[1] وَ يَوْم وَاحِدْ، بُطْرُسْ وَ يُوحَنَّا مَاشِينْ فِي بَيْت اللّٰهْ أَشَانْ يِصَلُّوا صَلَاةْ هَنَا السَّاعَةْ تَلَاتَةْ.
[2] وَ نَادُمْ وَاحِدْ قَاعِدْ جَنْب بَابْ هَنَا بَيْت اللّٰهْ الْأُسْمَهْ الْبَابْ الْجَمِيلْ. وَ مِنْ وِلْدَوْه هُو مَعْدُورْ. وَ كُلَّ يَوْم أَخْوَانَهْ يِوَدُّوهْ وَ يُخُطُّوهْ هِنَاكْ أَشَانْ يَشْحَدْ مِنْ النَّاسْ الْيِنْدَسَّوْا فِي بَيْت اللّٰهْ.
[3] وَ وَكِتْ هُو شَافْ بُطْرُسْ وَ يُوحَنَّا جَايِّينْ يَدْخُلُوا، هُو سَأَلْ مِنْهُمْ صَدَقَةْ.
[4] وَ وِقْفَوْا وَ شَافَوْه عَدِيلْ وَ بُطْرُسْ قَالْ لَيَّهْ: شِيفْنَا عَدِيلْ.
[5] وَ هُو شَافَاهُمْ وَ فِي فِكْرَهْ هُمَّنْ يِدَوْرُوا يَنْطُوهْ صَدَقَةْ.
[6] وَ بُطْرُسْ قَالْ: مَا عِنْدِي فُضَّةْ وَ مَا عِنْدِي دَهَبْ لَاكِنْ نَنْطِيكْ الشَّيْء الْعِنْدِي. بِأُسُمْ عِيسَى الْمَسِيحْ الْمِنْ النَّاصِرَةْ، نُقُولْ لَيْك قُمّ وَ رُوغْ.
[7] وَ بُطْرُسْ كَرَبَهْ مِنْ إِيدَهْ الزَّيْنَةْ وَ سَاعَدَهْ لِيُقُمّ. وَ طَوَّالِي كَيْ، هُو لِقِي قُدْرَةْ وَ رِجِلَيْنَهْ الْفَرْتَقَوْا.
[8] وَ نَطَّطْ فَوْق وَ قَمَّ يُرُوغْ وَ دَخَلْ مَعَاهُمْ فِي بَيْت اللّٰهْ. وَ هُو قَاعِدْ يُرُوغْ وَ يِنَطِّطْ وَ يَشْكُرْ اللّٰهْ.
[9] وَ كُلَّ النَّاسْ هِنَاكْ شَافَوْه رَايِغْ وَ يَشْكُرْ اللّٰهْ.
[10] وَ عِرِفُوا دَا بَسْ الْمَعْدُورْ الْيَشْحَدْ كُلَّ يَوْم فِي الْبَابْ الْجَمِيلْ. وَ عَجَّبَوْا مَرَّةْ وَاحِدْ وَ اسْتَغَرَبَوْا لِلشَّيْء الْبِقِي.
[11] وَ بُطْرُسْ وَ يُوحَنَّا جَوْا فِي بَكَانْ وَاحِدْ فِي حَوْش هَنَا بَيْت اللّٰهْ أُسْمَهْ رَكُوبَةْ سُلَيْمَانْ وَ الرَّاجِلْ قَاعِدْ يَمْسُكْهُمْ. وَ نَاسْ كَتِيرِينْ لَمَّوْا فَوْقهُمْ وَ عَجَّبَوْا بِلْحَيْن.
[12] بُطْرُسْ شَافْ كُلَّ النَّاسْ اللَّامِّينْ وَ كَلَّمْ لَيْهُمْ. هُو قَالْ: يَا بَنِي إِسْرَائِيلْ، مَالْكُو عَجَّبْتُوا فِي الشَّيْء دَا؟ وَ مَالْكُو تِحَمُّرُونَا؟ فِي فِكِرْكُو، الرَّاجِلْ دَا قَمَّ رَاغْ بِقُدْرَةْ حَقِّنَا وَلَّا أَشَانْ أَنِحْنَ صَالِحِينْ زِيَادَةْ وَلَّا؟
[13] اللّٰهْ رَبّ جُدُودْنَا إِبْرَاهِيمْ وَ إِسْحَاقْ وَ يَعْقُوبْ رَفَعْ عَبْدَهْ عِيسَى وَ خَطَّهْ فِي مَجْدَهْ. وَ دَا بَسْ النَّادُمْ الْإِنْتُو سَلَّمْتُوهْ لِلْمَوْت. قِدَّامْ بِلَاطُسْ نَكَرْتُوهْ وَكِتْ هُو دَوَّرْ يَطْلِقَهْ.
