[1] Kamo in mga babai, kamo pasakop sa kanyo mga lalaki, matang no siro yewed kay agpaniwala sa agiplaong Diyos na siro batay din aakayan in kanyo maalno pag ogali. Idwa kailangan kamo agpatoldo sa kansiro.
[2] Sibay wa in kansiro piyagngitan in kanyo mga ogali mabait, panawen sa kamo agmaal sa Diyos.
[3] In kanyo kamaalnowen ayaw agpapangkiten sa bilog, kataw in mga agpakapya abok, agisoroy in mga sangkap sa bilog, osai in mga maalno pag damit.
[4] Dayem in kamaalnowen sa galem, in mabait osai apyaan pag remrem. Ina idbatay miyalis, ina in makaanggay sa pangkit Diyos.
[5] In mga kagbaiyan tangona in mga agpasandig sa Diyos, kataw ina in kansiro yaalapet kamaalnowen. Siro agpasakop sa kansiro mga lalaki.
[6] Kataw wa daan Sara, siyo maniwala kay Abraam, kansiyo piyagawit kapwan in kansiyo lalaki. Na kamo agiyagem sa kansiyo mga bodang no kanyo panawen maalno, idapo piyagkariyaban kamayba nakay.
[7] Kamo wakay in mga lalaki, pagalapeten maal in kanyo mga babai. Siro pagmaalen angkataw siro kalakoyte in eyat, osai kataw daan din kamo batay piyagpaboway gayed in Diyos. No kamo kataw ina, na idapo batay agsalag sa kanyo mga pandalangin.
[8] Sa kalobosan kangay piyagsabi sa kanyo, kitam boo malageman in remrem, malsiyayonan, agpaybelagan, agpakayawte osai ayaw mabwat in remrem.
[9] Ayaw agpangganti. Ayaw agpamanes sa mga agpamanes sa kantam, dayem dalanginen siro keyen pakayawteen. Angkataw ina in dailan kaya kitam iidang Diyos, matang kitam kansiyo piyagpakayawte.
[10] Kataw in siyabi sa mga Agisolat keyen, In agkabeet agkasadapan sa boway, agkabeet agkaanggay, na ayaw agsabi daet, in kansiyo bibi ayaw agsabi baribid.
[11] Baliwanen wa in daet, agpangwat wa in maalno, agpilit agpabelag sa roma.
[12] Angkataw in Kapwan agkaanggay sa mga agpangwat in betek, kansiyo piyagparengey in kansiro pandalangin. Kamay siyo agkagalit sa mga agpamangwat daet.
[13] No kantam boo remrem beet agpangwat maal, na idapo batay agpangwat daet sa kantam.
[14] Kamay no kitam piyagpaidapan sa agpangwat maal, na agkaanggay kay din kitam. Ayaw agkalimo sa kansiro mga agpamalimlimo, ayaw agkariyaban.
[15] Pagmaalen in Kiristo sa kantam remrem, kataw siyo in kantam Kapwan. Kailangan kitam palagi agsandata agpatoldo sa mga agtanong no nakay in kantam pagpasandigan.
[16] Kamay in agpatoldo kitam mabait, osai ayaw agpaidapowen kabolowan in kantam piyagpatoldo. Kailangan in kantam ogali maalno matang yewed magolo in kantam remrem, osai matang batay arikoyan in mga aglibak sa kantam, mga agsabi daeten in kantam maalno pag ogali in kitam agyanggat kay Kiristo.
[17] Osai in piyagpaidapan panawen sa agpangwat daet, osai in piyagpaidapan panawen sa agpangwat maal, na in maal agbangen in kitam piyagpaidapan panawen sa agpangwat maal, no ina in beet Diyos.
[18] Angkataw panawen sa kantam mga daet Kiristo matay, makaosai waget na sibay anggan idapo kalobosan. Siyo idapo daet, kamay siyo matay panawen sa mga apo daet, matang kitam kansiyo piyaanggat sa Diyos. In kansiyo bilog biyono mga mangyan, kamay in siyo piyaboway wakay in Abyan Diyos, na in kansiyo bilog idbatay wa mabono.
[19] In abyan Kiristo pataboy sa mga abyan piyagbilanggo, agpatoldo sa kansiro.
[20] Siro in mga abyan in mga mangyan in kabetek Nowi, in mga yewed maniwala sa Diyos in siyo agpanaya gayed sa kansiro, anggan Nowi agpangwat in bangka lakoy, matang nges siro agbenglay kansiro daet. Korang in mga mangyan sa bangka, walo waget, in piyaboway sa bongkalos.
[21] Ina pag sapa rarawan baotismo in agpaboway ngona sa kantam. In baotismo yewed agogas lebag sa bilog, dayem ina tanda in kantam maalno pag remrem agpangako sa Diyos. Kaya kitam piyagpaboway panawen IsoKiristo wakay piyaboway.
[22] Siyo monaik sa langit, kalbas ngona agtokkaw sa pamalang agbangen Diyos, agpapoon sa mga angil ista, osai sa mga apo kabaloyan agpakoyay sa kiwang.