Луqа 1
[1] Т’ейофилойе хwәйиqәдьр, ньһа гәләка дәстпекьрийә сәрһатийа wан тьштед нава мәда буйи ӧса р’ез кьн,
[2] чаwа әwед кӧ пешийе бь ч’ә’ве хwә дитьбун у әв Мьзгини бәла дькьрьн, мәр’а готьн.
[3] Әз жи чаwа йәки һе зува р’аст пәй wан һ’әму тьшта дьчум, мьн р’е тер’а дит кӧ бь һур-гьли тәр’а бьньвисьм,
[4] wәки тӧ р’астийа wан тьштед кӧ һин буйи, бьзаньби.
[5] Чахе Һеродәс п’адшайе Щьһустане бу, к’аһинәк жь бәрәка Әбийа һәбу, наве wи Зәкәрийа бу. Жьна wи жи жь ә’сьле Һарун бу, наве wе Елизабет.
[6] Әвана һәр дӧ жи ль бәр Хwәде р’аст бун у нав һ’әму т’әми у qанунед Хӧданда беqӧсур дьчун.
[7] Ле зар’ед wан т’ӧнәбун, чьмки Елизабете зар’ нәданин у һәр дӧйа жи ә’мьре хwә дәрбаз кьрьбун.
[8] Аwа чахе Зәкәрийа дора бәрәка хwәда хьзмәтк’арийа к’аһинтийе ль бәр Хwәде дькьр,
[9] бь ә’дәте к’аһинтийеда п’әшк wир’а к’әт, кӧ һәр’ә п’арьстгәһа Хӧдан, бьхуре бьшәwьтинә.
[10] У дәма шәwьтандьна бьхуре, т’әмамийа щьмә’те дәрва дӧа дькьр.
[11] Һьнге мьлйак’әте Хӧдан wива хӧйа бу у алийе р’астева к’еләка горигәһа бьхуре сәкьни.
[12] Чахе Зәкәрийа дит, т’әвиһәв бу у саw к’әтә сәр wи.
[13] Ле мьлйак’әт wир’а гот: «Зәкәрийа, нәтьрсә! Дӧа тә һатә бьһистьне, к’ӧлфәта тә Елизабете тәр’а кӧр’әки бинә у те наве wи Йуһ’әнна дайни.
[14] Әwе тәр’а бьбә әшq у шайи у гәләке бь буйина wи ша бьн.
[15] Чьмки әwе ль бәр Хӧдан мәзьн бә. Т’ӧ щар гәрәке шәрав-араqе вәнәхwә . У һе зьке дийа хwәда, wе бь Р’ӧһ’е Пироз т’ьжи бә.
[16] Wе жь зар’ед Исраеле гәләка бәрбь Хӧдан Хwәдейе wан вәгәр’инә.
[17] Әwе бь р’ӧһ’ у qәwата Елйас п’ехәмбәр пешийа Хӧданва һәр’ә , wе дьле бава сәр зар’ада у нәельма бәрбь фә’мдарийа р’аста вәгәр’инә, wәки щьмә’тәке бона Хӧдан һазьр кә».
[18] Зәкәрийа мьлйак’әтр’а гот: «Әзе ве йәке чаwа бьзаньбьм? Әз кал ьм у к’ӧлфәта мьн жи ә’мьре хwә иди дәрбаз кьрийә» .
[19] Мьлйак’әт ле вәгәр’анд у готе: «Әз Щьбрайил ьм, кӧ ль бәр Хwәде дьсәкьньм. У әз һатьмә шандьне, кӧ тәр’а бежьм у ве мьзгинийе бьдьмә тә .
[20] Ва те лал би у нькарьби хәбәр ди, һ’әта wе р’ожа кӧ әв тьшт бенә сери, чьмки тә әw готьнед мьн баwәр нәкьрьн, кӧ wе wәхте хwәда бенә сери».
[21] Һ’әта һьнге щьмә’т һивийа Зәкәрийа бу у ә’щебмайи дьман, кӧ әw п’арьстгәһеда дәрәнги дьк’әт.
[22] У чахе әw дәрк’әтә дәрва, иди нькарьбу wанар’а хәбәр да. Wана шьк бьр, кӧ п’арьстгәһеда тьшт һатийә ль бәр ч’ә’ва. У әwи бь нишана wанар’а хәбәр дьда у лал ма.
