[1] Me, Asɔre panin, metwerɛ kɔma Awuraa a wɔayi no ne ne mma a medɔ wɔn, nokorɛ no nti. Ɛnyɛ me nko, na mmom, wɔn a wɔnim nokorɛ no nyinaa dɔ mo,
[2] ɛfiri sɛ, nokorɛ no te yɛn mu na ɛbɛtena yɛn mu akɔsi daa.
[3] Adom, mmɔborɔhunu ne asomdwoeɛ mfiri Agya Nyankopɔn ne Awurade Yesu Kristo, Agya no Ba no, nkyɛn mmra yɛn so nokorɛ ne ɔdɔ mu.
[4] Mʼani gyee sɛ mehunuu sɛ mo mma no bi te nokorɛ mu sɛdeɛ Agya no hyɛɛ yɛn no.
[5] Enti, mereka akyerɛ wo, Awuraa sɛ, momma yɛnnodɔ yɛn ho. Yei nyɛ mmara foforɔ a merehyɛ ama wo. Ɛyɛ mmara a wɔahyɛ ama yɛn firi mfitiaseɛ.
[6] Saa ɔdɔ a mereka ho asɛm yi kyerɛ sɛ, momma yɛntena ase na yɛnyɛ ɔsetie mma Onyankopɔn. Mmara a mote firii mfitiaseɛ no kyerɛ sɛ mo nyinaa, montena ase ɔdɔ mu.
[7] Adaadaafoɔ a wɔmpae mu nka sɛ Yesu Kristo baa ɔhonam mu no adɔɔso wɔ wiase. Saa adaadaafoɔ yi yɛ atorofoɔ ne Kristo atamfoɔ nso.
[8] Monhwɛ mo ho so yie na moanhwere deɛ moayɔ ho adwuma na moanya mo akatua wɔ mu no.
[9] Obiara a ɔntena Kristo nkyerɛkyerɛ mu no, ɔnni Onyankopɔn. Na deɛ ɔtena nkyerɛkyerɛ no mu no wɔ Agya no ne Ɔba no.
[10] Sɛ obi ba mo nkyɛn na wamfa saa nkyerɛkyerɛ yi ammrɛ mo a, monnnye no wɔ mo fie, na monnka nso sɛ, “Asomdwoeɛ nka wo.”
[11] Ɛfiri sɛ, obiara a ɔgye saa nipa no ka bɔne a ɔyɛ no ho.
[12] Mewɔ nsɛm pii ka kyerɛ mo, nanso meremfa krataa ne twerɛduro so nka. Na mmom, mɛba nipadua so abɛkasa akyerɛ mo, na mo ani agye.
[13] Wo nuabaa a wɔayi no no mma no kyea wo.