Türkmenistan

Ahal welaýatynda şu günler gonamçylyklara gözegçilik güýçlendirilip, olaryň her birinde azyndan iki polisiýa işgäri nobatçylyk çekýär. Bu aralykda, ilat arasynda tanalýan molladyr işanlar, palçylar we tebipler Milli howpsuzlyk ministrliginiň ýerli edaralary tarapyndan soraga çekilýär.

Maryda geçen hepdäniň ahyrynda birnäçe günläp ýagan ýagşyň we garyň yz ýany, köçelerde giň gerimli arassaçylyk işleri geçirildi. Jemagat hojalygy müdirliginiň işgärleriniň ençemesi özleriniň dynç günlerinde hem işlemäge mejbur edilýändigini, emma munuň üçin goşmaça hak tölenmeýändigini aýdýar.

Lebap welaýatynda, aýratyn-da, Türkmenabat şäherinde ilatyň Internet üpjünçiligi ýaramazlaşyp, onuň tizligi ep-esli peseldi. Häkimiýetler bu barada aç-açan resmi düşündiriş bermeýärler. Bu ýagdaýlar barada Azatlyk Radiosynyň habarçysy 19-njy ýanwarda sebitden maglumat berdi.