Р’омайи 2
[1] Аwа ә’вдо, дьхwази к’и би, гава лома дьки, тӧ нькари хwә бесущ ки. Чаwа лома хәлqе дьки, ӧса жи тӧ хwә ломәк’ар дьки, чьмки тӧ кӧ лома дьки, хут wан тьшта дьки .
[2] Ле әм заньн кӧ диwана Хwәде wе бь р’астийе сәр wанда бе, йед кӧ тьштед ӧса дькьн.
[3] Аwа ә’вдо, тӧ кӧ лома хwәйе ван кьра дьки у тӧ хwәха жи wан тьшта дьки, тә т’ьре те жь диwана Хwәде бьр’әви?
[4] Йан жи тӧ кӧ дәwләмәндтийа ширьнайи, бәрбьһери у сәбьра Wи беһӧрмәт дьки, тӧ ньзани кӧ ширьнайийа Хwәде тә дьбә бәрбь т’обәкьрьне?
[5] Ле тӧ бь сәрһ’ьшки у дьлкәвьрийа хwә хәзәбе сәр хwәда дьщьвини, бона Р’ожа Хәзәбе, гава диwана Хwәдейә һәq хӧйа бә.
[6] Әwе wәкә ә’мәле һәр кәси бинә пешийа wан .
[7] Жийина һ’әта-һ’әтайе wе бьдә wан, йед кӧ т’ьме бь думька дьреж нава кьрьнед qәнщда нә, кӧ һӧрмәте, р’умәте у нәмьрийе дьхwазьн.
[8] Ле һерс у хәзәбе сәр wанда бә, йед кӧ к’ара хwә дьгәр’ьн, дәст жь р’астийе кьрьнә у хwә данә хьрабийе.
[9] Тәнгаси у зӧлме сәр wан һ’әмуйада бе, йед хьрабийе дькьн, пешийе сәр щьһуйа, паше сәр нәщьһуйа.
[10] Ле һӧрмәт, р’умәт у ә’дьлайи wе wан һ’әмуйар’а бә, йед кӧ qәнщийе дькьн, пешийе щьһур’а у паше нәщьһур’а.
[11] Чьмки ль щәм Хwәде фьрqи т’ӧнә .
[12] Әwед бейи Qануна Муса кӧ гӧнә дькьн, бейи Qанун жи wе ӧнда бьн, ле әwед хwәйиqанун кӧ гӧнә дькьн, бь Qануне жи wе диwана wан бьбә.
[13] Чьмки нә кӧ әwед Qануне дьбьһен ль бәр Хwәде р’аст ьн, ле әwед кӧ Qануне дьqәдиньн wе р’аст бенә һ’әсабе.
[14] Нәщьһуйед кӧ Qануна wан т’ӧнә, гава бе һ’әмде хwә хwәстьнед Qануне дьqәдиньн, бәле әwә бе Qанун ьн, хwәха бона хwә дьбьнә qанун.
[15] Чьмки әвана дьдьнә к’ьфше, кӧ хwәстьна Qануне дьле wанда ньвисар ә. Исафа wан жи шә’дәтийа ве йәке дьдә у фькьред wан щарна ль wан нәһәq дькьн, щарна бесущ дькьн.
[16] Wе Р’оже wе ӧса бә, гава Хwәде бь дәсте Мәсиһ Иса диwана тьштед мәрьвайә дьзива бькә, анәгори Мьзгинийа кӧ әз даннасин дькьм.
[17] Аwа тӧ щьһу тейи һ’әсабе, тә хwә спартийә Qануне у бь Хwәдейе хwә дьфьр’и,
[18] хwәстьна Wи зани у жь Qануне һин буйи, qәнщи-хьрабийе жь һәв дәрдьхи.
[19] У тӧ сәр хwә гӧман и, кӧ р’ебәре кора йи, р’онайийа бәр йед тә’рийеда,
[20] ширәтк’аре бефә’ма, дәрсдаре хьшима. Тӧ хwәда жи гӧман и, кӧ бь Qануне хут тӧ хwәйе т’әрзе занәбуне у р’астийе йи.
[21] Ле бәле аwа тӧ кӧ һәвале хwә һин дьки, хwәха хwә һин наки? Даннасин дьки, кӧ нәдьзьн, ле тӧ дьдьзи?
[22] Дьбежи: «Зьнийе нәкә», ле зьнийе дьки? Жь п’ута зьвер и, ле п’арьстгәһед wан т’алан дьки ?
[23] Бь Qануне дьфьр’и, ле Qануне дьт’әр’ьбини, Хwәде беһӧрмәт дьки?
[24] Чаwа ньвисар ә: «Р’уйе wә щьһуйада наве Хwәде нава нәщьһуйада те беһӧрмәткьрьне» .
[25] Бәле к’ара сьнәтийе wе һәбә, һәгәр Qануне бьqәдини. Ле һәгәр тӧ Qануне дьт’әр’ьбини, сьнәтбуна тә дьбә бесьнәти.
[26] Ӧса жи, һәгәр йе нәсьнәткьри т’әмийед Qануне бьqәдинә, нәсьнәтийа wи wе сьнәти нәйе һ’әсабе?
[27] У йе бьнйат’а хwәда нәсьнәткьри кӧ Qануне дьqәдинә, wе диwана тә бькә, кӧ тӧ хwәйе ньвисар у сьнәтийе йи, ле Qануне дьт’әр’ьбини.
[28] Чьмки щьһу нә әw ә, кӧ дәрвава йә у сьнәти нә әw ә, кӧ дәрвава сәр бәдәне йә.
[29] Ле щьһу әw ә, йе кӧ дьле хwәда щьһу йә у сьнәтийа р’аст дьле сьнәтбуйи йә, бь Р’ӧһ’, нә бь Qануна ньвисар. Йе һа, нә кӧ мәрьв п’әйе wи дьдьн, ле Хwәде .