[1] Жь Паwлосе кӧ бь ә’мьре Хwәде шандитийа Мәсиһ Исар’а газикьри, т’әви Состенисе бьра,
[2] щьвина Хwәдейә Корьнт’ер’а, бӧһӧрти-жьбарәбуйийед йәктийа Мәсиһ Исада, йед пирозбунер’а газикьри, т’әви wан һ’әмуйед кӧ һәр дәра гази наве Хӧдане мә Иса Мәсиһ дькьн, Әw Хӧдане wан у мә йә:
[3] Дә бьра к’әрәм у ә’дьлайийа Хwәдейе Баве мә у Хӧдан Иса Мәсиһ ль wә бә.
[4] Әз һәр гав бона wә шькьрийе дьдьмә Хwәдейе хwә, бона wе к’әрәма Wи, йа кӧ бь сайа Мәсиһ Иса wәр’а һатийә дайине.
[5] Бәле һун бь йәктийа Wи һәр тьштида дәwләти бун, һәр хәбәрдане у һәр занәбунеда.
[6] Һинкьрьна дәрһәqа Мәсиһда нава wәда һ’име хwә ӧса гьртийә,
[7] кӧ һун кемасийа т’ӧ п’ешк’еше нак’ьшиньн, гава һивийа хӧйабуна Хӧдане мә Иса Мәсиһ ьн.
[8] Әwе wә һ’әта хьлазийе һ’имгьрти хwәй кә, кӧ һун Р’ожа һатьна Хӧдане мә Иса Мәсиһ беләк’ә бьн.
[9] Амьн ә әw Хwәдейе кӧ гази wә кьр, wәки һун т’әви Кӧр’е Wи Иса Мәсиһе Хӧдане мә бьн.
[10] Дә әз иди һиви жь wә дькьм хушк-бьрано, бь наве Хӧдане мә Иса Мәсиһ, бьра готьна wә һ’әмуйа йәк бә у дӧтирәти нава wәда т’ӧнәбьн, ле һ’әму жи бь һәвр’а бьн у сәр нет-мәрәмәки бьн.
[11] Чьмки мьн сальхе wә жь мала Хьлойе һьлда хушк-бьрано, кӧ нава wәда дә’w-доз һәнә.
[12] Аwа готи дьхwазьм бежьм, wәки нава wәда йәк дьбежә: «Әз Паwлоси мә», йәк дьбежә: «Әз Аполойи мә», йәк жи дьбежә: «Әз Пәтруси мә» у йәки дьн жи дьбежә: «Әз Мәсиһи мә».
[13] Чьма Мәсиһ п’арәвәбуйи йә? Чьма Паwлос бона wә хач буйә? Йан бь наве Паwлос һун пе аве һатьнә ньхӧмандьне?
[14] Әз жь Хwәде р’ази мә, кӧ мьн жь wә т’ӧ кәс нәньхӧманд, пештьри Кьриспо у Гайос.
[15] Ньһа т’ӧ кәс нькарә бежә, кӧ һун бь наве мьн һатьнә ньхӧмандьне.
[16] (Р’аст ә мьн мала Стәйфан жи ньхӧманд. Ле wәки майин найе бира мьн, кӧ мьн йәки дьн ньхӧмандьбә.)
[17] Чьмки Мәсиһ әз ньхӧмандьнер’а нәшандьм, ле Мьзгинидайинер’а у әз ве йәке надьмә зора хәбәрдана зьмен, кӧ нәбә qәwата хаче Мәсиһ бәр тьштәки нәйе һ’әсабе.
[18] Р’аст ә һинкьрьна дәрһәqа хачда ӧндабуйийар’а беһ’ьши йә, ле мә хьлазбуйийар’а, qәwата Хwәде йә.
[19] Чаwа ньвисар ә: «Әзе сәрwахтийа сәрwахта ӧнда кьм у билантийа билана бәтал кьм» .
[20] К’анен сәрwахт? К’анен занә? К’анен аqьлмәндед ве дьнйайе? Нә сәрwахтийа ве дьнйайе Хwәде кьрә беһ’ьши?
[21] Чьмки сәрwахтийа Хwәде нәһьшт кӧ дьнйа бь сәрwахтийа хwә Wи нас кә, ле ль Хwәде хwәш һат, бь wе һинкьрьна «беһ’ьши» йед кӧ баwәр дькьн хьлаз кә.
[22] Щьһу к’әрәмәта дьхwазьн у йунан жи сәрwахтийе дьгәр’ьн.
[23] Ле әм, Мәсиһе хачбуйи даннасин дькьн, щьһуйар’а п’ьшкбун ә, нәщьһуйар’а жи беһ’ьши,
[24] ле бона йед кӧ Хwәде гази wан дькә, һәгәр щьһу бьн, һәгәр нәщьһу, әw хәбәр Мәсиһ ә, qәwата Хwәде у сәрwахтийа Хwәде.
[25] Чьмки әw кьред Хwәдейә кӧ бәр ч’ә’ве мәрьва беһ’ьши хӧйа дьбьн, әw жь сәрwахтийа мәрьвайе сәрwахттьр ьн у бәр ч’ә’ве мәрьва чьqас сьстийа Хwәде хӧйа дьбә, әw жь qәwата мәрьвайе qәwаттьр ә .
[26] Дина хwә бьдьне хушк-бьрано, һун к’и бунә кӧ Хwәдеда һатьнә газикьрьне: Алийе дьнеда жь wә гәләк нә сәрwахт бунә, жь wә гәләк дьнеда нә зор бунә у нә жи жь wә гәләк малед р’әнгинда бунә.
[27] Ле Хwәде беһ’ьшед дьне бьжартьн, wәки сәрwахта бьдә шәрме у сьстед дьне бьжартьн, wәки йед qәwат бьдә шәрме
[28] у Хwәде йед дьнебехәбәрә бер’умәт у йед нә т’ӧ тьшт бьжартьн, кӧ һәйинед бәрбьч’ә’в р’әт кә һәр’ә,
[29] wәки т’ӧ qул-бәндә ль бәр Хwәде пе хwә нәфьр’ә.
[30] Әwи һун т’әви Мәсиһ Иса кьрьн у Мәсиһ бона мә кьрә сәрwахти. Әм бь Wи р’аст тенә һ’әсабе, пироз у аза дьбьн.
[31] Аwа чаwа ньвисар ә: «Йе кӧ дьфьр’ә, бьра бь Хӧдан бьфьр’ә» .