About
Alarba hannde, ñannde 7 lewru 10ɓuru, en yewtii ko faati e caɗeele dawro taskaaɗe to Faransi. Ko huunde nde meeɗaa waɗude taskaa ton e ɗee balɗe. Yamnde 14 caggal nde guwernaman keso Faransi joɗɗinaa, Sébastien Lecornu hooreejo keso jaagorɓe leydi ndin jonnitii laamu ngu o halfinaa ñannde 9lewru faltiinde. E bi’ol Sébastien Lecornu ko addimo ɓortaade nguu laamu, ko tawde sartiiji ɗin timma fii yo o waawu laataade hooreejo jaagorɓe Faransi. Hino jeyaa e ɗum anngal famondiral hakkunde makko e hooreejo leydi ndii ko faatii e suɓagol jaagorɓe guwernaman makko on.
Hay si tawii Emmanuel Macon jaɓii pellital Sébastien Lecornu ɓortaade laamu, o ñaagike mo heddaade tawo e julleere ɗen, o haalda e pelle dawro Faransi ɗee haa e alarba kikiiɗe ngam ɗaɓɓude laawi no deeƴere tabitira e nder leydi ndii. Kono ɗuuɗuɓe nootaaki, hannde, e noddaadu Sébastien Lecornu. Wano Jordan Bardella e Marine Le Pen hollii tawataake sabu e bi’ol maɓɓe wonaa ko nafata ɓiɓɓe Faransi, yeewtete ko nafa hooreejo leydi ndii Emmanuel Macron. Sébastien Lecornu waawi noon tummbondirde e hooreeɓe woɓɓe. Ɓen ko oo ka Senat, hooreejo suudu sarɗinkooru ndun wonndude e Gaɓriel Attal e Edouard Philippe, jaagorɓe hiɓɓe Emmanuel Macron.