[1] Әм жи чаwа һәвал-хәбатед Хwәде иди һиви жь wә дькьн, йед кӧ к’әрәма Хwәде стандьнә, нәһельн кӧ әw к’әрәм бефәйдә бә.
[2] Чьмки Хwәде дьбежә: «Дәма р’ә’м-к’әрәме Мьн дәнге тә бьһист у р’ожа хьлазбунеда һатьмә һәwара тә» . Ва ньһа йә дәма р’ә’м-к’әрәме! Ва ньһа йә р’ожа хьлазбуне!
[3] Әм дькьн т’ӧ тьштида нәбьнә байисе к’әтьна т’ӧ кәси, wәки qӧльхе мә нәйе ломәк’аркьрьне.
[4] Ле һәр тьштида әм хwә бь сәбьра хwәйә мәзьн дьдьнә к’ьфше, чаwа qӧльхк’аред Хwәде: Тә’ли-тәнгийада, һесири-бәләнгазийа у дәрд-кӧлада,
[5] леданада, кәлада у һәр алийава һ’ьщумкьри, к’әсьри, бехәw, бьр’чи ,
[6] бь ньхта һ’әлал, бь занәбуне, бь дьле фьрә, бь ширьнайийе, бь Р’ӧһ’е Пироз у бь һ’ьзкьрьна беһ’ьләк’ари,
[7] бь готьна р’астийе у qәwата Хwәде. Әм бь дәсте ч’әп у р’асте жи р’астһ’әсабунева сильһ’кьри нә,
[8] һӧрмәте у беһӧрмәтийеда, qәдьр у р’әзилийеда. Мә һ’әсаб дькьн чаwа йед дәрәwин, ле әм сәр р’астийе нә,
[9] мә һ’әсаб дькьн чаwа йед нәнас, ле йед бь нав у дәнг ьн, чаwа йед мьри, ле ва йә әмә сах ьн, чаwа щәза станди, ле нәкӧшти нә,
[10] әм чаwа йед зәлулийеда нә, ле әм һәр т’ьм ша нә, чаwа йед бәләнгаз, ле әм гәләка дәwләти дькьн, чаwа к’ьфш дьбә йане тьштәки мә т’ӧнә, ле һәр тьштед мә һәнә.
[11] Мә вәкьри wәр’а хәбәр дайә гәли корьнт’ийа, дьле мә жи һьндава wәда фьрә йә.
[12] Һун жь алийе мәда бинтәнг набьн, ле һун бина хwә ль хwә тәнг дькьн.
[13] Әз чаwа т’әви зар’ед хwә хәбәр дьдьм, һун жи wәкә wе йәке ль мә вәгәр’иньн у дьле хwә мәр’а вәкьн.
[14] Т’әви нәбаwәра нәк’әвьнә бьне нирәки. Чь к’аре һәqийе т’әви нәһәqийе һәйә? Йан чь һәләqәтийа р’онайе т’әви тә’рийе?
[15] У чь т’ьфаqийа Мәсиһ т’әви щьн һәйә? Йан чь п’ар нава баwәрмәнда у нәбаwәрада һәйә?
[16] Йан жи чь һәвалтийа п’арьстгәһа Хwәде т’әви йа п’ута һәйә? Чьмки әм п’арьстгәһа Хwәдейе сах ьн! Чаwа Хwәде гот: «Әзе нава wанда бьминьм, нава wанда бьмәшьм, Хwәдейе wан бьм у әwе жи щьмә’та Мьн бьн» .
[17] Бона ве йәке «Хӧдан дьбежә: Дә р’абьн жь нава wан дәрен, щӧдә бьн. Ль тьштед һ’әрам нәк’әвьн, у Әзе wә qәбул кьм ,
[18] Баве wә бьм, һуне жи кӧр’ у qизед Мьн бьн, Хӧдане Һ’әму Зорайийе дьбежә ».