فِي قُصُورْكُو.
[6] وَ إِنْتُو بِعْتُوا نَاسْ يَهُوذَا وَ مَدِينَةْ الْقُدُسْ لِلْيُونَانِيِّينْ أَشَانْ تِبَعُّدُوهُمْ مِنْ بَلَدْهُمْ.
[7] وَ لَاكِنْ دَاهُو أَنَا نِنَادِيهُمْ مِنْ الْبَكَانْ الْبِعْتُوهُمْ فَوْقَهْ وَ أَنَا نِقَبِّلْ تَارْكُو فِي رَاسْكُو.
[8] وَ أَنَا نِبِيعْ أَوْلَادْكُو وَ بَنَاتْكُو لِبَنِي يَهُوذَا وَ هُمَّنْ يِبِيعُوهُمْ لِنَاسْ بَلَدْ سَبَأ الْهُمَّنْ أُمَّةْ بَعِيدَةْ.» أَيْوَى، دَا كَلَامْ اللّٰهْ الْهُو قَالَهْ.
[9] بَلُّغُوا لِلْأُمَمْ وَ قُولُوا: «خَصُّصُوا دَيْش لِلْحَرِبْ وَ قَوُّمُوا الْفُرَّاسْ. خَلِّي كُلَّ الرُّجَالْ الْمُحَارِبِينْ يِنْضَمَّوْا وَ يَمْشُوا.
[10] وَ جَرَارِيكُو دُقُّوهُمْ سُيُوفْ وَ خَنَاجِرْكُو دُقُّوهُمْ حُرَابْ. وَ الضَّعِيفْ، خَلِّي يُقُولْ: ‹أَنَا بِقِيتْ فَارِسْ!›
[11] تَعَالُوا عَجَلَةْ، يَا كُلَّ الْأُمَمْ الْمُجَاوِرِينْ. لِمُّوا هِنِي.» يَا اللّٰهْ! إِنْتَ كُلَ نَادِي فُرَّاسَكْ!
[12] وَ اللّٰهْ قَالْ: «خَلِّي الْأُمَمْ يُقُمُّوا وَ يَمْشُوا عَلَيْ وَادِي يَهُوشَفَطْ. أَشَانْ هِنَاكْ أَنَا نِحَاكِمْ كُلَّ الْأُمَمْ الْمُجَاوِرِينْ.
[13] مِدُّوا خَنَاجِرْكُو وَ أَقْطَعَوْهُمْ مِثِلْ الْحَرَّاتِي يَقْطَعْ إِنْتَاجَهْ // فِي وَكْت الْقَطِعْ. فَجُّقُوهُمْ مِثِلْ نَاسْ الْيِفَجُّقُوا الْعِنَبْ وَكِتْ الْعَصَّارَةْ أَنْمَلَتْ. أَيْوَى، فَسَالِتْهُمْ كَتِيرَةْ مِثِلْ مَوَاعِينْ مَلَانِينْ // بِعَصِيرْ الْعِنَبْ.»
[14] دَاهُو آلَافْ النَّاسْ، كَتِيرِينْ مَرَّةْ وَاحِدْ // فِي وَادِي الْقَرَارْ. يَوْم اللّٰهْ قَرَّبْ فِي وَادِي الْقَرَارْ.
[15] الْحَرَّايْ وَ الْقَمَرْ يِضَلُّمُوا وَ النُّجُومْ يِوَدُّرُوا نُورْهُمْ.
[16] مِنْ صَهْيُون، اللّٰهْ يَهْرِجْ وَ مِنْ مَدِينَةْ الْقُدُسْ حِسَّهْ يِنْسَمِعْ وَ السَّمَاءْ وَ الْأَرْض يَرْجُفُوا. وَ لَاكِنْ اللّٰهْ هُو مَلْجَأْ لِشَعَبَهْ وَ مَسْكَنْ قَوِي لِبَنِي إِسْرَائِيلْ.
[17] «وَ بَيْدَا، إِنْتُو تَعَرْفُوا كَدَرْ أَنَا بَسْ اللّٰهْ إِلٰـهْكُو الْقَاعِدْ فِي صَهْيُون جَبَلِي الْمُقَدَّسْ. مَدِينَةْ الْقُدُسْ تَبْقَى بَكَانْ مُقَدَّسْ وَ بَتَّانْ أَجَانِبْ مَا يَدْخُلُوا فَوْقهَا.»
[18] «فِي الْيَوْم دَا، عَصِيرْ الْعِنَبْ يِنَقِّطْ // مِنْ الْجِبَالْ وَ لَبَنْ يِسِيلْ مِنْ الْحُجَارْ وَ أَلْمِي يَجْرِي فِي كُلَّ وُدْيَانْ يَهُوذَا. وَ عَيْن أَلْمِي تِسِيلْ مِنْ بَيْت اللّٰهْ وَ تُصُبّ فِي وَادِي شِطِّيمْ.
[19] وَ مَصِرْ تَبْقَى خَرَابْ وَ أَدَوْم تَبْقَى صَحَرَاءْ خَرَابْ بِسَبَبْ الْعُنُفْ السَّوَّوْه // لِبَنِي يَهُوذَا وَكِتْ دَفَّقَوْا دَمّ الْبَرِي // فِي أَرْضُهُمْ.
[20] وَ لَاكِنْ يَهُوذَا يَسْكُنُوهَا // إِلَى الْأَبَدْ وَ مَدِينَةْ الْقُدُسْ يَسْكُنُوهَا // مِنْ ذُرِّيَّةْ لِذُرِّيَّةْ.
[21] أَيْوَى، أَنَا نَجْعَلْهُمْ بَرِيِّينْ مِثِلْ أَوَّلْ جَعَلْتُهُمْ مَا بَرِيِّينْ. وَ أَنَا اللّٰهْ نَسْكُنْ فِي صَهْيُون!»