[1] وَ وَكِتْ حِيرَامْ مَلِكْ بَلَدْ صُورْ سِمِعْ كَدَرْ سُلَيْمَانْ مَسَحَوْه وَ دَرَّجَوْه مَلِكْ فِي قَدّ أَبُوهْ، رَسَّلْ مَسَائِيلَهْ لِسُلَيْمَانْ أَشَانْ حِيرَامْ كَانْ رَفِيقَهْ لِدَاوُدْ فِي كُلَّ مُدَّةْ حَيَاتَهْ.
[2] وَ سُلَيْمَانْ رَسَّلْ لِحِيرَامْ وَ قَالْ:
[3] «إِنْتَ تَعَرِفْ كَدَرْ أَبُويِ دَاوُدْ مَا قِدِرْ بَنَى بَيْت لِلّٰهْ إِلٰـهَهْ أَشَانْ عُدْوَانَهْ حَارَبَوْه مِنْ أَيِّ جِيهَةْ لَحَدِّي اللّٰهْ خَطَّاهُمْ تِحِتْ رِجِلَيْنَهْ.
[4] وَ لَاكِنْ هَسَّعْ، اللّٰهْ إِلٰـهِي جَابْ لَيِّ السَّلَامَةْ مِنْ أَيِّ جِيهَةْ وَ مَا فِي عَدُو وَ لَا ضِيقَةْ.
[5] وَ دَاهُو أَنَا عِنْدِي نِيَّةْ لِنَبْنِي بَيْت لِلّٰهْ إِلٰـهِي. وَ دَا مِثِلْ اللّٰهْ قَالَهْ لِأَبُويِ دَاوُدْ، هُو قَالْ: ‹أَنَا نِدَرِّجْ وِلَيْدَكْ مَلِكْ فِي قَدَّكْ وَ هُو بَسْ الْيَبْنِي بَيْت لِأُسْمِي.›
[6] وَ هَسَّعْ دَا، أَنْطِي أَمُرْ لِنَاسَكْ يَقْطَعَوْا لَيِّ حَطَبْ الْأَرْز هَنَا لُبْنَانْ. وَ خَدَّامِينَكْ يَخْدُمُوا مَعَ خَدَّامِينِي وَ أَنَا نِكَفِّيكْ أُجْرَةْ خَدَّامِينَكْ حَسَبْ إِنْتَ تُقُولَهْ. أَشَانْ إِنْتَ تَعَرِفْ تَمَامْ كَدَرْ مَا فِي نَادُمْ مِنِّنَا الْيَعَرِفْ يَقْطَعْ الشَّدَرْ مِثِلْ نَاسَكْ مِنْ بَلَدْ صَيْدَا.»
[7] وَ وَكِتْ حِيرَامْ سِمِعْ كَلَامْ سُلَيْمَانْ دَا، فِرِحْ فَرْحَةْ شَدِيدَةْ وَ قَالْ: «بَارَكْ اللّٰهْ الْأَنْطَاهْ الْيَوْم لِدَاوُدْ وِلَيْد حَكِيمْ لِيَحْكِمْ فِي الشَّعَبْ الْكَتِيرِينْ دَوْل.»
[8] وَ حِيرَامْ رَسَّلْ لِسُلَيْمَانْ وَ قَالْ: «أَنَا سِمِعْت كَلَامْ مُرْسَالَكْ وَ خَلَاصْ نَنْطِيكْ كُلَّ الدَّوَّرْتَهْ مِنْ حَطَبْ الْأَرْز وَ حَطَبْ السَّرْوِي.
