ជនភៀសសឹកចាប់ផ្តើមត្រឡប់ទៅលំនៅឋានវិញទាំងអារម្មណ៍ភ័យខ្លាច

ប្រទេសកម្ពុជា និងថៃ សម្រេចបាននូវកិច្ចព្រមព្រៀងលើបទឈប់បាញ់មួយ តាមរយៈយន្តការគណៈកម្មាធិការព្រំដែនទូទៅ(GBC) កាលពីថ្ងៃទី២៧ ខែធ្នូ ឆ្នាំ២០២៥។ តាមរយៈបទឈប់បាញ់នេះ ប្រជាជនជាជនភៀសសឹកកម្ពុជា ដែលមកស្នាក់អាស្រ័យនៅក្នុងជំរំភៀសសឹកក្នុងខេត្តសៀមរាប បានសម្រេចចិត្តត្រឡប់ទៅកាន់លំនៅឋានរបស់ខ្លួនវិញ។ ជាការវិលត្រឡប់ ដែលដិតដាមដោយអារម្មណ៍ភ័យខ្លាចចំពោះសុវត្ថិភាពផ្ទាល់ខ្លួន និងការបារម្ភចំពោះការផ្ទុះសង្គ្រាមព្រំដែនជាថ្មី។ ជាមួយគ្នានោះដែរ ក៏មានប្រជាជនភៀសសឹកមួយចំនួនធំផ្សេងទៀត នៅតែបន្តស្នាក់នៅនៅក្នុងជំរំភៀសសឹកជាបណ្តោះអាសន្ននៅឡើយ ដោយសារតែការទទួលរងផលប៉ះពាល់ធ្ងន់ធ្ងរបង្កឡើងដោយសង្គ្រាមរយៈពេល២០ថ្ងៃកន្លងមកនេះ។