[1] ᓂᔭ ᒫᑲ, ᑭᐸᐋᐧᑲᐣ ᑳ ᑎᐯᔨᐦᒋᑫᐟ ᐅᐦᒋ, ᑭ ᐸᑯᓭᔨᒥᑎᓈᐋᐧᐤ ᑌᐸᑫᔨᑖᑯᓯᐃᐧᓂᕽ ᑭᑕ ᐱᒧᑖᑐᑕᒣᐠ ᐊᓂᒪ ᓇᑐᒥᑯᐃᐧᐣ ᑳ ᑭ ᐃᓯ ᓇᑐᒥᑲᐃᐧᔦᐠ,
[2] ᒥᓯᐁᐧ ᑕᐸᑌᔨᒧᐃᐧᓂᕽ ᒥᓇ ᔪᐢᑳᑎᓯᐃᐧᓂᕽ, ᑭᑭ ᓯᐯᔨᑕᒧᐃᐧᐣ, ᐁ ᓴᓯᐯᔨᑕᒫᑐᔦᐠ ᓵᑭᐦᐃᐁᐧᐃᐧᓂᕽ;
[3] ᐁ ᐋᑲᒣᔨᒧᔦᐠ ᑭᑕ ᑲᓇᐁᐧᔨᑕᒣᐠ ᐅ ᒫᒪᐃᐧᐃᐁᐧᐃᐧᐣ ᐊᐦᒑᕽ ᐁ ᒫᒪᐊᐧᐱᑎᑯᔦᐠ ᐯᔭᑕᑫᔨᒧᐃᐧᐣ.
[4] ᐯᔭᑲᐧᐣ ᒥᔭᐤ, ᒥᓇ ᐯᔭᑯ ᐊᐦᒑᕽ, ᑳ ᐃᓯ ᓇᑐᒥᑲᐃᐧᔦᐠ ᐁ ᐯᔭᑲᐧᕽ ᑳ ᐃᓯ ᐊᐢᐯᔨᒧᕽ ᑭ ᓇᑐᒥᑯᐃᐧᓂᐋᐧᕽ;
[5] ᐯᔭᑯ ᑳ ᑎᐯᔨᐦᒋᑫᐟ, ᐯᔭᑲᐧᐣ ᑖᐯᐧᔦᔨᑕᒧᐃᐧᐣ, ᐯᔭᑲᐧᐣ ᐹᑊᑕᐃᓯᐃᐧᐃᐧᐣ,
[6] ᐯᔭᑯ ᑭᓭᒪᓂᑐ ᒫᒪᐃᐧ ᑯᑖᐃᐧᓇᐤ, ᑳ ᒫᐊᐧᒋ ᑭᐦᒑᔨᐃᐧᐟ, ᑲᐦᑭᔭᐤ ᑳ ᐅᐦᒋ ᐊᔮᕽ, ᒥᓇ ᑳ ᑭᑭᐢᑳᑯᔦᐠ ᑲᐦᑭᔭᐤ.
[7] ᒫᑲ ᑲᐦᑭᔭᐤ ᑳ ᐃᑕᓯᔭᕽ ᑭ ᑭ ᒥᔨᑲᐃᐧᓈᓇᐤ ᓂᓱᑲᒫᑯᐃᐧᐣ ᐁ ᐃᐢᐱᑌᔨᑖᑲᐧᓂᔨᐠ ᐅ ᒣᑭᐃᐧᐣ ᙭.
[8] ᐁᐊᐧᑯ ᒫᑲ ᐅᐦᒋ ᐃᑌᐧᐤ, ᐃᐢᐱ ᐃᐢᐱᒥᕽ ᐁ ᐃᓯ ᐅᐱᐢᑳᐟ, ᑎᐯᔨᒥᑯᐃᐧᐣ ᑭ ᓯᐯᐧᑕᑖᐤ ᐁ ᑎᐯᔨᑕᕽ, ᒥᓇ ᑭ ᒥᔦᐤ ᒣᑭᐃᐧᓇ ᐊᔨᓯᔨᓂᐊᐧ.
[9] (ᐅᒪ ᒫᑲ ᑳ ᐃᑌᐧᕽ, ᑭ ᐅᐱᐢᑳᐤ, ᑫᑲᐧᐩ ᐁᐊᐧᑯ ᐁ ᑭ ᔮᓯᐟ ᒫᑲ ᓂᒑᔨᕽ ᐊᐢᑭᕽ?
[10] ᐊᓇ ᑳ ᑭ ᔮᓴᐢᑫᐟ ᐁᐊᐧᑯ ᒥᓇ ᑳ ᑭ ᐅᐱᐢᑳᐟ ᐃᐢᐱᒥᕽ ᐃᓯ ᑲᐦᑭᔭᐤ ᑭᓯᑲᐧ, ᑭᑕ ᑭ ᒧᐢᑭᓇᑖᐟ ᑲᐦᑭᔭᐤ ᑫᑲᐧᐩ.)
