[1] يَا سِيَادْ الْعَبِيدْ، سَوُّوا دَايْماً لِعَبِيدْكُو الشَّيْء الْوَاجِبْ وَ عَدِيلْ. مَا تَنْسَوْا كَدَرْ إِنتُو كُلَ عَبِيدْ و سِيدْكُو هُو الْقَاعِدْ فِي السَّمَاءْ.
[2] يَا أَخْوَانَّا، أَنْكَرُبُوا فِي الصَّلَاةْ وَ أَقْعُدُوا فَوْقْهَا وَاعِيِينْ وَ أَسْأَلَوْا اللّٰهْ بِشُكُرْ.
[3] وَ أَسْأَلَوْا اللّٰهْ لِيْنَا كُلَ. أَسْأَلَوْه أَشَانْ يَفْتَحْ لَيْنَا دَرِبْ لِلْبِشَارَةْ أَشَانْ نِبَلُّغُوا النَّاسْ بِسِرّ اللّٰهْ الْفِي الْمَسِيحْ. وَ بِسَبَبْ الْبِشَارَةْ دِي، أَنَا قَاعِدْ فِي السِّجِنْ.
[4] أَسْأَلَوْا اللّٰهْ لَيِّ أَشَانْ نِبَلِّغْهَا لِلنَّاسْ بِكَلَامْ وَاضِحْ مِثِلْ اللّٰهْ بِدَوْرَهْ.
[5] عِيشُوا بِفِكِرْ عَدِيلْ فِي أُسْط النَّاسْ الْمَا مُؤْمِنِينْ. أَيِّ فُرْصَةْ اللِّقِيتُوهَا أَشْهَدَوْا لِلْمَسِيحْ.
[6] شِيلُوا نِيَّةْ أَشَانْ تِحَجُّوا دَايْماً بِكَلَامْ طَيِّبْ وَ طَاعِمْ. وَ مِثِلْ دَا، تَعَرْفُوا كِكَّيْف وَاجِبْ تُرُدُّوا لِأَيِّ نَادُمْ.
[7] وَ خَلَاصْ، أَخُونَا تِشِيكُسْ يِأَوْرِيكُو بِخَبَرْنَا. هُو أَخُونَا النِّحِبُّوهْ وَ يَخْدِمْ مَعَانَا لِرَبِّنَا بِنِيَّةْ مُخْلِصَةْ.
[8] وَ هُو يِخَبِّرْكُو بِحَالِتْنَا وَ يِشَجِّعْكُو وَ بِسَبَبْ دَا بَسْ رَسَّلْتَهْ لَيْكُو.
[9] وَ رَسَّلْت مَعَايَهْ الْفَايِدْ وَ هُو أَخُونَا الْأَمِينْ النِّرِيدُوهْ وَ هُو نَادُمْ مِنْ حِلِّتْكُو. النَّاسَيْن دَوْل يِأَوْرُوكُو بِكُلَّ شَيْء الْبِقِي فَوْقنَا هِنِي.
[10] أَخُونَا أَرِسْتَارْكُسْ الْقَاعِدْ مَعَايِ فِي السِّجِنْ يِسَلِّمْكُو وَ مَعَايَهْ مَرْقُسْ أَخُو بَرْنَابَا. وَ مَرْقُسْ دَا، كَانْ جَاءْ لَيْكُو، أَكُرْبُوهْ قَوِي مِثِلْ وَصَّوْكُو بَيَّهْ أَوَّلْ.
[11] وَ يَشُوعَ الْمَعْرُوفْ بِيُسْتُسْ يِسَلِّمْكُو. التَّلَاتَةْ دَوْل بَسْ هُمَّنْ يَهُودْ بَيْن الْأَخْوَانْ الْيَخْدُمُوا مَعَايِ فِي شَانْ مَمْلَكَةْ اللّٰهْ وَ هُمَّنْ شَجَّعَوْنِي كَتِيرْ.
[12] وَ أَخُونَا أَبْفُرَاسْ الْهُو خَدَّامْ الْمَسِيحْ عِيسَى وَ مِنْ حِلِّتْكُو دَا، هُو كُلَ يِسَلِّمْكُو. هُو قَاعِدْ يَسْأَلْ اللّٰهْ دَايْماً لَيْكُو بِشِدَّةْ أَشَانْ تَقْعُدُوا ثَابْتِينْ وَ مُتَأَكِّدِينْ لِمُرَادَةْ اللّٰهْ الْكَامِلَةْ.
[13] وَ أَنَا نَشْهَدْ لَيَّهْ هُو قَاعِدْ يَتْعَبْ كَتِيرْ فِي شَانْكُو وَ فِي شَانْ الْأَخْوَانْ الْفِي حِلَّالْ لَاوْدِكِيَّةْ وَ هِرَابُلُسْ.
[14] وَ أَخُونَا لُوقَا الدَّكْتَوْر النِّحِبُّوهْ وَ أَخُونَا دِيمَاسْ، هُمَّنْ يِسَلُّمُوكُو.
[15] سَلُّمُوا الْأَخْوَانْ الْفِي لَاوْدِكِيَّةْ وَ أَخُتْنَا نِيمْفَةْ وَ الجَّمَاعَةْ الْبِلِمُّوا فِي بَيْتهَا.
[16] وَ وَكِتْ قَرَوْا لَيْكُو الْجَوَابْ دَا خَلَاصْ، خَلِّي يَقْرَوْه لِلْجَمَاعَةْ الْفِي لَاوْدِكِيَّةْ كُلَ. وَ الْجَوَابْ الرَّسَّلْتَهْ لِلَاوْدِكِيَّةْ، خَلِّي يَقْرَوْه لَيْكُو كُلَ.
[17] وَ كَلُّمُوا لِأَرْخِبَّا وَ قُولُوا لَيَّهْ «خُطّ بَالَكْ أَشَانْ تِتَمِّمْ الْخِدْمَةْ الرَّبِّنَا أَنْطَاهَا لَيْك».
[18] وَ خَلَاصْ، أَنَا ذَاتِي شِلْت الْقَلَمْ وَ نَكْتِبْ «أَنَا بُولُسْ نِسَلِّمْكُو. مَا تَنْسَوْا كَدَرْ أَنَا قَاعِدْ فِي السِّجِنْ وَ مُجَنْزَرْ». وَ عَلَيْكُمْ النِّعْمَةْ.