[1] Жь Паwлос, Силас у Тимот’ейо, щьвина Т’есалоникийар’а, йа кӧ п’ара Баве мә Хwәде у Хӧдан Иса Мәсиһ ә:
[2] Дә бьра к’әрәм у ә’дьлайийа Хwәде, Баве мә у Хӧдан Иса Мәсиһ ль wә бә.
[3] Әм дәйндар ьн, кӧ һәр гав бона wә р’азибуне бьдьнә Хwәде хушк-бьрано у әв йәк һәq ә жи, чьмки баwәрийа wә р’ьнд дьгьһижә у һ’ьзкьрьна wә һьндава һәвда зедә дьбә.
[4] Ләма әм хwәха жи нава щьвинед Хwәдеда пе wә дьфьр’ьн, бона сәбьр у баwәрийа wә, чьмки һун wан һ’әму зерандьн у тәнгасийа дьк’ьшиньн, йед кӧ тенә сәре wә.
[5] Әв йәк избат дькә, кӧ диwана Хwәде р’аст ә. У бь ви аwайи һуне һежайи П’адшатийа Хwәде бьн, бона к’ижане жи һун wан тә’ли-тәнгийа дьбиньн.
[6] Бәле әв ә һәqийа Хwәде: Йед тәнгасийе дьдьнә wә, Хwәде жи wе wан бьдә тәнгасийе
[7] у йед жь wә тәнгасийеда нә, т’әви мә бьдә һесакьрьне. Әве аһа бә, гава Хӧдан Иса т’әви мьлйак’әтед Хwәйә зор жь ә’зменва бь к’ура егьр хӧйа бә,
[8] wәки һ’әйфе жь wан һьлдә, йед кӧ нахwазьн Хwәде нас кьн у гӧр’а Мьзгинийа Хӧдане мә Иса накьн.
[9] Әwе бәла хwә жь wеранбуна һ’әта-һ’әтайе бьбиньн, жь һ’ьзура Хӧдан у р’умәта qәwата Wи бенә авитьне,
[10] гава wе Р’оже Әw бе, wәки нава щьмә’та Хwәда бе пәсьндайине у һ’әму баwәрмәнд wе һ’әйр-һ’ӧжмәк’ар бьн. Һуне жи нава wанда бьн, чьмки wә баwәрийа хwә шә’дәтийа мә ани.
[11] Бона ве йәке әм һәр гав бона wә дӧа дькьн, кӧ Хwәдейе мә, wә һежайи wе газийе кә у һ’әму нет-мәрәмед wәйә qәнщ у кьрьнед wәйә жь баwәрийе бь qәwате бинә сери.
[12] Бь ви аwайи wе пәсьне наве Хӧдане мә Иса ль нава wәда бе дайине у һуне жи нава Wида бенә пәсьндайине, ль гора к’әрәма Хwәдейе мә у Хӧдан Иса Мәсиһ.