[11] ᐁᑯᓯ ᐋᑎᐦᐟ ᑭ ᐃᓯ ᒥᔦᐤ ᑭᑕ ᐊᐹᐢᑎᓬᐃᐃᐧᔨᐟ; ᒥᓇ ᐋᑎᐦᐟ, ᑭᑕ ᐅᑭᐢᑭᐁᐧᐦᐃᑫᐃᐧᔨᐟ; ᒥᓇ ᐋᑎᐦᐟ, ᑭᑕ ᒥᔮᐧᒋᒧᐃᐧᔨᓂᐃᐧᔨᐟ; ᒥᓇ ᐋᑎᐦᐟ, ᑭᑕ ᐊᔭᒥᐦᐁᐃᐧᔨᓂᐃᐧᔨᐟ ᒥᓇ ᑭᑕ ᑭᐢᑭᓄᐦᐊᒫᑫᔨᐟ;
[12] ᑭᑕ ᑭᓯᐃᑯᐃᐧᓯᒋᐠ ᐅᑲᓈᑎᓯᐊᐧᐠ, ᑭᑕ ᐊᑐᐢᑳᑕᒥᕽ ᐸᒥᐢᑖᑫᐃᐧᐣ, ᑭᑕ ᐊᑎ ᔭᑭᓯᒋᑳᑌᔨᐠ ᐃᐧᔭᐤ ᙭:
[13] ᐱᔨᐢ ᑲᐦᑭᔭᐤ ᑭᑕ ᐅᑎᑕᒪᕽ ᒫᒪᐃᐧ ᐊᔮᐃᐧᐣ ᑖᐯᐧᔦᔨᑕᒧᐃᐧᓂᕽ, ᒥᓇ ᐅ ᑭᐢᑫᔨᒥᑯᐃᐧᓂᕽ ᐊᓇ ᑭᓭᒪᓂᑐ ᐅᑯᓯᓴ, ᑭᑕ ᐅᑎᑕᒪᕽ ᐁ ᑮᓯᓂᑖᐃᐧᑭᐟ ᐊᔨᓯᔨᓂᐤ, ᐁ ᐃᐢᐱᑌᔨᑖᑲᐧᓂᔨᐠ ᐅ ᒫᒪᐁᐧᔨᑖᑯᓯᐃᐧᐣ ᙭:
[14] ᐁᑳ ᐁᑲᐧ ᐃᐧᑳᐨ ᑭᑕ ᐊᐋᐧᓯᓯᐃᐧᔭᕽ, ᑲᑭᐧᑯᐢᐠ ᑭᑕ ᐃᑖᐅᑯᔭᕽ ᒥᓇ ᑭᑕ ᐸᐹᒥ ᐁᐧᐹᐢᑎᒥᑯᔭᕽ ᑲᐦᑭᔭᐤ ᐁ ᐃᓯ ᑭᐢᑭᓄᐦᐊᒫᑫᕽ, ᐅ ᒪᒥᔪᐃᐧᓂᐋᐧᐤ ᐅᐦᒋ ᐊᔨᓯᔨᓂᐊᐧᐠ, ᐁ ᑲᑲᔦᔨᓯᒋᐠ, ᐁ ᐃᓯ ᐊᐧᓂᓯᒥᐁᐧᐠ ᓇᐢᐹᐨ ᑭᐢᑭᓄᐦᐊᒫᑫᐃᐧᐣ;
[15] ᒫᑲ ᑖᐯᐧᐃᐧᐣ ᐁ ᐃᑌᐧᔭᕽ ᓵᑭᐦᐃᐁᐧᐃᐧᓂᕽ, ᑭᑕ ᑭ ᐅᐱᑭᐢᑕᐋᐧᔭᕽ ᐃᐧᔭ ᒥᓯᐁᐧ ᐃᓯ, ᐊᓇ ᑳ ᐅᐢᑎᑳᐧᓂᐢᑲᕽ, ᐁᐊᐧᑯ ᙭;
[16] ᐁᑯᑕ ᐅᐦᒋ ᒥᓯᐁᐧ ᒥᔭᐤ ᐁ ᒫᒪᐃᐧ ᑕᑖᐸᐁᐧᐸᔨᐠ ᒥᓇ ᐁ ᒪᐢᑲᐃᐧ ᒫᒪᐊᐧᕽ ᐊᓂᒪ ᐅᐦᒋ ᐁ ᐃᑕᑎᑭ ᐋᓂᐢᑲᐃᐧᑲᓈᓇ ᑳ ᐃᓯ ᐃᐧᒋᑖᒪᑲᑭ, ᐁ ᐃᓯ ᑲᐧᔭᐢᐠ ᐊᑐᐢᑫᒪᑲᑭ ᑲᐦᑭᔭᐤ ᑳ ᐃᑕᑕᐧᔭᑲᕽ, ᔭᑭᐅᒪᑲᐣ ᒥᔭᐤ ᐁ ᐊᑎ ᐅᓯᐃᓱᒪᑲᕽ ᓵᑭᐦᐃᐁᐧᐃᐧᓂᕽ.
