[1] وَ يَوْم وَاحِدْ، إِبْلِيسْ قَمَّ ضِدّ بَنِي إِسْرَائِيلْ وَ لَزَّ دَاوُدْ لِيَحْسِبْهُمْ.
[2] وَ خَلَاصْ، دَاوُدْ قَالْ لِيُوَابْ وَ لِكُبَارَاتْ الشَّعَبْ: «أَمْشُوا أَحْسُبُوا كُلَّ بَنِي إِسْرَائِيلْ مِنْ تُرَابْ دَانْ فِي الْمُنْشَاقْ لَحَدِّي بِيرْ سَبْعَةْ فِي الْوَطِي. وَ قَبُّلُوا جِيبُوا لَيِّ عَدَدْهُمْ أَشَانْ نَعَرْفَهْ.»
[3] وَ يُوَابْ قَالْ: «خَلِّي اللّٰهْ يِزِيدْ عَدَدْ الشَّعَبْ مِيَةْ مَرَّةْ، يَا سِيدِي الْمَلِكْ! النَّاسْ دَوْل مَا كُلُّهُمْ كَيْ خَدَّامِينَكْ وَلَّا؟ وَ مَالَا إِنْتَ يَا سِيدِي تِدَوْر تِسَوِّي الشَّيّءْ دَا؟ وَ مَالَا تِلِزّ بَنِي إِسْرَائِيلْ فِي الْخَطَا دَا؟»
[4] وَ لَاكِنْ أَمُرْ الْمَلِكْ بِقِي شَدِيدْ بِلْحَيْن فِي يُوَابْ. وَ خَلَاصْ، يُوَابْ قَمَّ رَاغْ فِي كُلَّ بَلَدْ إِسْرَائِيلْ لِيَحْسِبْ الشَّعَبْ. وَ بَعَدْ دَا، قَبَّلْ فِي أُورُشَلِيمْ.
[5] وَ يُوَابْ أَنْطَى عَدَدْ حِسَابْ الشَّعَبْ لِلْمَلِكْ. وَ رُجَالْ بَنِي إِسْرَائِيلْ عَدَدْهُمْ 1 100 000 عَسْكَرْ الْيَعَرْفُوا حَرْب السُّيُوفْ وَ مِنْ بَنِي يَهُوذَا كَمَانْ 470 000.
[6] وَ يُوَابْ مَا حَسَبْ اللَّاوِيِّينْ وَ لَا قَبِيلَةْ بَنْيَامِينْ أَشَانْ هُو جَعَلْ أَمُرْ الْمَلِكْ مُحَرَّمْ.
[7] وَ الشَّيّءْ دَا، فَسِلْ قِدَّامْ الرَّبّ وَ هُو عَاقَبْ بَنِي إِسْرَائِيلْ.
[8] وَ دَاوُدْ قَالْ لِلرَّبّ: «أَنَا سَوَّيْت ذَنِبْ كَبِيرْ أَشَانْ حَسَبْت الشَّعَبْ. وَ لَاكِنْ هَسَّعْ دَا، أَغْفِرْ لَيِّ خَطَايِ أَنَا عَبْدَكْ. أَشَانْ أَنَا سَوَّيْت الشَّيّءْ دَا مِثِلْ نَادُمْ مَطْمُوسْ.»
[9] وَ اللّٰهْ حَجَّى لِلنَّبِي قَادْ الْيِشِيفْ رُؤْيَةْ لِدَاوُدْ وَ قَالْ لَيَّهْ:
[10] «أَمْشِي قُولْ لِدَاوُدْ: ‹دَاهُو اللّٰهْ قَالْ: ”أَنَا نِقَدِّمْ لَيْك تَلَاتَةْ نَفَرْ هَنَا مَصَايِبْ. وَ أَعَزِلْ مِنْهُمْ وَاحِدْ وَ أَنَا نِنَزِّلَهْ.“›»
[11] وَ خَلَاصْ، قَادْ مَشَى لِدَاوُدْ وَ قَالْ لَيَّهْ: «دَاهُو اللّٰهْ قَالْ: ‹هَسَّعْ أَعَزِلْ الْوَبَاءْ التَّحْمَلَهْ.
