كنبة الحواديت

كم من مرة ندخل في طريق الآلم ونظن أننا نسير في دروبه بمفردنا؟ كم مرة ننسى أن المسيح -له كل المجد- تألم أيضًا من أجلنا، وتألم أيضًا مثلنا؟ الحقيقة يا عزيزي، أن كاتب المزمور عندما قال: "أَيْضًا إِذَا سِرْتُ فِي وَادِي ظِلِّ الْمَوْتِ لاَ أَخَافُ شَرًّا، لأَنَّكَ أَنْتَ مَعِي. عَصَاكَ وَعُكَّازُكَ هُمَا يُعَزِّيَانِنِي"، لم يكن يقولها من فراغ، ولكن من واقع تجربة شخصية وحقيقية مع الله.

وقت ما تجري تستنجد بربنا وتطلب دعمه هتلاقيه منتظرك وفاتح الباب مستني صوتك يطلب معونته، لكن بشرط صغير لكن صعب في أوقات كتير علينا، وهو أننا نطلبه بقلبنا وبإيمان حقيقي من جوانا، ميبقاش بس بلسانّا وإحنا مش مصدقين أنه قادر يعمل حاجات كتير علشانا.

في حياتنا اليومية، كتير بنقابل مواقف صعبة وضغوط كتيرة، وساعات بنحس إن الدنيا ضيقة ومفيش فرصة لأي شعور بالأمل يفضل فينا وفي قلبنا، وبتتحول حياتنا لكتلة من المشاعر السلبية، ونبدأ نحس إن حياتنا بقت عبارة عن ليل طويل مفهوش نهار، ولا يمكن يجي من بعده نور تاني من كتر اليأس اللي بيتسرب لنفوسنا.

لكن في عتمة ليل التجربة الصعبة، نلاقي وعد من ربنا زي شعاع نور بيدخل لنا من الكتاب المقدس وبيقول لنا: "فَحَوَّلَ لأَجْلِكَ الرَّبُّ إِلهُكَ اللَّعْنَةَ إِلَى بَرَكَةٍ، لأَنَّ الرَّبَّ إِلهَكَ قَدْ أَحَبَّكَ" (تثنية 23:5)، وده مش مجرد كلام، ده وعد إن كل الصعاب اللي بنمر بيها دي في الحقيقة بتبقى لصالحنا ومش آخر الدنيا، لكن بداية لحاجات كتيرة هنعرفها بعدين.

المشاكل اللي بتيجي في طريقنا دي مش بتبقى عشان تكسرنا، لأ، دي بتبقى عشان تقوينا وتطلع مننا نسخة تكون الأحسن والأفضل لينا ولحياتنا من خلال قوة ربنا اللي بتشكل فينا وقتها وبتغير فينا حاجات كتير وبتوربنا جوانب تانية كتير كان ممكن نكون غفلانين عنها ومنعرفهاش غير من خلال التجربة اللي بيسمح بيها.

ربنا يا عزيزي مش بيسمح بالضيقة إلا لما يكون فيها خير لينا والأجمل من ده كله، إنه مش بيسيبنا نواجه الدنيا لوحدنا ولا بيسيبنا في وادي ظل الموت لوحدنا، لكن دايمًا ربنا معانا وبيدينا القوة والصبر وبيعزينا ويبعت لنا السلام وقت التعب والضيقة ونحس بايده الحنينة دي وهي بتقومنا من وسط تعبنا وضيقاتنا.

والمدهش أكتر يا عزيزي، أن لما الزمن يعدي ونبص ورا، هنلاقي إن الحاجات اللي كانت هدانا ومكسرة فينا، هي اللي خلتنا أقوى وأحسن، والإيمان بأن ربنا بيحول الضيقة لبركة بيدينا الأمل والقوة إننا نقابل الحياة بكل اللي فيها من تحديات من غير خوف ولا قلق لكن بثقة أنه بيتصرف حتى لو مش عارفين ازاي.

وفي الآخر، لازم نفتكر دايمًا إن ربنا معانا، بيحمينا وبيقودنا، وكل اللي بنمر بيه ده هيتحول لخيرنا وبركتنا لأنه هو صانع الخيرات، ومش بيسمح غير بالخير ولا بيجيب غير الخير، ولحد ما الضيقة تعدي لازم نصبر ونتوقع خلاص الرب.

بيجي على كل واحد فينا وقت، بيحس أنه خلاص بقى عايش محني، كل الطرق مقفوله قدامه من كل اتجاه، بقى مش عارف يلاقيها منين ولا منين زي ما بنقول كده بالبلدي، وبيعيش وقتها فترة إحباط محدش يقدر يحسها ولا يفهمها غيره بسبب كم المشاعر السلبية اللي بيحس بيها.

وساعتها بيبقى ناسي حاجة مهمة جداً، أن حتى لو الطرق كلها اتقفلت قدامه، أو كل الناس بعدت عنه وبقى عايش لوحده ومفيش حد يهمه أمره ولا يهمه كل اللي بيمر بيه، بيفضل موجود أهم حد في الحياة مستنيه يجري عليه وهو فاتح حضنه ومستنيه بكل الحب وكل الدعم اللي في الدنيا واللي مش هيلاقيه عند أي حد تاني.

آه يا عزيزي، أقصد ربنا اللي وقتها بيكون مستني جرينا عليه علشان يشيل من على كتفنا كل الحمل اللي شايلينه ويسندنا وقت وقوعنا ويقومنا من تاني بقلب الأب اللي بيحب عياله ومستنيهم يرجعوا لحضنه من تاني فينفض من عليهم كل تراب الحزن والإحباط ويرجع ينور قلوبهم من تاني بتعويضه وحنيته.

زي ما المزمور كان قال: "لِمَاذَا أَنْتِ مُنْحَنِيَةٌ يَا نَفْسِي؟ وَلِمَاذَا تَئِنِّينَ فِيَّ؟ ارْتَجِي اللهَ، لأَنِّي بَعْدُ أَحْمَدُهُ، لأَجْلِ خَلاَصِ وَجْهِهِ. (مز 42: 5)"، يعني لما تلاقي نفسك منحنية وبتئن جواك، فكرها أنها مش لوحدها ولا عايشة في الحياة بطولها، لكن قول لها تستنى ربنا وتترجاه وهو هيقومها.

ولما تنده عليه بالإيمان، هتشوف ربنا وهو بيسندها وبيقومها وبيخلصها من حزنها وتعبها وبيسندها ويعوضها عن كل الناس اللي سابوها واتخلوا عنها، ويعيد جواها الفرح اللي طفته الأيام والتجارب، وتفتكر بعدها من كل التجارب دي بس ايد ربنا اللي سندت وخلصت، وتنسى كل حزن وكل تجربة صعبة مرت بيها في وقت من الأوقات.

من ثمار الروح القدس اللي بتبقى في حياتنا كمؤمنين وهي ثمرة مهمة طول الأناة، واللي تبان إنها صعبة أننا نقدر نتحلى بيها، لكن لما بتبقى جوانا بتبقى ثمرة مفيدة من ثمار الروح القدس لينا ولحياتنا كمؤمنين.

النهارده هنتكلم سوا عن ازاي ممكن لما تفضل مبتشوفش نفسك غير بعيون اللي حواليك هتكون بتئذي نفسك، ونفكر ونفتكر سوا أن لازم نشوف نفسنا بعينا ونحنا لأننا نستاهل الحب.