[17] ᐅᒪ ᒫᑲ ᓂᐟ ᐃᑖᐧᐣ, ᒥᓇ ᓂᐟ ᐋᑐᑌᐣ ᑳ ᑎᐯᔨᐦᒋᑫᐟ ᐃᓯ, ᐁᑳ ᐁᑲᐧ ᑭᑕ ᐱᒧᐦᑌᔦᐠ ᒉᐣᑕᐃᓬᐊᐠ ᑳ ᐃᓯ ᐱᒧᐦᑌᒋᐠ, ᐁ ᐃᓯ ᐱᑯᓇᑕ ᐅ ᒥᑐᓀᔨᒋᑲᓀᒋᐠ,
[18] ᐁ ᐊᐧᓂᑎᐱᐢᑭ ᐊᔮᔨᐠ ᐅ ᓂᓯᑐᐦᑕᒧᐃᐧᓂᐋᐧᐤ, ᐁ ᐊᔭᑎᓯᐢᑕᑭᐠ ᐅ ᐱᒫᑎᓯᐃᐧᐣ ᑭᓭᒪᓂᑐ ᐃᐧᔭ ᐁᑳ ᑭᐢᑫᔨᑕᒧᐃᐧᐣ ᐁ ᑭᑭᐢᑳᑯᒋᐠ, ᒋᑫᒫ ᐁ ᒪᐢᑲᐃᐧᑌᐁᒋᐠ;
[19] ᐁᐊᐧᑯᓂᐠ ᐁ ᐳᓂ ᐅ ᒧᓯᐅᐃᐧᓂᒋᐠ ᑳ ᐸᑭᑎᓂᓱᒋᐠ ᐱᓯᑳᐧᑎᓯᐃᐧᓂᕽ, ᑭᑕ ᐊᑐᐢᑳᑕᐦᑭᐠ ᑲᑭᔭᐤ ᑫᑲᐧᐩ ᐁᑳ ᑳ ᐯᑲᕽ ᑳᓴᑳᑎᓯᐃᐧᓂᕽ.
[20] ᒫᑲ ᑭᔭᐋᐧᐤ ᓇᒪᐃᐧᔭ ᐁᑯᓯ ᑳ ᑭ ᐃᓯ ᑭᐢᑫᔨᒫᔦᐠ ᙭;
[21] ᑭᐢᐱᐣ ᑳ ᐯᑕᐊᐧᐁᐧᑫᐧ, ᒥᓇ ᑳ ᑭᐢᑭᓄᐦᐊᒫᑲᐃᐧᐁᐧᑫᐧ, ᑖᐯᐧᐃᐧᐣ ᑳ ᐃᓯ ᐊᔮᐟ ᒋᓴᐢ:
[22] ᐅᐱᒣ ᑭᑕ ᐊᐢᑖᔦᐠ, ᑲᔮᐢ ᑳ ᑭ ᐯ ᐃᓯ ᐱᒫᑎᓯᔦᐠ, ᑲᔭᑌ ᐊᔨᓯᔨᓂᐤ, ᑳ ᐊᑎ ᓂᓯᐊᐧᓈᒋ ᐊᔮᐟ ᑳ ᑲᔦᓯᐃᐁᐧᑭ ᒪᒋ ᒧᐢᑕᐁᐧᔨᑕᒧᐃᐧᓇ ᐅᐦᒋ;
[23] ᐁᑯᓯ ᑭᑕ ᐅᐢᑭ ᐅᓯᐃᑲᐃᐧᔦᐠ ᐁ ᐊᐦᒑᐦᑯᐊᐧᕽ ᑭ ᒫᒥᑐᓀᔨᒋᑲᓂᐋᐧᐤ,
[24] ᐁᑯᓯ ᑭᑕ ᐳᓯᐢᑲᐋᐧᔦᐠ ᐅᐢᑭ ᐊᔨᓯᔨᓂᐤ, ᑭᓭᒪᓂᑐ ᐅᐟ ᐃᓯᓈᑯᓯᐃᐧᓂᕽ ᑳ ᑭ ᐃᓯ ᐅᓯᐃᐦᐟ ᑲᐧᔭᐢᑭᑖᑎᓯᐃᐧᓂᕽ ᒥᓇ ᐁ ᐃᓯ ᑲᓈᑕᕽ ᑖᐯᐧᐃᐧᐣ.