[12] إِنْتَ تِدَوْر تَلَاتَةْ سَنَةْ هَنَا جُوعْ فِي بَلَدَكْ؟ أَوْ تِدَوْر تَجْرِي قِدَّامْ عُدْوَانَكْ وَ هُمَّنْ يَطُرْدُوكْ لِمُدَّةْ تَلَاتَةْ شَهَرْ؟ أَوْ تِدَوْر اللّٰهْ يِنَزِّلْ وَبَاءْ لِمُدَّةْ تَلَاتَةْ يَوْم فِي بَلَدَكْ وَ مَلَكْ اللّٰهْ يِجِيبْ الْخَرَابْ فِي كُلَّ بَلَدْ إِسْرَائِيلْ؟› هَسَّعْ دَا، فَكِّرْ وَ أَوْرِينِي الرَّدّ النُّقُولَهْ لِلّٰهْ الرَّسَّلَانِي.»
[13] وَ دَاوُدْ قَالْ لِقَادْ: «أَنَا أَضَّايَقْت مَرَّةْ وَاحِدْ. خَلِّي نَقَعْ فِي إِيدْ اللّٰهْ أَشَانْ رَحْمَتَهْ وَسِيعَةْ. وَ خَلِّي مَا نَقَعْ فِي إِيدْ إِنْسَانْ.»
[14] وَ خَلَاصْ، اللّٰهْ نَزَّلْ وَبَاءْ فِي إِسْرَائِيلْ. وَ مَاتَوْا 70 000 نَاسْ فِي كُلَّ بَلَدْ إِسْرَائِيلْ.
[15] وَ الرَّبّ رَسَّلْ مَلَكْ فِي أُورُشَلِيمْ لِيِدَمِّرْهَا. وَ وَكِتْ الْمَلَكْ قَاعِدْ يِدَمِّرْ، اللّٰهْ خَلَّى الْفَسَالَةْ الْأَوَّلْ قَرَّرْ يِسَوِّيهَا. وَ قَالْ لِلْمَلَكْ الْمُدَمِّرْ: «خَلَاصْ كَفَى. أَرْفَعْ إِيدَكْ!» وَ فِي الْوَكِتْ دَا، مَلَكْ اللّٰهْ قَاعِدْ فِي مَدَقّ هَنَا أُرْنَانْ الْيَبُوسِي.
[16] وَ دَاوُدْ رَفَعْ رَاسَهْ وَ شَافْ مَلَكْ اللّٰهْ وَاقِفْ أَمْبَيْن السَّمَاءْ وَ الْأَرْض وَ سَيْفَهْ مَسْلُولْ فِي إِيدَهْ وَ مَدَّاهْ عَلَيْ أُورُشَلِيمْ. خَلَاصْ فِي الْبَكَانْ دَا، دَاوُدْ وَ الشُّيُوخْ لِبْسَوْا خُلْقَانْ التَّوْبَةْ وَ وَقَعَوْا بِوُجُوهُّمْ فِي الْأَرْض.
[17] وَ دَاوُدْ قَالْ لِلرَّبّ: «مَا أَنَا بَسْ أَمَرْت يَحْسُبُوا الشَّعَبْ وَلَّا؟ وَ أَنَا بَسْ أَذْنَبْت وَ سَوَّيْت الْخَطَا دَا. لَاكِنْ الشَّعَبْ دَوْل مِثِلْ غَنَمْ بَسْ، مَا سَوَّوْا شَيّءْ! يَا اللّٰهْ إِلٰـهِي! عَاقِبْنِي أَنَا وَ عَايِلْتِي وَ لَاكِنْ مَا تِنَزِّلْ الْوَبَاءْ دَا فِي شَعَبَكْ.»
[18] وَ مَلَكْ اللّٰهْ قَالْ لِقَادْ: «أَمْشِي قُولْ لِدَاوُدْ خَلِّي يَمْشِي يَبْنِي مَدْبَحْ لِلّٰهْ فِي الْمَدَقّ هَنَا أُرْنَانْ الْيَبُوسِي.»
[19] وَ خَلَاصْ دَاوُدْ مَشَى مِثِلْ قَالَهْ لَيَّهْ قَادْ بِأُسُمْ اللّٰهْ.
[20] وَ أُرْنَانْ قَاعِدْ يُدُقّ الْقَمَحْ فِي الْمَدَقّ. وَ وَكِتْ أَنْلَفَتْ، شَافْ الْمَلَكْ. وَ أَوْلَادَهْ الْأَرْبَعَةْ الْمَعَايَهْ عَرَّدَوْا وَ أَلَّبَّدَوْا.
