លោក ធួន ស៊ីណាន៖ ដើម្បីទាក់ទាញទេសចរ កម្ពុជាត្រូវបំបាត់អំពើឆបោកអនឡាញ និងផ្សព្វផ្សាយពីទេសចរណ៍សុវត្ថិភាព

កាលពីថ្ងៃទី២ ខែធ្នូ ឆ្នាំ២០២៥ រដ្ឋាភិបាលកម្ពុជា បានឯកភាពជាគោលការណ៍ ផ្តល់ការលើកលែងទិដ្ឋាការសាកល្បងចំពោះពលរដ្ឋចិន ដែលធ្វើដំណើរចេញពីប្រទេសចិន ដោយផ្តល់រយៈពេលស្នាក់នៅកម្ពុជាចំនួន ១៤ថ្ងៃ។ គម្រោងសាកល្បងមានរយៈពេល៤ខែ គិតចាប់ពីថ្ងៃទី១៥ ខែមិថុនា ដល់ថ្ងៃទី១៥ ខែតុលាឆ្នាំ២០២៦ ដោយនៅក្នុងនោះ ជនជាតិចិនគ្រាន់តែបំពេញ E-Arrival Card។ នៅក្នុងកិច្ចសម្ភាសជាមួយវិទ្យុបារាំង RFI នៅថ្ងៃទី៣ ខែធ្នូ ឆ្នាំ២០២៥នេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកបានចាត់ទុកថា គម្រោងសាកល្បង លើកលែងទិដ្ឋាការចំពោះអ្នកទេសចរចិន គឺជាកាដូដ៏ធំ ដែលរដ្ឋាភិបាលផ្តល់ដល់វិស័យទេសចរណ៍។ ប៉ុន្តែ ដើម្បីសម្រេចគោលដៅនេះ លោក ធួន ស៊ីណាន បញ្ជាក់ដែរថា រដ្ឋាភិបាល និងអ្នកពាក់ព័ន្ធត្រូវរួមគ្នាដោះស្រាយបញ្ហាចម្បង ២ចំណុច គឺបំបាត់អំពើឆបោកតាមអនឡាញ និងបង្កើនការផ្សព្វផ្សាយពីគោលដៅទេសចរណ៍សុវត្ថិភាព៕