[1] وَ دَاهُو اللّٰهْ قَالْ: «أَحْفَضَوْا الْحَقّ وَ سَوُّوا الْعَدَالَةْ أَشَانْ نَجَاتِي قَرِيبْ تَجِي وَ عَدَالْتِي قَرِيبْ تِبِينْ.
[2] مَبْرُوكْ لِلنَّادُمْ // الْيِطَبِّقْ كَلَامِي وَ لِلْإِنْسَانْ الْيَكُرْبَهْ قَوِي وَ يَحْفَضْ السَّبْت وَ يِحْتَرِمَهْ وَ إِيدَهْ مَا تِسَوِّي أَيِّ فَسَالَةْ.
[3] وَ خَلِّي الْأَجْنَبِي الْمُنْرَبِطْ فِي اللّٰهْ مَا يُقُولْ: ‹أَكِيدْ اللّٰهْ يَفْصُلْنِي مِنْ شَعَبَهْ!› وَ خَلِّي الْخَصِي مَا يُقُولْ: ‹دَاهُو أَنَا بِقِيتْ // مِثِلْ شَدَرَةْ يَابْسَةْ!›»
[4] أَشَانْ دَاهُو اللّٰهْ قَالْ: «فِي خَصِيِينْ وَاحِدِينْ يَحْفَضَوْا يَوْمِي هَنَا السَّبْت وَ يِسَوُّوا الْأَنَا نِدَوْرَهْ وَ يَقْعُدُوا ثَابْتِينْ فِي مُعَاهَدَتِي.
[5] هُمَّنْ دَوْل، أَنَا نَنْطِيهُمْ فِي بَيْتِي وَ فِي دَرَادِرِي عَلَامَةْ هَنَا ذِكْرَةْ أَحْسَنْ مِنْ الْوُلَادْ وَ الْبَنَاتْ. وَ نَنْطِيهُمْ أُسُمْ دَايِمْ الْأَبَداً مَا يِنْقَشَّ.
[6] فِي أَجَانِبْ وَاحِدِينْ أَنْرَبَطَوْا فِي اللّٰهْ لِيَخْدُمُوا لَيَّهْ وَ لِيِحِبُّوا أُسُمْ اللّٰهْ وَ لِيَبْقَوْا عَبِيدَهْ. هُمَّنْ يَحْفَضَوْا السَّبْت وَ يِحْتَرُمُوا وَ يَقْعُدُوا ثَابْتِينْ فِي مُعَاهَدَتِي.
[7] النَّاسْ دَوْل، أَنَا نِوَدِّيهُمْ // فِي جَبَلِي الْمُقَدَّسْ وَ نِفَرِّحْهُمْ فِي بَيْتِي، // بَيْت الصَّلَاةْ. وَ نَرْضَى بِضَحَايَاهُمْ الْمُحَرَّقِينْ وَ ضَحَايَاهُمْ الْآخَرِينْ الْهُمَّنْ يِقَدُّمُوهُمْ // فِي مَدْبَحِي. أَشَانْ بَيْتِي يِسَمُّوهْ بَيْت الصَّلَاةْ لِكُلَّ الشُّعُوبْ.»
[8] وَ دَاهُو كَلَامْ اللّٰهْ الرَّبّ، هُو الْيِلِمّ مُشَتَّتِينْ بَنِي إِسْرَائِيلْ. هُو قَالْ: «أَنَا نِلِمّ بَتَّانْ آخَرِينْ مَعَ اللَّمَّيْتهُمْ.»
[9] إِنْتُو كُلُّكُو حَيْوَانَاتْ الْكَدَادَةْ! أَيْوَى، إِنْتُو كُلُّكُو حَيْوَانَاتْ الْغَابَةْ! تَعَالُوا آكُلُوا!
[10] مُرَاقِبِينْ بَنِي إِسْرَائِيلْ، كُلُّهُمْ عَمْيَانِينْ وَ مَا يَعَرْفُوا شَيّءْ. هُمَّنْ مِثِلْ كُلابْ بُكُمْ مَا يَقْدَرَوْا يَنْبَحَوْا. يَحْلَمَوْا رَاقْدِينْ وَ يِحِبُّوا النَّوْم.
[11] هُمَّنْ مِثِلْ كُلابْ أَكَّالِينْ الْمَا يَعَرْفُوا الشَّبَعْ. وَ هُمَّنْ رُعْيَانْ الْمَا يَعَرْفُوا شَيّءْ. أَيِّ وَاحِدْ شَايِلْ دَرْبَهْ وَ يِفَتِّشْ فَايْدِتَهْ // بِكُلَّ نِيّتَهْ.
[12] وَ يُقُولْ: «تَعَالُوا! خَلِّي نِشِيلْ مَرِيسَةْ وَ نَسْكَرَوْا بِالْخَمَرْ الشَّدِيدْ! أَمْبَاكِرْ نِسَوُّوا نَفْس الشَّيّءْ أَشَانْ يِفَضِّلْ لَيْنَا كَتِيرْ!»