[21] وَ دَاوُدْ مَشَى لِأُرْنَانْ وَ وَكِتْ أُرْنَانْ شَافَهْ، هُو مَرَقْ مِنْ الْمَدَقّ وَ وَقَعْ فِي الْأَرْض وَ سَجَدْ قِدَّامْ الْمَلِكْ.
[22] وَ دَاوُدْ قَالْ لِأُرْنَانْ: «أَنْطِينِي بَكَانْ الْمَدَقّ دَا. نِدَوْر نَبْنِي فَوْقَهْ مَدْبَحْ لِلّٰهْ أَشَانْ الْوَبَاءْ دَا يَقِيفْ مِنْ الشَّعَبْ. أَنْطِينِي وَ نِكَفِّيكْ تَمَنَهْ كَامِلْ.»
[23] وَ أُرْنَانْ رَدَّ لِدَاوُدْ وَ قَالْ: «يَا سِيدِي الْمَلِكْ، شِيلْ الْمَدَقّ وَ سَوِّي بَيَّهْ أَيِّ شَيّءْ التِّدَوْرَهْ. شِيفْ، أَنَا نَنْطِيكْ الْبَقَرْ لِلضَّحِيَّةْ الْمُحَرَّقَةْ وَ الْكَارَّوْ الْيِفَجُّقُوا بَيَّهْ الْقَمَحْ يَبْقَى لَيْك حَطَبْ وَ الْقَمَحْ كَمَانْ يَبْقَى هَدِيَّةْ هَنَا دَقِيقْ. أَنَا نَنْطِيكْ كُلَّ الْأَشْيَاءْ دَوْل.»
[24] وَ لَاكِنْ الْمَلِكْ دَاوُدْ قَالْ لِأُرْنَانْ: «لَا، أَبَداً! أَنَا نَشْرِيهْ مِنَّكْ وَ نِكَفِّيكْ تَمَنَهْ كَامِلْ. مَا نِدَوْر نِشِيلْ خُمَامَكْ وَ نِقَدِّمَهْ لِلّٰهْ وَ بَيْدَا، نِقَدِّمْ ضَحِيَّةْ الْمَا نَخْسَرْ فَوْقهَا.»
[25] وَ خَلَاصْ، دَاوُدْ شَرَى مِنْ أُرْنَانْ الْمَدَقّ بِـ 600 جِنَيْه هَنَا دَهَبْ.
[26] وَ فِي الْبَكَانْ دَا، دَاوُدْ بَنَى مَدْبَحْ لِلّٰهْ وَ قَدَّمْ فَوْقَهْ ضَحَايَا مُحَرَّقِينْ وَ ضَحَايَا سَلَامَةْ. وَ هُو سَأَلْ اللّٰهْ وَ اللّٰهْ قِبِلْ سُؤَالَهْ وَ نَزَّلْ نَارْ مِنْ السَّمَاءْ لِيِحَرِّقْ الضَّحَايَا الْفِي الْمَدْبَحْ.
[27] وَ بَعَدْ دَا، اللّٰهْ أَمَرْ الْمَلَكْ يِدَخِّلْ سَيْفَهْ فِي بَيْتَهْ.
[28] وَ فِي الْوَكِتْ دَا، دَاوُدْ عِرِفْ كَدَرْ اللّٰهْ رَدَّ لَيَّهْ فِي سُؤَالَهْ فِي الْمَدَقّ هَنَا أُرْنَانْ الْيَبُوسِي. وَ مِنْ الْيَوْم دَا، دَاوُدْ قَاعِدْ يِقَدِّمْ ضَحَايَا فِي الْبَكَانْ دَا.
[29] فِي الْوَكِتْ دَا، خَيْمَةْ اللّٰهْ الْمُوسَى بَنَاهَا فِي الصَّحَرَاء وَ الْمَدْبَحْ هَنَا الضَّحَايَا قَاعِدِينْ فِي بَكَانْ الْعِبَادَةْ فِي قِبْعُونْ.
[30] وَ لَاكِنْ دَاوُدْ مَا قِدِرْ مَشَى يَسْأَلْ الرَّبّ هِنَاكْ أَشَانْ هُو خَافْ مِنْ سَيْف مَلَكْ اللّٰهْ.