پچاس برس سے گندم کے تنکوں کو تصویروں میں ڈھالتا عابد شاہ

گندم کی فصل کٹتی ہے تو تنکے یا تو مویشیوں کے کام آتے ہیں یا کھیتوں میں بکھرے رہ جاتے ہیں، مگر عابد شاہ کے لیے یہی تنکے ان کے فن کا سب سے قیمتی سامان ہیں۔ وہ انہیں جمع کرتے، صاف کرتے اور پھر بڑی نفاست سے جوڑ کر ایسی تصویریں بناتے ہیں جنہیں دیکھ کر پہلی نظر میں یقین ہی نہیں آتا کہ یہ صرف گندم کے تنکوں سے تیار کی گئی ہیں۔ عابد شاہ اپنی زندگی کے تقریباً 50 برس اس منفرد فن کو دے چکے ہیں۔