<Galatî 3

[1] Гәли галатийед беһ’ьш! К’е сәре wә т’ьжи кьр? Нә ахьр Иса Мәсиһ ль бәр ч’ә’ве wә хачбуйи һатә дийаркьрьне?

[2] Әз т’әне ве йәке дьхwазьм жь wә бьзаньбьм: Wә Р’ӧһ’е Хwәде бь Qанун qәдандьне станд, йан бь Мьзгини бьһистьне у баwәрийа хwә же анине?

[3] Чьма һун һаqас беһ’ьш ьн, кӧ wә бь Р’ӧһ’е Хwәде дәстпекьр у ньһа бь мәрьвайи хьлаз дькьн?

[4] Һаqас тьшт бадиһәwа һатьнә сәре wә? Наqәwьмә кӧ бадиһәwа бьн!

[5] Чьма әw Хwәдейе кӧ Р’ӧһ’е Хwә п’ешк’еши wә дькә у нава wәда к’әрәмәта дькә, бона Qанун qәдандьна wә дькә, йан бона кӧ wә Мьзгини бьһист у баwәрийа хwә же ани?

[6] Мәсәлә, бона Бьраһим аһа ньвисар ә: «Бьраһим Хwәде баwәр кьр у әw йәк жер’а р’асти һатә һ’әсабе» .

[7] Аwа заньбьн, йед кӧ баwәр дькьн әw ьн зар’ед Бьраһим .

[8] Ньвисаре һе пешда дабу к’ьфше, кӧ Хwәде нәщьһу бь баwәрийе wе р’аст һ’әсаб бькьрана у зува Мьзгини дабу Бьраһим кӧ: «Бь тә дӧайе һ’әму мьләта бьбә» .

[9] Аwа әwед кӧ баwәр дькьн, т’әви Бьраһиме баwәрмәнд дӧа ль wан те кьрьне.

[10] Әwед кӧ хwә спартьнә кьред Qануне, әw бьне ньфьр’еда нә, чьмки ньвисар ә: «Ньфьр’ ль һәр кәси йә, йе кӧ нава һ’әму ньвисаред к’ьтеба Qанунеда наминә у наqәдинә» .

[11] Ә’йан ә т’ӧ кәс бь Qануне нькарә ль бәр Хwәде р’аст бе һ’әсабе, чьмки ньвисар ә: «Йе р’аст wе бьжи, чьмки баwәр дькә» .

[12] Ле Qанун бь баwәрийе нинә, ле бәле чаwа ньвисар дьбежә: «К’и кӧ т’әмийед Qанунебьqәдинә бь wан wе бьжи» .

[13] Мәсиһ әм жь wе ньфьр’а Qануне к’ьр’ин, әw дәwса мә к’әтә бьн wе ньфьр’е, чьмки ньвисар ә: «Ньфьр’ сәр йе дарва дардакьри йә» .

[14] Әв йәк бу, wәки бь Мәсиһ Иса дӧайе Бьраһим бе сәр нәщьһуйа, кӧ бь баwәрийе әм Р’ӧһ’е создайи бьстиньн.

[15] Хушк-бьрано! Әз тиньмә сәр ә’дәте дьне. Һәгәр йәки wәсийәтәк т’әстиq кьрьбә, т’ӧ кәс нькарә wе бәтал кә, йан жи тьштәки дьн сәрда зедә кә.

[16] Аwа әw соз Бьраһим у зӧр’әта wир’а һатьнә дайине. Ньвисареда найе готьне: «Зӧр’әтед тә» чаwа бона гәләка, ле бона йәки: «Зӧр’әта тә» у әw зӧр’әт Мәсиһ ә.

[17] Аwа готи әз ве йәке дьбежьм, әw wәсийәта кӧ пешда жь Хwәдеда һатьбу т’әстиqкьрьне, Qануна кӧ чарсьд си сали шунда дәрк’әт, нькарә ӧса бькә, wәки wәсийәта создайи qәwата хwә ӧнда кә .

[18] Чьмки һәгәр wарти Qанунева гьредайи буйа, wе создайинева гьредайи нибуйа, ле Хwәде бь соз п’ешк’еши Бьраһим кьр .

[19] Иди мәрәме Qануне чь бу? Qанун сәрда зедә бу кӧ нәһәqи бе наскьрьне у гәрәке әw бьма һ’әта һатьна Зӧр’әта wи, к’ижанир’а соз дабу. Qанун жь алийе мьлйак’әтада, бь дәсте навчетийа йәки һатә дайине .

[20] Бона wәсийәткьрьне навчети нә лазьм ә гава wәсийәт бь дәсте йәки те кьрьне у ль вьр әw йәк т’әне Хwәде йә.

[21] Аwа Qанун мьqабьли созед Хwәде йә? Т’ӧ щар! Бәле һәгәр qанунәк һәбуйа, кӧ бькарьбуйа жийин бьда, һьнге ә’сәйи р’астһ’әсаббун wе бь qануне бьбуйа.

[22] Ле ньвисар һ’әмуйа бьн һесиртийа гӧнәда дьдә к’ьфше, wәки чь кӧ бь Иса Мәсиһ баwәркьрьне һатьбунә создайине, баwәрмәндар’а бенә дайине.

[23] Бәри һатьна баwәрийе, әм бьн дәсте Qанунеда чаwа гьрти дьһатьнә хwәйикьрьне, һ’әта хӧйабуна wе баwәрийе кӧ wе бьһата.

[24] Бь ви аwайи Qанун бу т’әрбәтдаре мә у әм бәрбьр’и Мәсиһ анин , кӧ әм бь баwәрийе р’аст бенә һ’әсабе.

[25] Ле ньһа кӧ баwәри һат, әм иди нә бьн дәсте т’әрбәтдаре Qанунеда нә.

[26] Бь баwәрийе һун һ’әму йәктийа Мәсиһ Исада лаwед Хwәде нә .

[27] Һун һ’әму кӧ йәктийа Мәсиһда һатьнә ньхӧмандьне, wә Мәсиһ сәр хwә wәргьртийә.

[28] Иди фьрqи нә нава щьһу у нәщьһуйада һәйә, нә нава хӧлам у азайада, нә жи нава мера у жьнада, чьмки һун һ’әму жи йәк ьн йәктийа Мәсиһ Исада.

[29] У һәгәр һун п’ара Мәсиһ ьн, wәки ӧса йә зӧр’әта Бьраһим ьн у wаред wи сози нә .