Tala Fou mai Samoa Suia le Teuila i le Vaiaso o Measina mai le Aso 30 Aokuso i le Aso 5 o Setema.

O le tausaga nei o le a suia ai le igoa o le Teuila lea e faamanatuina i le masina o Setema i tausaga uma i le vaiaso o measina.Na saunoa le fofoga o le ofisa o turisi Taimalelagi Tutuila Farao o le a amatalia mo le vaiaso atoa lenei faamoemoe i le aso 30 o Aokuso i le aso 5 o Setema. O le vaiaso atoa o le a faia ai faafiafiaga faaleaganuu i luma o le fale o le malo i Matagialalua e pei o sasa,mauluulu,faataupati ma pese samoa. O le a faailoa ai foi vaneina o measina ma mamanu,galuega taulima ma le tatau aemaise taaloga kilikiti. O le a faataunuu foi tauvaga alo paopao ma va'aalo fagota mo lenei vaiaso faapitoa ae o le a taualuga i le Miss Samoa e sailia ai se Tausala o le 2026-2027/.Ua tapena foi le au faifaleaiga aua le fofoga taumafa o le atunuu i le vaiaso atoa.

Mo Tala mai Samoa ma le lalolagi faafofoga mai i le SBS Samoan.