Ko honno yiiruɗon ñiŋooje lunndiyankooɓe Guinée Bissau, faade e kaaldigal hakkunde CEDEAO e konunkooɓe ardiiɓe leydi ndin?

Hannde e talaata 11 lewru 8ɓuru, hiɗen yiilora Guinée Bissau, nokku to lunndiyankooɓe ñiŋi sanne yeewtere nde dental leyɗe hirnaande Afrik woni e waɗudude e laamu ngun. Lunndo ngon no tuumiri CEDEAO anngal nuunɗal e bammbude eɓɓoore konunkooɓe ardiiɓe Guinée Bissau yuɓɓingol suɓngooji ngam waylude doosgal leydi ndin. Ɗum ko caggal nde imminaaɓe CEDEAO njahi Bissau laaɓi ɗiɗi fow ngam haaldude e ardiiɓe laamu faddewu nguu e dow alhaali dawro leydi ndin.

Kono tawnoraali lunndo ngon e pelle sosiyete siwil. Woɓɓe e maɓɓe no holli wonnde dental CEDEAO alaa e waɗude golle mun no haaniri. Ko honno yiiruɗon ñiŋooje lunndiyankooɓe Guinée Bissau, e kaaldiɗe ɗe CEDEAO woni e waɗudude e konunkooɓe ardiiɓe leydi ndin? Ko holɗum ɗum waawi jibinde hannde?  Ko honno caɗeele dawro taskaaɗe hannde Guinée Bissau ñawndirtee?