[25] ᐁᑯᓯ ᒫᑲ, ᐅᐱᒣ ᐁ ᐊᐢᑖᔦᐠ ᑭᔮᐢᑭᐃᐧᐣ, ᑖᐯᐧᐃᐧᐣ ᐃᐧᐦᑕᒫᑐᐠ ᑳ ᐃᐧᒋ ᐊᔨᓯᔨᓂᑐᔦᐠ: ᒋᑫᒫ ᑲᐦᑭᔭᐤ ᑯ ᐃᐧᒉᐋᐧᑲᓂᑐᓈᓇᐤ.
[26] ᑭᓯᐋᐧᓯᐠ, ᐁᑳᐃᐧᔭ ᒫᑲ ᒪᒋᑐᑕᒧᐠ: ᐁᑳᐃᐧᔭ ᑭᑕ ᐸᐦᑭᓯᒧ ᐱᓯᑦ ᐁ ᑭᓯᐋᐧᓯᔦᐠ:
[27] ᐁᑳᐃᐧᔭ ᒥᓇ ᑕᐃᐧᐢᑕᒫᕽ ᒪᒑᔭ.
[28] ᑭᔮᑦ ᐊᓇ ᑳ ᑭ ᑭᒧᑎᐟ ᐁᑳᐃᐧᔭ ᒥᓇ ᑭᑕ ᑭᒧᑎᐤ: ᒫᑲ ᑭᔮᑦ ᑭᑕ ᐊᑐᐢᑫᐤ, ᐁ ᐊᑐᐢᑳᑕᕽ ᐅ ᒋᐦᒋᔭ ᐅᐦᒋ ᐊᓂᒪ ᑳ ᒥᔮᐧᓯᓂᔨᐠ, ᑭᑕ ᐊᔮᐟ ᑫᑲᐧᐩ ᑭᑕ ᒥᔮᐟ ᐊᓂᐦᐃ ᑳ ᑭᐧᑕᒫᔨᐟ.
[29] ᑭᔮᑦ ᐁᑳᐃᐧᔭ ᒪᒋ ᐱᑭᐢᑫᐧᐃᐧᐣ ᑭᑐᓂᐋᐧᕽ ᑭᑕ ᐅᐦᒋᐸᔨᐤ, ᒫᑲ ᐊᓂᒪ ᑳ ᒥᔮᐧᓯᐠ ᑭᑕ ᐅᐦᒋ ᑭᐢᑭᓄᐦᐊᒫᑯᐃᐧᓯᕽ ᐁ ᐃᓯ ᑭᐧᑕᒫᕽ, ᑭᑕ ᓂᓱᑲᒫᑯᒋᐠ ᐊᓂᑭ ᑳ ᐯᐦᑕᐦᑭᐠ.
[30] ᐁᑳᐃᐧᔭ ᒥᓇ ᒥᑯᐢᑳᑌᔨᑕᒥᐃᒫᕽ ᑭᓭᒪᓂᑐ ᐅ ᑲᓈᒋ ᐊᐦᒑᐦᑲᐧ, ᐃᑕ ᐅᐦᒋ ᑳ ᑭ ᑭᐢᑭᓇᐋᐧᒋᐃᑲᐃᐧᔦᐠ ᐱᔨᐢ ᑭᑕ ᐱᒫᒋᐦᐃᐁᐧᐃᐧ ᑭᓯᑳᐠ.
[31] ᑭᔮᑦ ᑲᐦᑭᔭᐤ ᐸᑳᐧᑎᑐᐃᐧᐣ, ᒥᓇ ᑭᓯᐋᐧᓯᐃᐧᐣ, ᒥᓇ ᑭᓯᐁᐧᔨᑕᒧᐃᐧᐣ, ᒥᓇ ᐹᓯᑳᐧᑎᓯᐃᐧᐣ, ᒥᓇ ᑭᑳᐃᐧᑕᒧᐃᐧᐣ, ᐅᐱᒣ ᑭ ᑲ ᐊᐢᑖᓈᐋᐧ, ᑭᑭ ᑭᒧᒋ ᓇᔦᑖᐁᐧᔨᒥᑐᐃᐧᐣ:
[32] ᐁᑯᓯ ᒥᔪ ᑐᑖᑐᐠ, ᑭᓭᐋᐧᑐᑖᑐᐠ, ᐁ ᐸᐳᓀᔨᑕᒫᑐᔦᐠ, ᑖᐱᐢᑯᐨ ᑭᓭᒪᓂᑐ ᒥᓇ ᙭ ᐅᐦᒋ ᑳ ᑭ ᐳᓀᔨᑕᒫᑯᔦᐠ.