Holno njiiruɗon ɗee eɓɓooje laamu faddewu Guinee Bissau faade e lunndiyankooɓe ɗiɗo mawɓe leydi ndi?

E alarba 4 lewru 2ɓuru, hiɗen yewta hannde ko faati e alhaali salagol Domingos Pereira e Fernando Dias, lunndiyankooɓe mawɓe ɗiɗo Gine Bisaawo, gollidude e konunkooɓe ardiiɓe laamu faddewu ngun. Ɓee lunndiyankooɓe ɗiɗo ko e aljuma faldiiɗo, hewtiti ka maɓɓe mo kala. Ɗum ko ɓawto nde Domingos Pereira fawaaɗo junngo gila ciwlere laamu waɗunde e lewru 11 hitaande faltiinde woppitaa.

Fernando Dias kañun doguno e on saha fattii ka ambassade Nigeria si o arti yontere yawtunde. Ɓee lunndiyankooɓe mawɓe ɗiɗo, jaɓaali eɓɓooje ɗe ardiiɓe ɓen waɗani ɓe ko faati e okkugol ɓe jaagorɗe tati ngam ɓe jeyeede e Guwerneman on, jonna ɓe kadi julle 10 to suudu sarɗinkooru. Kono Domingos Pereira e Fernando Dias, no holli wonndema ɓe alaa e tuuninde hoore maɓɓe nde tawi jaagorɗe 3 e nder ɗe 22, e julle 10 e nder ɗe 65 to suudu sarɗinkooru alanaaɓe ɓatte politik, e kadi okkataaɓe doole to suudu sarɗiiji. CEDEAO no weltori kañun ndee eɓɓoore, fedde ndee no yiiri ɗum wano feere feewde e jonnitude siwileeɓe laamu ngun.