Hannde hiɗen yewta fii alhaali ɓee sukaaɓe ɓe mawɓe mum fawtotoo ko ɓooyi tawa ɓe gaynanaali hoore maɓɓe

E nder Taskaram men Ko Mbiiɗon ndee yontere, eɗen yewta ko faati e sukaaɓe ronndeteeɗe law geɗe aduna. Holko addata ɗum? Holko ɗum battinta e nguurdam suka oo? Ngam yewtude ɗum, Habib Diao ina jaɓɓoo Amadou Kebe, suka senegalnaajo mo duuɓi nogaas e jowi. Haa jooni e nder yewtere ndee omo jaɓɓoo Abdoul Doro Sow, moritanaajo ganndo e baŋŋe renndo, kañum kadi e Moussa KA, mo ganndal mum heertorii e baŋŋe hakkile. E nder rogre men radio gollodiiɗo, enn yahaa to wuro Maroua to Cameroun ngam yewtude e Robert Mbombo, ardiiɗo Radio Espoir to Maroua. Omo arta e golle maɓɓe toon. Ko Aboubakry Ndiaye jaɓɓaa e nder rogre Fulfulde Faaminiinde, omo artana e ko Pulaar yi’ata maando.