[1] Ñoqa Pablon apóstol kani. Manan runakunachu kachamuwarqan, nitaqmi runachu akllawarqan. Aswanpas Jesucriston, hinallataq payta wañusqakunamanta kawsarichimpuq Dios Yayan akllawarqan.
[2] Llapallan ñoqawan kashaq wawqepanakunawanmi, Galasia probinsiapi kashaq iñiq t'aqakunaman napaykamuykiku.
[3] Dios Yayaq, hinallataq Señorninchis Jesucristoq allinpaq qokuyninpas, thak kayninpas qankunawanpuni kachun.
[4] Jesucriston huchanchiskunarayku, pay kikinta qoykukurqan. Hinaqa, Dios Yayanchispa munayninman hina, kay mana allin tiempomanta horqowananchispaqmi, chaytaqa ruwarqan.
[5] Payllamanpuni wiñay-wiñaypaq yupaychaypas kachun. Ahinapuni kachun.
[6] Cristoq allinpaq qokuyninwan Diospa waqyasqasunkichismanta usqhayllaman t'aqarikuspa, wak willakuyta qatikushasqaykichismantan muspharisqaraq kashani.
[7] Cristoq allin willakuyninmanta, wak willakuyqa manan kanchu. Aswanpas wakin runakunan qankunata pantachishasunkichis. Hinallataq Cristoq allin willakuyninta waqllichiyta munashanku.
[8] Ñoqaykun, allin willakuyta willarqaykikuña. Ichaqa sichus ñoqayku kikiykupas, otaq hanaq pachamanta huk angelpas wak niraq willakuyta willasunkichis chayqa, ñakasqa kachun.
[9] Imaynan ñawpaqpas nirqaykichisña, chay hinallatataqmi kunanpas nillanitaq: ‘Sichus pipas chaskisqaykichis allin willakuymanta wak niraq willakuyta willasunkichis chayqa, ñakasqa kachun,’ nispay.
[10] Chay hinaqa, ¿runakunaq allinpaq hap'iwanantachu, icha Diospa allinpaq hap'iwanantachu maskhashani? ¿Otaq runakunata kusichiyllatachu maskhashani? Sichus runakunallata kusichishayman chayqa, manan Cristoq kamachinchu kayman.
[11] Ichaqa wawqe-panaykuna, qankunaman willasqay allin willakuyqa manan runaq yuyayninman hinachu karqan. Chaytan yachanaykichista munani.
[12] Ñoqaqa chay allin willakuyta manan runamantachu chaskirqani. Nitaqmi runamantachu yacharqani. Aswanpas Jesucriston rikuchiwarqan.
[13] Ñawpa tiempopi, judío runakunaq religionninkuman hina, imaynatachus purisqaytaqa uyarirqankichisñan. Ñoqaqa Diospa iñiq t'aqanta ch'usaqyachinaypaqmi sinchitapuni qatiykacharqani.
[14] Hinallataq judío runakunaq religionninkuman hina, wiñaymasiy judío llaqtamasiykunaq ruwayninkuman hinan, aswan-aswantaraq purirqani. Hinallataq machulaykunaq ruwayninkuman, aswan wañukuywanraq hap'ipakuqmi karqani.
[15] Ichaqa Diosmi, munasqanman hina mamaypa wiksallanpiraq kashaqtiy akllawarqan. Hinan allinpaq qokuyninpa chawpinta waqyawarqan.
[16] Diostaqmi, Churinta ñoqaman rikhurichiwarqan. Chaytaqa, Churinmanta mana-judío runakunaman willanaypaqmi ruwarqan. Hinan manapuni mayqen runatapas usqhayllamanqa tapukurqanichu.
[17] Nitaqmi ñoqamanta aswan ñawpaq kaq apóstolkunata tapukuqpas Jerusalén llaqtamanqa wicharqanichu. Aswanmi Arabia suyuman rirqani, hinallataq wakmanta Damasko llaqtaman kutipurqani.
[18] Chaymantataqmi, kinsa wata pasaqtinña, Pedrota rikumunaypaq Jerusalén llaqtaman wicharqani. Hinan chaypi, chunka phisqayoq p'unchay paywan qhepakurqani.
[19] Ichaqa manataqmi wakin apostolkunataqa Jerusalén llaqtapi rikumurqanichu. Aswanpas Señorpa wawqen Jakobollatan rikumurqani.
[20] Qhawariychis, qankunaman qelqamusqaypiqa, Diospa ñawpaqenpi manan llullakunichu.
[21] Chaymantataqmi Siria probinsiaman, hinallataq Silisia probinsiaman rirqani.
[22] Judea probinsiapi kaq, Cristopi kashaq iñiq t'aqakunapaqqa mana reqsisqan karqani.
[23] Ichaqa kay hina rimayllatan uyarisharqanku: ‘Chay, mayqenchus ñawpa tiempopi qatiykachawaqninchismi, hinallataq ñawpa tiempopi iñiyta ch'usaqyachiqmi, kunanqa chay iñiymanta willakushan,’ nispa.
[24] Hinan ñoqahawa, Diosta hatunchasharqanku.