[1] Ñoqa Pedroqa, Jesucristoq apostolninmi kani. Hinan karu llaqtakunapi kashaqkunaman qelqamuykichis. Ponto probinsiapi, Galasia probinsiapi, Kapadosia probinsiapi, Asia probinsiapi, hinallataq Bitinia probinsiapi ch'eqerichisqa kashaqkunamanmi qelqamuykichis.
[2] Qankunataqa, Dios Yayapunin, ñawpaqmatapacharaq reqsisqanman hina akllakurqasunkichis. Espiritunpa chawpinta t'aqachispanmi, Jesucristota kasukunaykichispaq, hinallataq yawarninwan ch'aqchusqa kanaykichispaq akllakurqasunkichis. Hinaqa Diospa allinpaq qokuyninpas, thak kayninpas qankunapi askhayachun.
[3] Señorninchis Jesucristoq Yayan Diosqa saminchasqapuni kachun. Paymi hatun yanapaykuyninman hina, Jesucristoq wañusqakuna ukhumanta kawsarimpusqanpa chawpinta, huk kawsashaq suyakuypaq wakmanta nasechiwarqanchis.
[4] Chay hinapin, mana ismuq, mana imawanpas chhaqrusqa, hinallataq mana naq'eq, hanaq pachapi qankunapaq waqaychasqa kashaq erensiata chaskinkichis.
[5] Chaypaqmi, iñiypa chawpinta, Diospa atiyninwan waqaychasqa kashankichis. Hinan p'uchukay tiempopi rikuchisqa kananpaq, wakichisqa kashaq qespikuyman aypankichis.
[6] Hinaña kunan huk pisi tiempolla imaymana pruebakunapi ñak'arishankichis chaypas, chay qespikuyniykichispin kusikushankichis.
[7] Chay hinapin, imaynan tukukuq qoritapas ninawan pruebakun, chay hinallataq iñiyniykichispas pruebasqa kanqa. Hinan chay qorimantapas, iñiyniykichisqa aswan balorniyoqraq kanqa. Jesucristotaq rikhurimuyninpi, yupaychasqa, hatunchasqa, hinallataq allinpaq qhawarisqapuni kanqa.
[8] Paytan mana rikushaspaykichispas munakunkichis. Hinaña kunan mana payta rikunkichischu chaypas, paypin kreenkichis. Kreespataq, mana willakuy atina may hatun q'ochukuywan kusikunkichis.
[9] Chay hinapin, iñiypi maskhasqaykichis almaykichispa qespikuynintaqa tarirqankichis.
[10] Qankunapaq qomusqa kaq allinpaq qokuymantan Diospa rantinpi rimaqkunaqa profetisarqanku. Hinan chay profetisasqanku qespikuymanta allinta tapukurqanku, hinallataq allinta t'aqwirqanku.
[11] Diospa rantinpi rimaqkunaqa, paykunapi kashaq Cristoq Espiritunpa willakusqan, mayqenchus kanantawan, imayna tiempomantachus pasanan kasqantawanmi allin-allintapuni t'aqwirqanku. Espiritutaqmi Cristoq ñak'arinankunata, hinamantataq hatunchasqa kanantawan ñawpaqmantaraq willakurqan.
[12] Diospa rantinpi rimaqkunaman sut'inchasqaqa, manan paykuna kikinkupaqchu karqan. Aswanpas chayta sut'inchaspankuqa qankunatan serbisharqasunkichis. Hinan kunan allin willakuyta willaqniykichiskunapas, chay Diospa rantinpi rimaqkunaq willasqallankutataq, hanaq pachamantapacha kachamusqa Santo Espírituq chawpinta willasharqasunkichis. Chaytaqa angelkunapas rikuykuytapunin munanku.
[13] Chay hinaqa, yuyayniykichista allin-allinta wakichiychis. Hinallataq ima ruwashasqaykichispipas makilla kuidakuq kaychis. Jesucristo rikhurimuspa allinpaq qokuyta apamunasunkichispi hunt'asqa suyakuyniykichista churaychis.
[14] Kasukuq wawakuna hinapuni kawsaychis. Amañataq ñawpaq manaraq Diosta reqsikushaspa mana allin munapayaykunapi kawsasqaykichisman hinaqa kawsaychisñachu.
[15] Aswanpas, imaynan waqyaqniykichisqa ch'uyapuni, chay hinallataq qankunapas tukuy kawsayniykichispi ch'uyapuni kaychis.
[16] Qelqasqan kashan: ‘Ñoqa ch'uyapuni kasqayrayku, qankunapas ch'uyapuni kaychis,’ nispa. (Leb. 11:44-45; 19:2; 20:7)
[17] Diosqa runakunaq rikch'ayninta mana qhawaspalla, hinallataq sapankatapas ruwasqanman hinan chaninchan. Sichus qankunaqa payta ‘Yayáy,’ nispa waqyakunkichis chayqa, kay pachapi mana llaqtayoq hina kawsasqaykichis, tukuy tiempopiyá allintapuni manchakuywan kawsaychis.
[18] Machulaykichiskunaq mana baleq kawsayninkumanta rantipapusqa kasqaykichistaqa yachankichismi. Manan tukurukuqlla qoriwanchu, nitaq tukurukuqlla qolqewanchu rantipapusqaqa karqankichis.
[19] Aswanpas, ancha balorniyoq Cristoq yawarninwanmi, huk mana chhaqrusqa, hinallataq mana ima qhelliyoq obehaq yawarninwan hina rantipapusqaqa karqankichis.
[20] Cheqaqtapunin Cristoqa, manaraq kay pachapas kamasqa kashaqtin, chaypaq nispa t'aqasqaña karqan. Ichaqa qankunaraykutaqmi kay qhepa tiempokunapipas rikuchisqa karqan.
[21] Hinan Cristoq chawpinta Diospi iñikapurqankichis. Paymi Cristota wañusqakunapuramanta kawsarichimpurqan, hinallataq hatun k'anchariywan k'ancharichirqan. Chay hinapin iñiyniykichispas, suyakuyniykichispas Diosllapipuni kashanqa.
[22] Espírituq chawpinta, cheqaq kaqta kasukuspan almaykichistaqa ch'uyancharqankichis. Hinaspa hukkuna-hukkunawan mana q'otukuq cheqaq munakuy wawqe-panantin hina ruphashaq sonqowanpuni ch'uya munakuywan munanakuychis.
[23] Mosoqmanta nasesqañan kankichis. Manan tukukuqlla runa-miraymantachu, aswanpas Diospa siminpa chawpinta mana tukukuq miraymanta nasesqañan kankichis. Diospa kawsashaq simin, hinallataq wiñaypaq mana tukukuq simiqa chaymi.
[24] Qelqaqa ninmi: Llapa runapas qora hinallan. Hinallataq runaq tukuy sumaq rikch'aynipas qoraq t'ikan hinallan. Qoraqa naq'epunmi. Hinan t'ikanpas urmapullantaq.
[25] Señorpa siminmi ichaqa, wiñaypaqpuni takyan, nispa. (Isa. 40:6-8) Qankunaman willasqa allin willakuy simiqa chaymi.