[23] Гава р’ожед хьзмәткьрьна wи хьлаз бун, чу мала хwә.
[24] Пәй wан р’ожар’а, к’ӧлфәта wи, Елизабет һ’әмлә дәрк’әт, пенщ мәһа әwе хwә вәдьшарт у дьгот:
[25] «Әв чь йәк бу ван р’ожада Хӧдан бона мьн кьр, һ’але мьнда ньһер’и у qара мьн жь нав мәрьва да һьлдане».
[26] Мәһа шәшада Хwәде мьлйак’әт Щьбрайил шандә бажарәки Щәлиле кӧ наве wи Ньсрәт бу,
[27] щәм qизәкә бьк’ьр, йа кӧ мәрьвәки бь наве Усьве мала Даwьдр’а нишанкьри бу. Наве qизьке Мәрйәм бу.
[28] Мьлйак’әт wева хӧйа бу у готе: «Сьлав ль тә qизька к’әрәм ле буйийе, Хӧдан т’әви тә йә ».
[29] Әwа сәр готьна wи т’әвиһәв бу у фькьри: «Гәло әв чь сьлав ә?»
[30] У мьлйак’әт жер’а гот: «Мәрйәм, нәтьрсә! Чьмки тә к’әрәм жь Хwәде станд.
[31] Ва те һ’әмлә дәрейи Кӧр’әки бини у наве Wи Иса дайни.
[32] Әwе мәзьн бә у Кӧр’е Йе Һәри Жорьн wе бе готьне. У Хӧдан Хwәде wе т’әхте баве Wи Даwьд бьдә Wи.
[33] Әwе һ’әта-һ’әтайе п’адшатийе сәр мала Аqуб бькә у хьлазийа П’адшатийа Wи wе т’ӧнәбә».
[34] Мәрйәме мьлйак’әтр’а гот: «Әв йәке чаwа бьбә, чьмки әз һәла һе qиз ьм?»
[35] Мьлйак’әт ле вәгәр’анд у гот: «Р’ӧһ’е Пироз wе бе сәр тә у qәwата Йе Һәри Жорьн wе сәр тә бькә си. Бона ве йәке әw Пирозе кӧ wе жь тә бьбә, әw Кӧр’е Хwәде wе бе готьне.
[36] Ва йә омьда тә Елизабет жи, йа кӧ безӧр’әт дьһатә готьне, wе мәзьнайийа хwәда әва мәһа шәша йә кӧр’әкида һ’әмлә йә.
[37] Чьмки щәм Хwәде тьштәки нәбуйине т’ӧнә».
[38] Wи чахи Мәрйәме гот: «Әз щарийа Хӧдан ьм. Бьра анәгори готьна тә бона мьн бьбә». У мьлйак’әт жь щәм wе чу.
[39] Wан р’ожада Мәрйәм р’абу ләз чу алийе ч’ийа, бажарәки Щьһуда.
[40] Әw к’әтә мала Зәкәрийа у сьлав да Елизабете.
[41] Гава Елизабете сьлава Мәрйәме бьһист, зар’ок зьке wеда львийа. Елизабет Р’ӧһ’е Пирозва т’ьжи бу
[42] у бь дәнгәки бьльнд кьрә гази гот: «Тӧ нав к’ӧлфәтада бьмбарәк и у бәре зьке тәда жи бьмбарәк ә.
[43] Әв чь бәхтәwарик ә кӧ дийа Хӧдане мьн сәр мьнда һат?
[44] Гава дәнге сьлава тә к’әтә гӧһе мьн, зар’ок зьке мьнда жь шабуна лист.
[45] Хwәзи ль wе, кӧ готьна Хӧдан баwәр дькә, кӧ чь жер’а һатийә готьне, wе бе сери».
[46] Мәрйәме гот : «Нәфса мьн пәсьне Хӧдан дьдә
[47] у р’ӧһ’е мьн бь Хwәде Хьлазкьре мьн ша дьбә,
[48] чьмки Әwи бәре Хwә мьлуктийа щарийа Хwәда кьр. Ва жь вьр шунда һ’әму ньсьле хwәзийа хwә ль мьн биньн,
[49] чьмки Хwәдейе Зор бона мьн тьштед п’ьр’ мәзьн кьрьн. Наве Wи пироз ә.
