[1] «ئەزم مێوا راستەقینە و بابێ من رەزڤانە.
[2] هەر چەقەكێ من یێ بەرهەمی نەدەت، رادكەت. لێ هەر چەقەكێ بەرهەمی بدەت، دكەزێخیت و پاقژ دكەت، دا پتر بەرهەمی بدەت.
[3] هوین نوكە ژ بەر وێ پەیڤا من بۆ هەوە گۆتی د پاقژن.
[4] د ناڤ من دا بنەجه ببن و ئەز د ناڤ هەوە دا. كا چەوا چەق ب خۆ نەشێت بەرهەمی بدەت ئەگەر د مێوێ دا یا بنەجه نەبیت، هوین ژی هەروەسا نەشێن ئەگەر د ناڤ من دا د بنەجه نەبن.
[5] ئەزم مێو و هوین چەقن. ئەوێ د ناڤ من دا یێ بنەجه بیت و ئەز د ناڤ وی دا، ئەو دێ بەرهەمەكێ زۆر دەت، چنكو بێی من هوین نەشێن تشتەكی بكەن.
[6] هەر كەسێ د ناڤ من دا بنەجه نەبیت، وەكو چەقی بۆ ژ دەرڤە دهێتە هاڤێتن، ئەڤجا هشك دبیت و كۆم دكەن، پاشی دهاڤێژنە ناڤ ئاگری و دهێتە سۆتن.
[7] ئەگەر هوین د ناڤ من دا بنەجه ببن و ئاخفتنێن من د ناڤ هەوە دا بنەجه ببن، هەوە چ دڤێت بخوازن، دێ بۆ هەوە ب جه هێت.
[8] ب ڤێ چەندێ بابێ من دهێتە مەزنكرن: هوین گەلەك بەرهەمی بدەن و ببنە شاگردێن من.
[9] كا چەوا بابی حەز ژ من كر، من ژی وەسا حەز ژ هەوە كر. ئەڤجا د ناڤ حەزژێكرنا من دا بنەجه ببن.
[10] ئەگەر هوین فەرمانێن من ب جه بینن، دێ د ناڤ حەزژێكرنا من دا بنەجه بن، هەروەكو من فەرمانێن بابێ خۆ ب جه ئیناین و د ناڤ حەزژێكرنا وی دا بنەجه دبم.
[11] من ئەڤ تشتە گۆتنە هەوە، دا دلخۆشیا من د ناڤ هەوە دا بیت و دلخۆشیا هەوە یا تەمام بیت.
[12] فەرمانا من ئەڤەیە: هوین حەز ژ ئێكودوو بكەن، هەروەكو من حەز ژ هەوە كری.
[13] كەسێ حەزژێكرنەكا ژ ڤێ مەزنتر نینە، كو ئێك ژیانا خۆ گۆری خۆشتڤیێن خۆ بكەت.
[14] هوین خۆشتڤیێن منن، ئەگەر هوین فەرمانێن من ب جه بینن.
[15] ئێدی ئەز نابێژمە هەوە ‹بەنی›، چنكو بەنی نزانیت خودانێ وی چ دكەت. لێ من گۆتە هەوە ‹خۆشتڤی›، چنكو هەر تشتێ من ژ بابێ خۆ بهیستی، من هوین تێگەهاندن.
[16] هەوە ئەز هەلنەبژارتم، لێ من هوین هەلبژارتن و دەستنیشان كرن كو هوین بچن بەرهەمی بدەن و بەرهەمێ هەوە بمینیت، داكو هەر تشتێ هوین ب ناڤێ من ژ بابی بخوازن، ئەو بدەتە هەوە.
[17] ئەز ڤێ فەرمانێ ل هەوە دكەم: هوین حەز ژ ئێكودوو بكەن.»
[18] «ئەگەر جیهانێ كەرب ژ هەوە ڤەببن، هوین بزانن كو بەری هەوە وێ كەرب ژ من ڤەببوون.
[19] ئەگەر هوین ژ جیهانێ بان، دا جیهان وەكو خەلكێ خۆ حەز ژ هەوە كەت. لێ چنكو هوین نە ژ جیهانێنە، بەلكو من هوین ژ جیهانێ هەلبژارتن، لەوما جیهانێ كەرب ژ هەوە ڤەدبن.
[20] بیرا خۆ بیننە وێ پەیڤا من گۆتیە هەوە: بەنی ژ خودانێ خۆ مەزنتر نینە . ئەگەر وان ئەز تەپەسەر كربم، دێ هەوە ژی تەپەسەر كەن و ئەگەر وان پەیڤا من ب جه ئینابیت، دێ پەیڤا هەوە ژی ب جه ئینن.
[21] لێ ئەو دێ ڤان هەمی تشتان ژ بەر ناڤێ من ب سەرێ هەوە ئینن، چنكو ئەو وی نانیاسن یێ ئەز هنارتیم.
[22] ئەگەر ئەز نەهاتبام و ل گەل وان نەئاخفتبام، دا د بێگونەه بن، لێ نوكە وان چ بەهانە بۆ گونەهێن خۆ نینە.
[23] ئەوێ كەرب ژ من ڤەببن، وی كەرب ژ بابێ من ژی ڤەدبن.
[24] ئەگەر من ئەو كار د ناڤبەرا وان دا نەكربان، یێن ژبلی من كەسێ نەكرین، دا د بێگونەه بن، لێ نوكە وان دیتن و كەرب ژ من و ژ بابێ من ژی ڤەبوون.
[25] لێ ئەڤ چەندە چێبوو دا ئەو پەیڤا د دەستوورێ وان دا هاتیە نڤیسین، ب جه بهێت: ‹وان بێی ئەگەر كەرب ژ من ڤەبوون.›
[26] دەمێ ئەو هاریكار دهێت، یێ ئەز دێ ژ نك بابی بۆ هەوە هنێرم، گیانێ راستیێ، ئەوێ ژ نك بابی دەردكەڤیت، دێ بۆ من شاهدەییێ دەت.
[27] هوین ژی دێ بۆ من شاهدەییێ دەن، چنكو هەر ژ دەستپێكێ هوین ل گەل من بوون.»