<Йуһ’әнна II

[1] Жь бәрпьрсийаре щьвине, Ханьма бьжарти у зар’ед wер’а, к’ижана кӧ әз бь р’астийе һ’ьз дькьм, нә кӧ т’әне әз, ле әw һ’әму жи, йед кӧ р’астийе нас дькьн,

[2] чьмки әw р’асти нава мәда дьминә у һ’әта-һ’әтайе wе т’әви мә бә.

[3] Дә бьра р’ә’м, к’әрәм у ә’дьлайи жь Бав Хwәде у Иса Мәсиһе Кӧр’е Баве, бь р’астийе у һ’ьзкьрьн мәр’а бә.

[4] Әз п’ьр’ ша бум, кӧ мьн жь зар’ед тә һьнәк дитьн, йед кӧ нава р’астийеда дьжин, ль гора wе т’әмийа кӧ мә жь Баве стандийә.

[5] Ньһа әз һиви жь тә дькьм, Ханьме, әз т’әмикә ну тәр’а наньвисьм, ле йа кӧ бәре пешда ль мә һәбу, кӧ әм һ’әму һәвдӧ һ’ьз бькьн .

[6] Һ’ьзкьрьн әв ә, кӧ әм ль гора т’әмийед Wи бьжин. Т’әми әw ә, йа кӧ wә һе бәре пешда бьһистийә, wәки һун һ’ьзкьрьнеда бьжин .

[7] Гәләкед кӧ хәлqе жь р’е дәрдьхьн һатьнә дьне, әw Иса Мәсиһ бь хун у гошт һати иqрар накьн. Йед аһа хәлqе жь р’е дәрдьхьн у әк’симәсиһ ьн.

[8] Һун һаш жь хwә һәбьн, wәки һун к’әда хwә ӧнда нәкьн, ле һәqе хwә т’әмам бьстиньн .

[9] Һәр кәсе кӧ хwә пешда давежә у нава һинкьрьна Мәсиһда наминә, Хwәдейе wи т’ӧнә. Йе кӧ нава һинкьрьна Мәсиһда дьминә, бона wи Бав жи һәйә, Кӧр’ жи һәйә.

[10] Һәгәр йәк бе щәм wә у ве һинкьрьне нәйнә, һун wи qәбул нәкьнә малед хwә у сьлаве нәдьнә wи.

[11] Чьмки к’и сьлаве бьдә wи, әw т’әви кьред wийә хьраб дьбә.

[12] Гәләк тьштед мьнә ньвисаре wәр’а һәнә, ле мьн нәхwәст сәр к’ахазе бь һ’ӧбьре бьньвисьм, чьмки гӧмана мьн һәйә әзе хwәха бемә щәм wә у р’у бь р’у т’әви wә хәбәр дьм, wәки әшqа мә т’әмам бә.

[13] Зар’ед хушка тәйә бьжарти ль тә сьлав дькьн.