[1] nikotwāsik kīsikāw ē‑ispayik Jesus kī‑sipwēhtahēw Petera ēkwa Jamesa ēkwa Johna kā‑wīcisānihtocik ē‑ispāyik wacīhk ēkotē wiyawāw piko ē‑ayācik nisikatanohk.
[2] ēkwa ē‑kitāpamācik Jesusa, kī‑kwēskinākosiyiwa, ohkwākaniyiw kīhkāyastēyiw tāpiskōc pīsim, ēkwa otayiwinisiyiwa ē‑pakaski-wāpiskāyiki.
[3] wāpamēwak mīna Mosesa ēkwa Elijahwa ē‑pīkiskwātāyit Jesusa.
[4] Peter ēkwa itēw Jesusa, “tāpwē ēsa miywāsin ōta ē‑ayāyāhk, kīspin nitawēyihtamani nisto mīkiwāhpa nika-mānokān ōta, pēyak kiya, ēkwa pēyak Moses, ēkwa pēyak Elijah ohci.”
[5] ē‑mēkwā-pīkiskwēt kētahtawē kā‑pakaski-wāsēyāk waskow ē‑ākawāstēskākocik, ēkwa pēhtamwak ē‑itwēwiht, “ēwako awa kā‑sākihak nikosis ēkwa mitoni ē‑nahēyihtamihit. natohtāhk!”
[6] ispīhk kiskinohamawākanak ē‑pēhtahkik ōma, kī‑sēkisiwak ēkwa ē‑pakamihkwēsimisocik.
[7] Jesus māka ēsa pē‑atamiskawēw ē‑itāt, “pasikōk, ēkāya sēkisik.”
[8] ēkwa ispīhk ē‑ohpiskwēyicik namōya awiya wāpamēwak, Jesusa piko.
[9] ēkwa ē‑pē-nīhtaciwēcik, Jesus wīhtamawēw, “ēkāya wīhtamok ōma kā‑isi-wāpahtamēk, iyikohk ayisiyinīwikosisān kī‑āpisisimihci.”
[10] okiskinohamawākana ēkwa kakwēcimik, “tānēhki kā‑kiskinohamākēcik wiyasiwēwin kā‑itwēcik piko nīkān Elijah kita-takohtēt?”
[11] “tāpwē Elijah kita-kī-takohtēt nīkān ēkwa kahkiyaw kīkway kita-nēhpēmastāw,” itēw ēsa.
[12] “māka kiwīhtamātināwāw āsay Elijah kī‑takohtēw, ēkwa namōya ohci-nisitawēyimēwak māka ē‑isi-nitawēyihtahkik kī‑kitimahēwak. pēyakwan ēkosi kita-tōtawēwak ayisiyinīwikosisāna.”
[13] ēkosi kiskinohamawākanak nisitohtamwak Johna osīkahāhtākēwa kā‑māmiskōmāyit.
[14] ē‑itohtēcik ēkwa ita ayisiyiniwa kā‑ayāyit, pēyak nāpēwa pē‑nakiskāk Jesus ē‑ocihcihkwanapīstākot itik,
[15] “okimāw, kitimākinaw nikosis! ē‑kakwātaki-ocipitikot māna ēkwa ē‑pahkisihk āskaw iskotēhk ahpō nipīhk.
[16] ēkwa nikī-pētamawāwak kikiskinohamawākanak māka namōya kī‑miywāyāhēwak.”
[17] ōmisi itēw Jesus, “kiyawāw ēkāya kā‑otāpwēhtamowiniyēk ēkwa kikakēpātisināwāw! tāniyikohk isko ka‑kisātakok? pēsīhk ana nāpēsis.”
[18] Jesus kisīkitotēw anihi maci-ahcāhkwa, ēkosi nakatēyiwa anihi nāpēsisa, ēkwa miywāyāyiwa.
[19] wiyawāw piko kiskinohamawākanak pē‑nātēwak Jesusa ē‑kakwēcimācik, “tānēhki ēkāya kā‑kaskihtāyāhk kita-wayawītisahwāyāhk maci-ahcāhk?”
[20] “ayisk namōya ēkwayikohk tāpwēhtamowin kitayānāwāw.” Jesus itēw, “kikēhcināmitināwāw kīspin kanakē otāpwēhtamowiniyēk iyikohk ē‑ispīhcikitit kā‑māwaci-apisīsisit kiscikānis, kika-kī-sīhkimāwāw awa ispatināw kita-āhtohtēt, ēkosi kita-tōtam. piko kīkway kika-kī-tōtēnāwāw. [
[21] nayēstaw ayamihēstamākēwinihk ēkwa īwanisīhisowinihk ohci kita-kī-wayawītisahwāwak ōki itowahk, ēwako piko.]”
[22] ispīhk kiskinohamawākanak ē‑māmawopayicik Galileehk, Jesus ōmisi itēw, “ayisiyinīwikosisān wī‑pakitināw kita-otinikot nāpēwa
[23] kā‑wī-nipahikot, māka kita-āpisisin nisto kīsikāw kī‑ispayiki.” ēkosi mitoni wīsakitēhēwak.
[24] ispīhk Jesus ēkwa okiskinohamawākana ē‑takohtēcik Capernaumihk, otipahikēhiwēwak pē‑nātēwak Petera ēkwa ē‑itācik, “kikiskinohamākēmiwāw cī tipaham tipahikēwi-sōniyāwa kihci-ayamihēwikamikohk ohci?”
[25] “tāpwē piko ani,” itēw ēsa Peter. ispīhk ē‑ati-pīhtikwēt wāskāhikanihk sēmāk ōmisi itik Jesusa, “Simon, tānisi ē‑itēyihtaman? awīna kā‑tipahamawāt kihci-okimāwa ōta askīhk tipahikēwi-sōniyāwa ēkwa sōniyāwa ohci kīkwaya kā‑wayawītatāk ahpō kā‑pīhtikwētatāk otaskiyihk? otiyinīma cī ahpō pītosiyiniwa?”
[26] ōmisi itik, “pītosiyiniwa.” ēkwa Jesus itēw, “ēkosi ēsa otiyinīmiwāwa namōya katāc kita-tipahamākocik.
[27] māka namōya kinōhtē-kisiwāhānawak ōki ōta kā‑ayācik. ēkosi ēsa mahti itohtē sākahikanihk, kwāskwēpicikē ēkwa otin ana nīkān kinosēw kā‑kāhcitinat. otōnihk kika-miskawāw sōniyās kita-tēpi-tipahamahk tipahikēwi-sōniyāw. otin ēkwa tipaha tipahikēwi-sōniyāwa.”