[9] وَ خَدَّامِينِي يَنْقُلُوا حَطَبْ الْأَرْز مِنْ لُبْنَانْ لَحَدِّي خَشُمْ الْبَحَرْ الْأَبْيَضْ. وَ هِنَاكْ، يِلِمُّوا الْحَطَبْ دَا وَ يَرْبُطُوهْ وَ يِعَوُّمُوهْ فِي الْبَحَرْ لَحَدِّي فِي الْبَكَانْ الْإِنْتَ تِوَصِّفَهْ لَيِّ. وَ فِي الْبَكَانْ دَا، نَاسِي يِفَرْتُقُوا الْحُبَالْ وَ إِنْتَ تِشِيلَهْ. وَ إِنْتَ كَمَانْ سَوِّي لَيِّ الشَّيّءْ النِّدَوْرَهْ وَ أَنْطِي أَكِلْ لِنَاسْ بَيْتِي.»
[10] وَ بِمِثِلْ دَا، حِيرَامْ أَنْطَى سُلَيْمَانْ حَطَبْ الْأَرْز وَ حَطَبْ السَّرْوِي مِثِلْ هُو دَوَّرَهْ.
[11] وَ كُلِّ سَنَةْ، سُلَيْمَانْ يَنْطِي أَكِلْ لِحِيرَامْ مِثِلْ 50 000 شُوَالْ هَنَا قَمَحْ وَ إِتْنَيْن بِرْمِيلْ هَنَا دِهِنْ زَيْتُونْ صَافِي.
[12] وَ اللّٰهْ أَنْطَاهْ حِكْمَةْ لِسُلَيْمَانْ مِثِلْ هُو قَالَهْ لَيَّهْ. وَ الْعَلَاقَةْ بِقَتْ سَمْحَةْ بَيْن حِيرَامْ وَ سُلَيْمَانْ. وَ بَيْدَا، هُمَّنْ سَوَّوْا مُعَاهَدَةْ أَمْبَيْنَاتْهُمْ.
[13] وَ الْمَلِكْ سُلَيْمَانْ نَظَّمْ خِدْمَةْ إِجْبَارِيَّةْ وَ شَالْ فَوْقهَا 30 000 رَاجِلْ مِنْ كُلَّ بَنِي إِسْرَائِيلْ.
[14] وَ الرُّجَالْ دَوْل يَخْدُمُوا أَمْ كَابَةْ. وَ فِي أَيِّ شَهَرْ، يِرَسِّلْ 10 000 رَاجِلْ يَمْشُوا لُبْنَانْ لِيَخْدُمُوا شَهَرْ. وَ بَعَدْ دَا، يِقَبُّلُوا يِنْجَمَّوْا شَهَرَيْن فِي بُيُوتْهُمْ. وَ الْمُرَاقِبْ فِي الْخِدْمَةْ دِي، هُو أَدُنِرَامْ.
[15] وَ سُلَيْمَانْ عِنْدَهْ بَتَّانْ 70 000 نَقَّالِينْ وَ 80 000 نَاسْ قَاعِدِينْ فِي الْجِبَالْ أَشَانْ يَقْطَعَوْا حُجَارْ هَنَا بُنَى.
[16] وَ بَلَا الْمَسَائِيلْ السُّلَيْمَانْ كَلَّفَاهُمْ فِي الْخِدْمَةْ، فِيَّهْ نَاسْ آخَرِينْ كُلَ مُرَاقِبِينْ فِي الْخِدْمَةْ دِي. وَ عَدَدْهُمْ 3 300 رَاجِلْ.
[17] وَ الْمَلِكْ أَنْطَى أَمُرْ لِيَقْطَعَوْا حُجَارْ كُبَارْ وَ سَمْحِينْ لِيَبْقَوْا أَسَاسْ لِبَيْت اللّٰهْ.
[18] وَ خَلَاصْ، كُلَّ خَدَّامِينْ سُلَيْمَانْ وَ خَدَّامِينْ حِيرَامْ وَ نَاسْ حِلَّةْ قِبَالْ قَمَّوْا يَقْطَعَوْا وَ يِجَهُّزُوا الْحَطَبْ وَ الْحُجَارْ لِبُنَى الْبَيْت دَا.