[1] وَ هَسَّعْ دَا، نَمْشِي لَيْكُو تَالِتْ مَرَّةْ. وَ يَبْقَى مِثِلْ الشَّيْء الْمَكْتُوبْ فِي الْكِتَابْ <شُهُودْ إِتْنَيْن أَوْ تَلَاتَةْ يِثَبُّتُوا أَيِّ كَلَامْ>.
[2] وَ الشَّيْء الْأَنَا قُلْتَهْ وَكِتْ أَنَا قَاعِدْ مَعَاكُو الْمَرَّةْ التَّانِيَةْ، نُقُولَهْ لَيْكُو بَتَّانْ هَسَّعْ أَنَا غَايِبْ مِنْكُو. أَنَا قُلْت لِلنَّاسْ الْأَذْنُبُوا وَ لِكُلَّ الْآخَرِينْ، كَانْ نَجِيكُو بَتَّانْ، مَا نِأَدِّبْهُمْ بِنَفَسْ بَارِدْ.
[3] تِدَوْرُوا الدَّلِيلْ الْيِوَصِّفْ كَدَرْ الْمَسِيحْ يِحَجِّي لَيْكُو بِوَاسْطِتِي أَنَا وَ دَا هُو أَنَا نِوَصِّفَهْ لَيْكُو. هُو مَا ضَعِيفْ فِي الشَّيْء الْيِسَوِّيهْ لَيْكُو وَ أَكِيدْ هُو يِوَصِّفْ قُدُرْتَهْ فِي أُسُطْكُو.
[4] صَحِيحْ، الْمَسِيحْ خَلَّى مِنَّهْ الْقُدْرَةْ وَ مَاتْ فِي الصَّلِيبْ لَاكِنْ هُو حَيّ بِقُدْرَةْ اللّٰهْ. وَ فِي عَلَاقِتْنَا مَعَايَهْ، أَنِحْنَ مَا عِنْدِنَا قُدْرَةْ هِنْتِنَا لَاكِنْ نَحْيَوْا مَعَايَهْ بِقُدْرَةْ اللّٰهْ وَ بِالْقُدْرَةْ دِي نَعَامُلُوكُو.
[5] أَسْأَلَوْا نُفُوسْكُو. هَلْ بِالصَّحِيحْ كَيْ إِنْتُو مُؤْمِنِينْ؟ جَرُّبُوا نُفُوسْكُو. مَا تَعَرْفُوا كَدَرْ عِيسَى الْمَسِيحْ قَاعِدْ فِيكُو وَلَّا؟ وَ دَا يَبْقَى صَحِيحْ كَانْ مَا فَشَلْتُوا مَرَّةْ وَاحِدْ.
[6] وَ نِتْمَنَّى تَعَرْفُوا أَنِحْنَ مَا فَشَلْنَا.
[7] وَ نَسْأَلَوْا اللّٰهْ أَشَانْ إِنْتُو مَا تِسَوُّوا أَيِّ خَطَأْ. وَ سُؤَالْنَا دَا مَا أَشَانْ النَّاسْ يِشِيفُوا نَجَاحْنَا لَاكِنْ أَشَانْ إِنْتُو تِسَوُّوا الْخَيْر، حَتَّى كَانْ نَاسْ وَاحِدِينْ بُقُولُوا أَنِحْنَ فَشَلْنَا كُلَ.
[8] أَشَانْ أَنِحْنَ مَا نَقْدَرَوْا نِسَوُّوا شَيْء ضِدّ الْحَقّ إِلَّا لِلْحَقّ.
[9] وَ كَانْ أَنِحْنَ مَا عِنْدِنَا قُدْرَةْ وَ إِنْتُو بَسْ عِنْدُكُو، خَلَاصْ أَنِحْنَ فَرْحَانِينْ. وَ نَسْأَلَوْا اللّٰهْ لَيْكُو أَشَانْ إِنْتُو تَبْقَوْا مُؤْمِنِينْ كَامِلِينْ.
[10] وَ خَلَاصْ، نَكْتِبْ لَيْكُو الْكَلَامْ دَا وَكِتْ أَنَا غَايِبْ مِنْكُو أَشَانْ وَكِتْ أَنَا قَاعِدْ مَعَاكُو مَا وَاجِبْ لَيِّ نَهْرِجْكُو. أَشَانْ السُّلْطَةْ الرَّبِّنَا أَنْطَانِي فَوْقكُو، هِي لِنِقَوِّيكُو فِي الْإِيمَانْ وَ مَا لِنِخَرِّبْكُو.
[11] وَ خَلَاصْ، يَا أَخْوَانِي، أَفْرَحَوْا. أَبْقَوْا مُؤْمِنِينْ كَامِلِينْ. أَشَّاجَعَوْا أَمْبَيْنَاتْكُو. خَلِّي فِكِرْكُو يَبْقَى وَاحِدْ. عِيشُوا بِالسَّلَامْ وَ اللّٰهْ سِيدْ الْمَحَبَّةْ وَ السَّلَامْ يَقْعُدْ مَعَاكُو.
[12] أَسَّالَمَوْا أَمْبَيْنَاتْكُو بِسَلَامْ الصَّالِحِينْ.
[13] كُلَّ الْأَخْوَانْ الصَّالِحِينْ الْمَعَايِ يِسَلُّمُوكُو.
[14] خَلِّي نِعْمَةْ رَبِّنَا عِيسَى الْمَسِيحْ وَ مَحَبَّةْ اللّٰهْ وَ الْأُخُوَّةْ الْجَايَةْ مِنْ الرُّوحْ الْقُدُّوسْ يَقْعُدُوا ثَابْتِينْ فوقكو كُلُّكُو.