[1] Kamayba nakay in agpaniwala keyen, Isos in Kiristo, in piyangako Diyos, in agpamaboway, na siyo bodang Diyos. In agpakayawte sa osai ka amang, na agpakayawte din sa mga bodang.
[2] Kaya kantam atawanan kitam agpakayawte sa mga bodang Diyos, angkataw kitam agkabeet sa Diyos, osai agpaniwala sa kansiyo mga otos,
[3] angkataw in beet siyabi in agkabeet sa Diyos in agpaniwala sa kansiyo mga otos. In kansiyo mga otos yewed maidap,
[4] -
[5] angkataw in baatte bodang Diyos kabaloy agpandaeg sa mga daet pag ogali atai sa kobat. Kaya kitam kabaloy kapandaeg panawen kitam agpaniwala Isos in Bodang Diyos. In agpaniwala kataw ina in kapandaeg sa mga daet pag ogali atai sa kobat.
[6] In IsoKiristo atai pataboy sa kobat, siyo biyaotismowan, osai siyo biyono sa kodos. In siyo biyaotismowan, ina sa sapa. In siyo matay, mabobo in kansiyo daya. In Abyan in agpatonay keyen, betek ina pag dowai, angkataw in Abyan in betek.
[7] Na tolo wa in agpatonay,
[8] in Abyan, osai in sapa, osai din in daya. Ina pag tolo tikkatawan in piyagpatonay.
[9] No kitam agpaniwala sa patonay mangyan, na labi kay maal piyaniwalaan in patonay Diyos, in kansiyo patonay panawen sa kansiyo Bodang.
[10] In agpasandig sa Bodang Diyos, apo in Abyan agpatonay sa kansiyo galem. Kamay in dayo maniwala sa Diyos, na siyo aglaban sa Diyos keyen siyo bosliyen. Ina panawen siyo yewed agpaniwala sa patonay Diyos panawen sa kansiyo Bodang.
[11] In patonay keyen tiyaboy wa Diyos sa kantam in boway idapo kalobosan, in boway batay kiyowa sa kansiyo Bodang.
[12] In piyagbalayan in Bodang Diyos, apo boway idapo kalobosan, kamay in yewed piyagbalayan in Bodang, na idapo boway.
[13] Kaya anda kangay piyagsolat sa kanyo matang kanyo atawanan kamo in mga agpasandig sa Bodang Diyos apo boway idapo kalobosan.
[14] Kitam yewed agkarikoy pasabangen sa kansiyo, angkataw kantam atawanan no in kantam piyagayay kataw daan in kansiyo beet na kitam piyagparengey.
[15] No kantam atawanan kitam kansiyo piyagparengey na kantam din atawanan kansiyo piyagtaboy in kantam piyagayay sa kansiyo.
[16] No siyo in kangitan sa kansiyo belag kapangwat daet yewed makakatay sa kansiyo abyan, na pandalanginen ina pag belag, na siyo batay piyaboway. Ina sa mga belag in daet yewed makakatay sa kansiyo abyan. Apo daet makakatay sa abyan, kamay yewed kangay piyagsabi kanyo pandalanginen in agpangwat ina.
[17] In boo yewed betek pag panawen, ina daet. Kamay apo daet yewed makakatay sa abyan.
[18] Kantam atawanan in mga bodang Diyos yewed wa agpangwat daet, angkataw siro piyagalapet IsoKiristo, siro yewed mayadi piyaglado in kapwan daet.
[19] Kantam atawanan kitam sa Diyos agbangen, kamayba in boo sa kobat agbangen sakop diyablo.
[20] Kantam atawanan atai pataboy in Bodang Diyos. Kitam kansiyo piyakan maal pag remrem, matang kantam atawanan in betek pag Diyos, osai kitam sa kansiyo wa, sa betek, osai sa kansiyo Bodang IsoKiristo. Siyo in betek pag Diyos. Siyo in boway idapo kalobosan.
[21] Laki mga bodang, ayaw agpasabangen sa mga yewed Diyos.