[14] إِنْتُو أَبَيْتُوهْ مَا دَوَّرْتُوا النَّادُمْ الصَّالِحْ وَ قُدُّوسْ وَ طَلَبْتُوا مِنْ الْوَالِي هُو يَطْلِقْ لَيْكُو كَتَّالْ الدِّمَمْ فِي بَدَلَهْ.
[15] وَ بَيْدَا، كَتَلْتُوا النَّادُمْ الْيَنْطِيكُو الْحَيَاةْ. وَ لَاكِنْ اللّٰهْ بَعَثَهْ مِنْ أُسْط الْمَيْتِينْ وَ أَنِحْنَ شُهُودْ لِبُعَاثَهْ.
[16] وَ بِسَبَبْ إِيمَانَّا بِأُسُمْ عِيسَى، الرَّاجِلْ التِّشِيفُوهْ وَ التَّعَرْفُوهْ دَا لِقِي قُدْرَةْ. وَ فِي شَانْ إِيمَانْ بِعِيسَى بَسْ، هُو لِقِي الْعَافَيْ مَرَّةْ وَاحِدْ وَ كُلُّكُو شِفْتُوهْ بِعُيُونْكُو.
[17] يَا أَخْوَانِي، نَعَرِفْ إِنْتُو وَ كُبَارَاتْكُو أَبَيْتُوا الْمَسِيحْ أَشَانْ أَوَّلْ مَا عِرِفْتُوهْ.
[18] مِنْ زَمَانْ، اللّٰهْ كَلَّمْ لَيْكُو بِوَاسِطَةْ كُلَّ الْأَنْبِيَاءْ وَ قَالْ الْمَسِيحْ يَتْعَبْ وَ خَلَاصْ دَا بَسْ الشَّيْء الْبِقِي.
[19] وَ هَسَّعْ تُوبُوا وَ قَبُّلُوا لِلّٰهْ أَشَانْ هُو يَمْحَى ذُنُوبْكُو.
[20] وَ اللّٰهْ يَنْطِيكُو سَلَامْ فِي قُلُوبْكُو وَ يِرَسِّلْ لَيْكُو مَرَّةْ تَانِيَةْ النَّادُمْ الْإِخْتَارَهْ لَيْكُو أَشَانْ يَبْقَى الْمَسِيحْ وَ هُو عِيسَى.
[21] لَابُدَّ عِيسَى يَقْعُدْ فِي السَّمَاءْ لَحَدِّي يَوْم الْاللّٰهْ يِسَوِّي كُلَّ شَيْء جَدِيدْ مِثِلْ هُو قَالَهْ مِنْ زَمَانْ بِوَاسِطَةْ الْأَنْبِيَاءْ الصَّالِحِينْ الرَّسَّلَاهُمْ.
[22] وَ النَّبِي مُوسَى قَالْ <رَبُّكُو اللّٰهْ يَبْعَثْ لَيْكُو نَادُمْ مِنْ أَخْوَانْكُو نَبِي مِثْلِي. أَسْمَعَوْا كَلَامَهْ وَ سَوُّوا كُلَّ شَيْء الْبُقُولَهْ لَيْكُو.
[23] وَ أَيِّ نَادُمْ الْمَا يَسْمَعْ كَلَامَهْ، يَطُرْدُوهْ مِنْ شَعَبْ اللّٰهْ وَ يَهْلَكْ>.
[24] بِمِثِلْ دَا، كُلَّ الْأَنْبِيَاءْ حَجَّوْا بِوَكِتْنَا دَا، مِنْ النَّبِي صَمُوِيلْ وَ كُلَّ الْأَنْبِيَاءْ الْجَوْا وَرَايَهْ.
[25] وَ إِنْتُو عِيَالْ الْأَنْبِيَاءْ دَوْل وَ وَرَثْتُوا كَلَامْهُمْ. وَ إِنْتُو أَهَلْ الْمُعَاهَدَةْ الرَّبُّكُو اللّٰهْ سَوَّاهَا مَعَ جُدُودْكُو وَكِتْ هُو قَالْ لِإِبْرَاهِيمْ <بِذُرِّيتَكْ بَسْ نِبَارِكْ كُلَّ الْأُمَمْ فِي كُلَّ الْأَرْض>.
[26] وَ اللّٰهْ بَعَثْ عَبْدَهْ عِيسَى فِي شَانْكُو وَ رَسَّلَهْ لَيْكُو إِنْتُو أَوَّلْ، قُبَّالْ الْأُمَمْ الْآخَرِينْ، أَشَانْ يِبَارِكُّو وَ يِقَبِّلْ أَيِّ وَاحِدْ مِنْ الدَّرِبْ الْفَسِلْ.