[50] Р’ә’ма Wи qьр’нә-qьр’нә ль сәр wан ә, йед кӧ жь Wи дьтьрсьн.
[51] Qәwата дәсте Хwә Әwи да к’ьфше у йед кӧ дьле хwәда к’ӧбар-бабах ьн бәла-бәлайи кьрьн.
[52] Йед qәwат жь к’ӧрсийа анин хwаре у йед мьлук бьльнд кьрьн .
[53] Йед бьр’чи бь тьштед qәнщ т’ер кьрьн у йед дәwләти дәствала вәр’екьрьн.
[54] Р’ә’ма Хwә ани бира Хwә, али хӧламе Хwә, Исраел кьр,
[55] чаwа кал-бавед мә, Бьраһим у зӧр’әта wир’а бона һ’әта-һ’әтайе созе Хwә дабу» .
[56] Мәрйәм wәкә се мәһа щәм Елизабете ма, паше вәгәр’ийа мала хwә.
[57] Аwа дәма wәльдандьна Елизабете пер’а гьһишт, кӧр’әк жер’а бу.
[58] Һәвал-һогьред wе бьһистьн кӧ Хӧдан р’ә’ма хwәйә мәзьн бона wе кьрийә, т’әви wе ша дьбун.
[59] Р’ожа һ’әйштада һатьн кӧ кӧр’ьк сьнәт кьн у наве баве wи Зәкәрийа ле кьн.
[60] Ле дийа wи гот: «На, наве wи гәрәке Йуһ’әнна бә».
[61] Wер’а готьн: «Нава мәрьвед тәда бь wи нави кәсәк т’ӧнә».
[62] Һьнге wана бь нишана жь баве wи пьрсин кӧ чь нави дьхwазә wи кә.
[63] Әwи жи т’әхтәк хwәст у ль сәр ньвиси: «Наве wи Йуһ’әнна йә». Һ’әму ә’щебмайи ман.
[64] Дәстхwәда зар-зьмане wи вәбу, хәбәр да, шькьри да Хwәде.
[65] Тьрсе һ’әму щинаред wан гьрт у т’әмамийа ч’ийайед Щьһустанеда бона ве йәке дьһатә готьне.
[66] Һ’әмуйед кӧ дьбьһистьн, бира хwәда хwәй дькьрьн, дьготьн: «Гәло әв кӧр’ьке бьбә чь?» Чьмки дәсте Хӧдан пер’а бу.
[67] Баве wи Зәкәрийа бь Р’ӧһ’е Пироз т’ьжи бу, п’ехәмбәрти кьр у гот:
[68] «Шькьр жь Хӧдан Хwәдейе Исраелер’а кӧ сәрик да щьмә’та Хwә у азайи жер’а ани .
[69] Жь мала хӧламе Хwә Даwьд бона мә Хьлазкьрәки зор р’акьр,
[70] чаwа Әwи һе бәреда бь дәве п’ехәмбәред Хwәйә пироз готийә,
[71] кӧ әм жь дьжмьнед хwә у дәсте һ’әму хернәхwаза хьлаз бьн ,
[72] р’ә’ме кал-бавед мә бькә, пәймана Хwәйә пироз
[73] у wе сонда кӧ баве мә Бьраһимр’а хwар бир бинә ,
[74] wәки жь дәсте дьжмьна азабуйи, әм бькарьбьн бе тьрс у хоф,
[75] һ’әму р’ожед ә’мьре хwәда, р’аст у һ’әлал Wи бьһ’әбиньн.
[76] Тӧ, ло кӧр’ько, те п’ехәмбәре Йе Һәри Жорьн бейи готьне, те пешийа Хӧданва һәр’и, wәки р’ийа Wи һазьр ки
[77] у занәбуна азайийе бьди щьмә’та Wи бь бахшандьна гӧнед wан.
[78] Жь р’ә’м у һ’ӧба Хwәдейе мә чаwа жорда р’о кӧ дәрте, ӧса wе сәрики бьдә мә,
[79] wәки йед кӧ тә’ристанийе у бьн сийа мьрьнеда дьминьн р’онайи кә у ньгед мә дайнә сәр р’ийа ә’дьлайийе» .
[80] Кӧр’ьк мәзьн дьбу у бь р’ӧһ’ qәwат дьгьрт у һ’әта р’ожа Исраелева хӧйа бу жи ль бәр’ийе дьма.