<Ибрани 2

[1] Бона ве йәке гәрәке әм һе гәләки гӧһ бьдьнә wан тьштед мә бьһистьнә, wәки әм жь wан нәхальфьн.

[2] Чьмки һәгәр әw хәбәра пе мьлйак’әта һатә готьне һ’имгьрти ма у һ’әму нәһәqийе у беельмийе һәqе хwә р’аст стандьн,

[3] ле әме чаwа хwә хьлаз кьн һәгәр әм гӧһ нәдьнә wе хьлазбуна мәзьн? Бона ве хьлазбуне Хӧдан пешда даннасин кьр у йед кӧ дәнге Wи бьһистьн мәва ә’сәйи кьрьн.

[4] Сәрда жи Хwәде бь нишана, к’әрәмәта, щур’ә-щур’ә кьред qәwат у п’ешк’ешед Р’ӧһ’е Пирозә бәлакьри шә’дәти да, чаwа кӧ ә’мьре Wи бу.

[5] Хwәде нә кӧ мьлйак’әт кьрьнә сәрwеред wе дьнйа кӧ wе бе, сәр к’ижане әм хәбәр дьдьн.

[6] Ле ньвисар щики шә’дәтийе дьдә у дьбежә: «Йа Хwәде, инсан чь йә кӧ wи бир тини, йан бәнде ве дьне кӧ бона wи хәм дьки?

[7] Тә һьнәк wәхт әw жь мьлйак’әта ньмьзтьр кьр, бь р’умәт у һӧрмәте әw т’ащ кьр,

[8] һ’әму тьшт кьрьнә бьне ньгед wи» . Аwа Йе кӧ һәр тьшт кьрьнә бьне ньгед wи , тьштәк нәһьшт кӧ нәкьрьбә бьне ньга. Ле ньһа әм һе һәр тьшти бьне ньгед инсенда набиньн.

[9] Ле әм ньһа Иса бь р’умәт у һӧрмәт к’офи ль сери дьбиньн, Йе кӧ һьнәк wәхт бона щәфе мьрьне жь мьлйак’әта һатьбу ньмьзкьрьне, wәки бь к’әрәма Хwәде бона һ’әмуйа мьрьн бьдита.

[10] Бәле һежа бу кӧ Хwәде, Йе кӧ һәр тьшт бона Хwә ә’фьрандийә у бь дәсте Хwә хwәй дькә Р’ебәре хьлазбуна wан бь щәфа к’амьл бькьра , wәки гәләк лаw т’әви р’умәта Иса бькьрана.

[11] Әwе кӧ пироз дькә у әwед кӧ пироз дьбьн, әв һ’әму жи жь Бавәки нә. Ләма Әw ве йәкеда шәрмийе набинә, кӧ wан хушк-бьрайед Хwә һ’әсаб кә

[12] у дьбежә: «Дәрһәqа наве Тәда Әзе хушк-бьрайед Хwәр’а бежьм, щьвинеда Әзе әшqи Тә бьстрем» .

[13] У аһа жи дьбежә: «Әзе гӧмана Хwә бьдьмә сәр Хwәде» . У аһа жи: «Ва мә Әз у әw зар’ед кӧ Хwәде данә Мьн» .

[14] Чаwа кӧ зар’ хун у гошт ьн, Иса Хwәха жи бу мина wан, к’әтә бьнйат’а мәрьвайе, wәки бь ви аwайи пе мьрьна Хwә, йе кӧ һ’ӧкӧме wи сәр мьрьне һәйә ӧнда кә, аwа готи мирещьн

[15] у йед кӧ т’әмамийа ә’мьре хwәда һесиред тьрса мьрьне бунә хьлаз кә.

[16] Бәле фә’мдари йә, кӧ Әw алик’арийа мьлйак’әта накә, ле алик’арийа зӧр’әта Бьраһим дькә.

[17] Ләма жи Иса гәрәке бь һәр алийава бьбуйа мина хушк-бьра, кӧ бьбуйа сәрәкк’аһинәки р’ә’м у амьн ль хьзмәтк’арийа бәр Хwәдеда, wәки гӧнед щьмә’те бьда к’әwандьне .

[18] Чаwа Әwи щәфа к’ьшанд, һатә щер’ьбандьне, ӧса жи дькарә алик’арийа wан бькә, йед кӧ дьк’әвьнә нава щер’ьбандьне.